Şikayətçilər: “Şahin Məmmədov camaata qan uddurur...”
“Ağcabədinin icra başçısı Şahin Məmmədov rayon əhalisini içməli su ilə sınağa çəkir. Rayon camaatı içməyə su tapmır. Çünki icra başçısı Qar-qar çayından şəhərə gələn 18 kilometrlik su kəmərinin borularını doğradıb satdırıb”. Bunu rayon sakinləri Rəşid Nəcəfli və Nuşirəvan Məmmədov redaksiyamıza gələrək dedilər.

R.Nəcəfli başçının əhaliyə divan tutduğunu bildirdi: “Ağcabədi əhalisi içməli sudan korluq çəkir. Bunun da baiskarı icra başçısı Şahin Məmmədovdur. Hazırda rayon əhalisinə içməli su adı ilə verilən su Yuxarı Qarabağ suvarma kanalından gəlir. Bu su da nəinki içməyə, heç qab-qacaq, paltar yumağa belə yaramır. Çünki bulanıqdır, həmçinin içindən qurdlar həşəratlar gəlir. Yəni su xəstəlik mənbəyidir. Dəfələrlə bu haqda rayon prokurorluğuna, Respublika Prokurorluğuna şikayət ərizəsi vermişik. Araşdırma aparılsa da, dərdimizə əlac tapmaq əvəzinə bu işi ört basdır etmək istəyirlər”.

Şikayətçinin sözlərinə görə, ümumiyyətlə Şahin Məmmədovun bu və bu digər qanunsuz hərəkətlərindən yuxarı orqanlara şikayətlər olunsa da, buna məhəl qoymur: “Yanına qəbula gedən adamları isə o, təhqir edərək qovur. Faktlar var ki, Şahin Məmmədov rayondakı əlvan metalları, başqa su xətlərini də, rayon mərkəzindəki ağacları da doğradıb satdırır. Bu adam rayonda yerli iş adamlarını, sahibkarları dələduzluqla şərləyərək əllərində olan pulu alır. Onun hərisliyi ucbatından Ağcabədini pis günə qoyub. Açıq aşkar da deyir ki, gedin hara istəyirsinizsə şikayət edin, mənim elə güclü arxam var ki, sizin etdiyiniz şikayətlər mənim üçün heç nədir. Biz rayon sakinləri artıq icra başçısının rayonda etdiyi bu cür özbaşınalıqlara biganə qala bilmərik. Rayonda hər kəs narazıdır. Guya deyirlər ki, Ağcabədidə 10 minə yaxın yeni iş yeri açılıb. Ancaq əhalinin əksəriyyəti işsizdir. Mənim özümü də işdən çıxartdırıb. Şahin Məmmədov məktəb direktorlarını, müəllimləri, tibb işçilərini küçələrə çıxardaraq özlərinin hesabına ağac, gül əkdirir. Məktəb direktorlarına ağacların dibini sulatdırır. Rayonda quruculuq işi görəndə də onun pulunu sahibkarlardan alır. Rayon üçün ayrılan vəsaitləri isə özü mənimsəyir”.
Nuşirəvan Məmmədov isə icra başçısı tərəfindən təhqir edildiyini bildirdi: “Şahin Məmmədov Ağcabədi rayonuna başçı təyin ediləndən 8 il keçib. Bu 8 ildə Ağcabədidə insaniyyət deyə bir şey qalmayıb. İcra başçısının işi peşəsi ancaq pul yığmaq, rüşvət alaraq kimisə işə qoymaq, rüşvət verməyəni işdən çıxartmaqdır. Məhkəməyə işin düşəndə məhkəməyə sifariş edir ki, vətəndaşı sıxın. Hər həftənin 5-ci günü qəbul günüdür. İcra başçısı camaatı qəbul edəndə insanları sıxır, qorxudur və təhqir edir. Şəxsən mənə teleqrama vurub ki, gəl yanıma. Mən qorxumdan ailə üzvlərimlə getmişəm. Çünki bilirəm ki, məni şərləyib tutduracaq. Ondan yuxarılara şikayət etdiyim üçün ailə üzvlərimin yanında məni təhqir etdi. Mən 2008-ci ildən mülkiyyət sahibiyəm. Evim-eşiyim, hasarım, darvazam - hər şeyim qaydasındadır. Guya mən yer zəbt etmişəm və darvazam sökülməlidir. Ancaq mənim əlimdə xəritəm, sənədim var. Bununla bağlı neçə illərdir şikayətçiyəm. Ancaq hələ də şikayətimə baxılmır. Traktorlarda qapı-qapı düşüb su satırlar. Çünki verdikləri su xəstəlikdən başqa bir şey deyil. Bu suyun içindən yayda qurd çıxır. Çünki ölü it, pişik bu sudan çıxarılır. Şahin Məmmədov Ağcabədiyə gələn gündən əhaliyə qan uddurur. Oğlum Elsevəri 6 ay bundan qabaq qəfil yoxa çıxdı. Oğlumu Beyləqan yolunun üstündəki meşəyə apararaq vəhşicəsinə döymüşdülər. İcra başçısı oğlumu məndən qisas almaq üçün döydürüb. Bununla bağlı Baş Prokurorluğa müraciət etsəm də hələ də mənə bir cavab verməyiblər. Oğlum 22 gün Ağcabədi rayon xəstəxanasında yatdı. İcra başçısı həkimlərə tapşırıq verdiyi üçün oğlumu xəstəxanada qeydiyyata almayıblar. Bu işi də ört basdır ediblər. Nə oğlumu döyənlər, nə də döydürən tapılmır. Artıq bezmişik”.

Şikayətçilər icra başçısının özbaşınalıqlarına son qoyulmasını tələb edirlər.
Məsələ ilə bağlı ittihamda adı hallanan tərəfin də mövqeyini dərc etməyə hazırıq.