Azərbaycanın bütövlüyü uğrunda canlarından keçmiş şəhidlərin ailələri, müharibə zamanı əlil olmuş şəxslər 2010-cu ildən bu günə qədər hərbi qulluqçu olduqlarına görə ödənilməli olan dövlət və icbari sığorta ödənişlərini ala bilmirlər. Bu haqda redaksiyamıza “Şəhid ailələrinə Sosial Dəstək” İctimai Birliyinin sədri Almaz Zeynalova məlumat verib. O bildirib ki, məsələ ilə bağlı şəhid ailələri müvafiq qurumlara müraciət ediblər. Həmin qurumlardan onlara bildirilib ki, 1 sentyabr 2000-ci il tarixinədək qüvvədə olan Mülki Məcəllənin 73-cü maddəsinə əsasən hüququ pozulmuş şəxsin iddiası üzrə onun hüquqlarının müdafiə etmək üçün ümumi müddət (iddia müddəti) üç il müəyyən edilib.

Qeyd edilən hal mülki qanunvericiliyin tələblərinə görə sığorta ödənişinin verilməsindən imtina edilməsi üçün əsasdır. İddia müddəti üçün nəzərdə tutulan üç il keçdiyinə görə sığorta ödənişinin verilməsi qeyri-mümkündür. Şəhid ailələri buna etiraz olaraq məhkəməyə müraciət ediblər. Azərbaycan məhkəmələri bu kateqoriyadan olan vətəndaşların iddialarını haqlı sayaraq, qanunla ödənilməli olan məbləği dövlət, icbari sığorta ödənişinin verilməsi vəzifəsinə cavabdeh Dövlət Sığorta Şirkəti “Azərsığorta”nın üzərinə qoyub. 2012-ci ildən bəri, 42 məhkəmə qərarı “Azərsığorta” tərəfindən icra olunub. 25 oktyabr 2013-cü il tarixində Azərbaycan Respublikası Konstitusiya Məhkəməsində Fərhad Abdullayevin sədrliyi ilə Ali Məhkəmənin sorğusu əsasında “Hərbi qulluqçuların dövlət icbari şəxsi sığortası haqqında” Azərbaycan Respublikası Qanununun bəzi müddəalarının şərh olunması üçün növbəti xüsusi konstitusiya icraatı qaydası iclası keçirilib. Artıq bir aydan çox vaxt keçməsinə baxmayaraq, məlum qərar elan olunmur. Bu da yüzlərlə şəhid ailələrini və Qarabağ müharibəsi əlillərinin ciddi narazılığına səbəb olub. İlk əvvəl qərarın iclas keçirildiyi gündən sonra bir ay ərzində elan olunacağı bildirilsə də, sonradan bu qərarın açıqlanmasının 2-3 ay çəkəcəyi də bildirildi. Şəhid ailələri buna etiraz olaraq dekabrın 5-də saat 12-00-da Konstitusiya Məhkəməsinin qarşısında yerləşən parkda piket keçiriləcəklərini bildiriblər. Şikayətçilər piket keçirilməsi ilə bağlı noyabrın 29-da Bakı Şəhər İcra Hakimiyyətinə məktub təqdim ediblər.