Cəlilabadda Qarabağ əlilinə qarşı inanılmaz ədalətsizlik

gundemxeber.az Cəlilabad rayonundan redaksiyamıza şikayətlər gəlməkdə davam edir. Bu günə qədər rayonla bağlı onlarla şikayət xarakterli yazı yazsaq da, buradakı məmur özbaşınalığı bitmək bilmir. Bu dəfəki şikayət isə rayonun Alqasımlı kənd sakini, Qarabağ müharibəsi döyüşlərində sağlamlığını itirərək, əlil olmuş Ağayev Mehdi Kamil oğlu tərəfindən göndərilib.
Şikayətçi M.Ağayev məktubunda bildirir ki, 1993-cü ilin yanvar ayında Qarabağ müharibəsinin qızğın çağında hərbi xidmətə gedib. 3 gün “Nasosnu”da qaldıqdan sonra Qusar rayonuna aparılıb və oradakı hərbi hissələrdən birinə yerləşdirilib: “Təxminən 1 ay qaldıqdan sonra bizi Ağdərə istiqamətində gedən döyüşlərə apardılar. Komandirimiz Anarın rəhbərliyi altında vətən uğrunda döyüşlərdə iştirak etdik. Anar döyüş zamanı qəhrəmanlıqla həlak oldu”.
M.Ağayev bildirir ki, o 1993-cü il aprel ayının 12-də döyüş zamanı sağ budundan güllə yarası alıb. Həkimlərin köməkliyi ilə Tərtər rayon hospitalında tibbi yardım göstərildikdən sonra vertalyotla Bakı şəhərinə gətirilib və Sabunçuda Əziz Əliyev adına xəstəxanada 1 ay qalaraq, müalicə alıb. Daha sonra isə onu ordudan tərxis etmək üçün 145 nömrəli poliklinikaya göndəriblər . Tərxis olunan zaman 10 min manat yardım verilib: “Cəlilabad hərbi komissarlığında qeydiyyata düşdükdən sonra burda da mənə 20 min manat qanpulu verdilər”.
Qarabağ əlili M.Ağayevin daha sonra yazdıqları isə bu ölkədə bir əsgərə, vətən yolunda canını qoyan bir qəhrəmana verilən qiyməti ortaya qoyur: “Hörmətli redaksiya, mən vətən uğrunda canımı qoymuşam. Qarabağ veteranı kimi hər ay cəmi 95 manat pensiya və üstəgəl, 50 manat prezident təqaüdü alıram. Bircə istəyim veteran vəsiqəmin verilməsidir”.
M.Ağayev deyir ki, dəfələrlə dövlət orqanlarına müraciət etdikdən sonra sənədləri MN-nin Mərkəzi Arxivinə göndərilib: Ordan göndərilmiş çıxarışda göstərilir ki, mənə sıravi əsgər rütbəsi verilib və kursant təyin olunmuşam. Qazaxdakı hərbi hissənin şəxsi heyətinin əlifba qeydiyyatı kitabından çıxarışda Goran təlim mərkəzində hərbi xidmət keçməyim də göstərilib. Lakin bildirilir ki, təlim mərkəzindən döyüş zonasına göndərilən zaman “əmrə adlı siyahı əlavə olunmadığı üçün sizin adınızın həmin siyahıda olmasını əmr üzrə təsdiq edə bilmirik”.
M.Ağayevin daha sonrakı sözləri isə onun haqlı üsyanını göstərir: “Qolumuzdan tutub zorla döyüşə göndəriblər, indi də deyirlər göndərəndə siyahı tutmamışıq, odur ki, adını dəqiq tapa bilmirik. Yəqin ki, hərbi hissədən qaçıb döyüşə getməsəydim mənim haqqımda cinayət işi açılardı”.
Şikayətçi onu da bildirir ki, xidməti zamanında sonadək döyüşüb. O deyir ki, hərbi hissədə onun adının siyahıda olmadığını deyən şəxslər yeyib yatanda o, ağır döyüşlərdə olub: “Görünür, səhv etmişəm, yoxsa mənimlə bu formada əylənməzdilər. Qəribə məntiqdir: briqada döyüşə yollanıb, amma adlı siyahı çıxarmamışıq. Döyüşərək, torpaqlarımızı qoruyurduq. Mən vətən müharibəsində iştirak etmiş döyüşçü kimi tələb edirəm ki, mənim veteran vəsiqəmi heç bir nomenklatur süründürməçilik olmadan özümə qaytarın”.