Qazax Müəllimlər İnstitutunda baş verən qanunsuzluqların izi ilə

Əslində bu cür yazıların mətbuat səhifələrində, xüsusi ilə də “Gündəm Xəbər” qəzetində tez-tez işıq üzü görməsinin səbəkarı Azərbaycan Müəllimlər İnstitutunun Qazax Filialında sabiq direktor işləmiş İsa Veysovun vaxtında aldadılmış valideynlərdir. Həmin valideynlər ki, dişi və dırnağı ilə qəpik-qəpik qazandığı pulları adi bir direktorun fitvasına gedərək havaya sovurmuşlar.
Məsələ burasıdır ki, aldadılan insanların 80%-i kasıb təbəqədir. Onların əksəriyyəti İsa Veysova verdiyi pulu ya kredit götürmüş, ya da sələmə girmişdir. Yaxşı yadımızdadır ki, bir filial direktoru həmin illər nələrlə məşğul olmurdu. Yəni, bir neçə bahalı minik avtomobilləri, Bakıda evlər, torpaq sahələri, bağ-bağça yerləri, o cümlədən böyük yük maşınlarına kimi alaraq özünə və gələcəyinə yaxşı var-dövlət toplamışdı. Kişiyə yaxın düşmək olmurdu. Son zamanlar isə qarşısındakını açıqca məsxərəyə qoymağı da xoşlayırdı. Bəs indi?
Təhsil nazirliyində aparılan kadr dəyişikliyi “İsa məktəbi”ni alt-üst etdi. Yəni əvvəlcə ümidi var idi ki, yaşadığı Qazax rayonunun Daş Salahlı kəndindəki evinin qapısını döyənləri başından kənarlaşdırmaq üçün onların saxta diplomlarını tanışlarının əıli ilə alıb verəcək. İsa müəllim üçün təəssüflər ki, hər şey tərsinə oldu. Özü və filialda çalışan digər müəllimlərin saxta diplom oyunları bir yana, həmin işlə İsa Veysovun oğlu Veys Veysov da məşğul olurmuş. Ağstafa Rayon Polis Şöbəsində mayor rütbəsi ilə əməliyyat müvəkkili vəzifəsində işləyən Veys bu işin sirf ara adamlarından imiş. Onun polis orqanında çalışdığı tez bir zamanda mayor rütbəsinə yüksəlməsi, görəsən hansı xidmətlərindən irəli gəlib? Təxminən 10 gün olar ki, adının çəkilməsini istəməyən bir nəfər polis əməkdaşı onu da bildirdi ki, “Veyslə Ağstafa RPŞ-nin həyətində bir neçə polis işçisi az qala əlbəyaxa olmuşdular. Onlar da diplom almaq üçün Veysə verdikləri müxtəlif məbləğdə pullarını geri istəyirdilər. Veys o qədər çaşdı ki, bahalı minik maşınını oradaca 5000 manata satıb, ondan pullarını tələb edən əməkdaşlarına az da olsa payladı”. Vəzifəsindən sui- istifadə edən polis işçisinin hansı asayişi qorumasından söhbət gedər? – Sualına isə o, belə cavab verdi: “ Veysin haqqında nazirliyə təqdimat göndərilib. Yəqin ki, cənab nazir sözünü deyəcəkdir”. Məsələ burasıdır ki, İsa Veysovun yerini bilən yoxdur. Oğlu Veys də hələ ki, əməliyyat müvəkkilidir. Millət də İsa müəllimi axtarır. Yaxşı olardı ki, Veys öz atasını tapıb diplom üçün aldanmış valideynlərə təhvil verə. Sabiq direktorun kənddəki qonşularının söylədiyinə görə, onun qapısını döyənlərin əılindən lap təngə gəliblər. Qonşular evlərində rahatlıq tapmadıqlarından, Veysovun dəmir darvazasının gecə-gündüz döyülməsindən yaranan səs-küydən şıkayətlənirlər.
Aldanmış valideynlərin artıq səbr kasası dolmuşdur. Onlar İsa Veysov haqqında müvafiq orqanlara yazılı şikayət edib onu həps etdiməkdənsə pullarını geri almağı daha üstün tuturlar. O da dosent İsa Veysovu tapsalar… Onu da qeyd edək ki, İsa Veysov “saxta diplom əməliyyatını” təhsil nazirliyində oturan bir neçə nəfərlə aparırmış. Qəzetin ötən saylarından birində göstərdiyimiz kimi Azərbaycan Müəllimlər İnstitutunun Gəncə Filialının direktoru, akademik Ramiz Məmmədovun İsa Veysovla “iş birliyi”nə gəldikdə isə, əməkdaşımızın bu məsələ ilə bağlı apardığı araşdırma heç bir nəticə verməmişdir. Görünür, bu səhvən verilən məlumat mövzunu məqsəddən uzaqlaşdırmaq məqsədi daşıyırmış.
Sözügedən və hələ ki, həllini tapmayan bu məsələ ilə əlaqədar tanıdığımız mənbəədən daxil olan məlumata əsasən, tezliklə İsa Veysovun Qazağa üz tutması da gözlənilir. Hər an onu görmək arzusu ilə yaşayan aldanmış valideynlər təbii ki, əlləri ilə verdikləri pulun sorağındadırlar. Diplom üçün götürdükləri sələm və krediti qaytara bilməyənlərin ümidi yalnız İsa Veysovun satdığa qoyduğu əmlakadır.
lham Hacalı