“Binamızın kanalizasiyası yoxdur, su gəlmir, Nəqliyyat Nazirliyinin qoyduğu dayanacağı gecə aparıblar”. Bu gün Reportyorların Azadlıq və Təhlükəsizlik İnstitutunda Qarabağ əlili, jurnalist Məğrur Bədəlsoyun təşkilatçılığı ilə mətbuat konfransı keçirilib.

Tədbir Qarabağ əlillərinə verilən güzəştlərin mənimsənilməsi, “Həyat” ticarət mərkəzi və Nabrandakı əlillərin istirahət kompleksinin məmurlar tərəfindən özəlləşdirilməsinə etiraz məqsədi daşıyırdı.

Virtualaz.org-un verdiyi məlumata görə, tədbirdə çıxış edən M.Bədəlsoy Qarabağ əlilləri adından danışaraq onlara qarşı edilən haqsızlıqları, üzləşdikləri çətinlikləri, şəhərin mərkəzində tikilmiş “Əlillər evi”ndə yaşayan əlillərin problemlərini mətbuatın diqqətinə çatdırdı.

M.Bədəlsoy Qarabağ əlilləri və şəhid ailələrinə verilən güzəştlərin mənimsənildiyini, mülkiyyət, sosial təminat və yaşamaq hüquqlarının məmurlar tərəfindən tapdandığını bildirdi.

Əlillər üçün tikilən “Həyat” ticarət mərkəzi və Nabrandakı əlillərin istirahət kompleksinin əlillərə deyil, ayrı-ayrı məmurlara xidmət etdiyini deyən M.Bədəlsoy əlillər üçün nəzərdə tutulan sanatoriya-kurort yollayışlarının, sığorta ödənişlərinin və digər sosial-tibbi prosedurların həyata keçirilmədiyini vurğuladı.

Mətbuat konfransında şəhərin mərkəzində - Nərimanov rayonu, Əhməd Rəcəbli küçəsi, 46 ünvanında yerləşən “Əlillər evi”nin bərbad vəziyyəti, əlil və şəhid ailələrinin acınacaqlı yaşayış şəraiti və onlar üçün ayrılan ərazilərin dəbdəbəli villa tikdirən məmurlar tərəfindən zəbt edilməsi ilə bağlı şikayətlər səsləndirildi.

Şikaytəçilər binanın hər tərəfdən hasara alındığını, məmurların kommersiya maraqları naminə zəbt edilərək istifadə edildiyini bildirdilər: “Binanın həyətinə giriş mümkün deyil. Binanın hər tərəfi hasara alınıb, kanalizasiya sistemi yoxdur, binaya su gəlmir, qaz 5 il sonra çəkilib. Qazı da tez-tez kəsirlər. Binanım qarşısında piyada yolu və keçid yoxdur. Nəqliyyat Nazirliyi tərəfindən qoyulan dayanacaq isə gecə ilə yoxa çıxıb”.

Əlil və şəhid ailələri Nəqliyyat Nazirliyinə, Bakı Şəhər İcra Hakimiyyətinə, Nazirlər Kabinetinə dəfələrlə şikayətlər etsələr də onların problemlərinə əlac edənlərin tapılmadığını deyirlər. Şikayətçilərin məmurlar tərəfindən təzyiqlərə məruz qaldığını deyən “Əlillər evi”nin sakinləri polisə, ombudsmana müraciət etsələr də oradan da “biz heç nə edə bilmərik” cavabını aldıqlarını söylədilər.

Şikayət etməkdən və yaşayış vəziyyətindən artıq bezdiklərini deyən şəhid ailələri və Qarabağ əlilləri fevralın 8-də etiraz aksiyası keçirəcəklərini də söylədilər.