Böyük yalan, “qiyamət günü” - dünyanı "lərzəyə salan" mayyalılar kimdir?


gundemxeber.az Neçə müddətdir ki, dünya onlardan danışır-mayyalılardan, daha dəqiqi onların təqvimindən. Doğrudanmı mayyalılar 2012-ci il dekabrın 21-ni dünyanın sonu kimi proqnozlaşdırıblar? İndi demək olar ki, bütün ölkələrdə insanlar Mayya təqvimi ilə “dünyanın sonu”na qalan günləri saymağa başlayıblar. Dünyanı lərzəyə salan mayyalıların təqviminin bitməsinə, başqa sözlə, bəzi ağzıgöyçəklərin dediyi “qiyamət günü”nə isə çox az qalıb – 2-3 gün...
İnsanların təşvişə düşməsindən istifadə edənlər isə qorxunc iddialar irəli sürməkdədirlər: guya, dekabrın 21-də Yerdə inanılmaz kataklizmlər başlayacaq, bütün dünyada enerji kəsiləcək və Yer kürəsi qaranlığa qərq olacaq, tufan qopacaq, Yerə nəhəng meteorit və ya asteroid düşəcək, ulduz partlayışları baş verəcək, vulkanlar püskürəcək, Günəşdəki fırtınaların təsiri ilə Yer planetinin mantiya qatında maye halda olan metal hərəkətə gələcək və bu da Yerin maqnit qütblərinin yerinin dəyişməsinə, zəlzələlərə, sunamilərə, daşqınlara səbəb olacaq və daha nələr, nələr...
Guya, dekabrın 21-də planetlərin paradı adlanan astronomik hadisə (göydə planetlər və günəş bir xətt boyunca düzüləcək) dünyanın sonunu gətirəcək.
Etiraf etmək lazımdır ki, insanlar arasında xof, kütləvi ümidsizlik yaradan və bununla da onları dünyanın sonu olacağına inandıran qüvvələr yaranmış situasiyalardan öz məqsədləri naminə sui-istifadə etməkdədirlər. Qiyamət günü - dünyanın nə vaxtsa dağılacağı haqda tarixdən üzü bəri dini kitablar, məşhur astroloqlar, falabaxanlar dəfələrlə bəşəriyyətə xəbərdarlıq ediblər. Bu dəhşətli sonluqla bağlı verilmiş proqnozlardakı tarixçələrin bir çoxu artıq keçmişdə qalıb. Təbii ki, reallaşmamış şəkildə. İndi də 21 dekabr 2012-ci illə bağlı proqnozun geridə qalmasına sayılı günlər qalır...
21 dekabr 2012-ci il tarixi - “qiyamət günü” ilə insanlarda xof yaradan bəzi qüvvələr mayyalıların təqvimini əllərində bayraq ediblər. Axı 21 dekabr 2012-ci il tarixində Mayya təqviminin başa çatacağı uzun illərdən bəri bəlli idi. Niyə son illərədək bu barədə iddialar indiki kimi qabardılmırdı? Bəs adlarından sui-istifadə edilən mayyalılar kim olublar, hazırda harada yaşayırlar? Doğrudanmı onlar 21 dekabr 2012-ci il tarixini qiyamət günü hesab edirlər?
Mayya - indiki Meksikanın cənubu və Mərkəzi Amerikanın şimal ərazilərində mövcud olmuş sivilizasiya – insan məskəni olub. Bu böyük mədəniyyətin sərhədləri içərisində hazırda Qvatemala, Beliz, Salvador və Honduras dövlətləri yerləşir. Mayalılar tarixdə mükəmməl əlifbası, incəsənəti, arxitekturası, riyaziyyatı və astronomik sistemi ilə tanınır. Maya sivilizasiyası təqribən e.ə. 2000-ci ildən 250-ci ilə qədər mövcud olub. Şəhərləri təqribən 250-ci ildən 900-cü illərə qədər inkişafın yüksək səviyyəsinə çatıb. XVI əsrdə ispan kolonistlərinin gəlişinə qədər fəaliyyət göstərib.
Mayya xalqları daş binalar tikirdilər, onların bir hissəsi indiyə qədər istifadə edilməkdədir. Onlar tərəfindən tərtib edilmiş təqvimdən Mərkəzi Amerikadakı digər xalqlar da istifadə edirdilər. Mayyalıların heroqlif sistemli əlifbaları, səmərəli əkinçilik sistemləri, astronomiyaya dair dərin bilikləri olub.
Qədim mayyalıların kötücələri tək indiki mayya xalqları yox, həmçinin Meksika, Qvatemala, Honduras ölkələrində əhаlinin əsaslı bir hissəsini təşkil edirlər. Mayyalıların bir sıra yaşayış məskənləri YUNESCO-nun ümumdünya irsi siyahısına salınıb. Mayya mədəniyyətinin XX əsrin 80-ci illərinə qədər 1000 yaşayış məskəni tapılıb.Mərkəzi Amerika hinduları kimi, mayya xalqında da qan çox böyük önəm kəsb edirmiş. Bizim günlərə kimi çatmış bir çox keramik əşyalarda qanburaxma mistik rituallarını görmək olar. Dodaqlarını, dilini, penisini, qollarını deşməklə onlar yığılan qanı ritual qablara doldururdular. Mayya inanclarına görə, qan insan enerjisinin mənbəyi və insanın ruhunun simvolu sayılırdı. Mayya dini politeistikdir. Yəni mayya panteonunda olan allahlar, yaşama müddəti orta insan yaşam müddəti ilə eynidir. Bunun üçün insanın qurban verilməsi, mayyalılar üçün bir cür allahların yaşama müddətinin uzadılması ilə əlaqələnə bilər. İnsanın allahlara qurban verilməsi fərqli formada həyata keçirilirdi - suda boğma, vulkanik daşdan hazırlanmış iti bıçaqlarla sinədə kəsik edərək "döyünən ürəyin" çıxarılması, senot adlanan böyük kəhrizlərə atma və s.
Hazırda Yukatan yarımadasında, Belizdə, Qvatemalada və Hondurasda 6,1 milyondan çox mayyalı yaşayır. Mayyalıların hazırki dinləri katolik dini ilə ənənəvi mayya dininin sintezi şəklində qurulub. Yukatan yarımadasında yaşayan mayya xalqlarının bölgəyə görə fərqli geyim tərzi var.
Hazırda Mərkəzi Amerikadakı mayyalıların özləri, mayya irsini öyrənən alimlərin dediyinə görə, 21 dekabr 2012-ci il təqviminin sonunu dünyanın sonu kimi qəbul etmirlər. Mayya inancına görə, bu sadəcə bir astronomik dövrün, eranın sonu olacaq. Mayyalılar deyirlər ki, təxminən hər 5 min ildən bir insanlıq tarixində bir dövr bitir, yenisi başlayır. 21 dekabr 2012-ci il tarixindən sonra da yeni bir dövr başlayacaq.
İslam üləmaları bütün bu iddiaları rədd etməkdədirlər. Onlar bildirilər ki, müqəddəs “Qurani-Kərim”də qiyamət günü barəsində məlumat verilməyib və bunu Allahdan başqa, heç kəs, hətta peyğəmbərlər də bilməyib, bilmir...

A.Qorxmaz