AzNews.az xəbər verir ki, bu yaxınlarda axar.az Dövlət xəstəxanalarında rüşvət alma halı ilə bağlı şikayətlər əsasında “Eksperimental xəstəxanada rüşvət tüğyanı" adlı reportaj hazırlamışdı.

Xəstəxanada müayinə və analizlər üçün pul tələb edilməsi faktı aşkarlanmışdı.

Orada olan xəstələr də həkimlərin pul istədiklərini təsdiqləmişdilər. Onlar bildirmişdi ki, pulsuz heç bir xidmətdən yararlana bilmirlər. "Ən xırda müayinədən qan təhlilinə qədər, hər şeyin öz qiyməti olur", deyə xəstələr qeyd edib.

Məsələ ilə bağlı Səhiyyə Nazirliyinin mətbuat xidməti ilə əlaqə saxlanılıb.

Vətəndaş rüşvət verməsin


Mətbuat xidmətinin əməkdaşı Səbahət Əhmədova bu kimi halların son vaxtlar çox az olduğunu bildirib və vətəndaşların özlərini aktiv olmağa səsləyib:

“Vətəndaş rüşvət verməməlidir. Əgər belə hallara rast gələrsə, qaynar xəttlə əlaqə saxlamalıdır. Qaynar xəttə məlumat daxil olandan sonra bu məlumat öz təsdiqini taparsa, o zaman bu barədə ölçü götürülür. İşdə rüşvət alan həkimi işdən çıxartmaqdan cinayət işinin açılmasına qədər, müxtəlif cəzalar gözləyir. Daha yaxşı olar ki, siz bu barədə Səhiyyə Nazirliyinin “Qaynar xətt”i ilə əlaqə saxlayasınız. Çünki bu cür halların qeydə alınması və araşdırılması ilə məşğul olan qurum odur”.

“Qaynar xətt”ə zəng

“Qaynar xətt”ə zəng edərək xəstəxanadakı rüşvətxorluqla bağlı məlumat verilib. Xəstəxanaya nə vaxt getdiyimizi, hansı həkimə müraciət olunduğu soruşulub. Topçubaşov adına Elmi Cərrahiyyə Mərkəzinin baş həkimi ilə əlaqə saxladıqdan sonra gün ərzində məlumatlandıracaqlarını deyiblər.

Bütün günü, hətta daha 3 gün gözlənilsə də, heç bir cavab gəlməyib.

Baş Prokurorluğun laqeydliyi


Baş Prokurorluğun mətbuat xidmətindən isə məsələyə heç bir rəy bildirmək istəməyiblər və Səhiyyə Naziriyinin mətbuat xidməti ilə əlaqə saxlanılmasını, bu məsələnin onların səlahiyyətinə aid olduğunu söyləyiblər.

İndi bildinizmi ki, niyə dövlət xəstəxanalarında rüşvət tüğyan edir?

P.S. Yeri gəlmişkən, axar.az ötən yazıda Baş həkimin faktı inkar etdiyini və bizi qovduğunu yazmışdı. Həmin danışıqlardan olan səs yazısını sizlərə təqdim edirik
My Webpage
My Webpage