Gəncə şəhər İcra Hakimiyyətinin başçısı Elmar Vəliyev gəncəlilər sevindirmək niyyətindədir.
Azərbaycanın ikinci ən böyük şəhəri olan Gəncənin 2016-cı ilin “Avropa gənclər paytaxtı” seçilməsindən sonra E.Vəliyev bu qələbəni xüsusi qeyd etmək qərarına gəlib.

İcra başçısı bu münasibətlə möhtəşəm konsert proqramının keçirilməsini tapşırıb və konsertdə iştirak edə biləcək popuylar müğənnilərin arasında seçim etməyi gənclərin öhdəsinə buraxıb.

Bunun üçün də icra başçısı tapşırıq verib ki, gənclər hansı dünya ulduzunu Gəncədə görmək istəyirsə, o müğənni şəhərə gətiriləcək.

Hazırda bu məqsədlə facebookda sorğu keçirilir ki, gənclər hansı ulduzun Azərbaycana gətirilməsini istəyir?

“Əziz gənclər, hamımıza yaxşı məlumdur ki, Gəncə şəhəri Avropanın Gənclər paytaxtı seçilərək tarixi qələbəyə imza atıb. Bu münasibətlə Gəncədə möhtəşəm tədbirlər keçiriləcək.
Qalibiyyətin sahibi siz gənclər olduğunuz üçün, sizin aranızda belə bir sorğu keçirtmək qərarına gəldik. Gəncədə bu qələbə münasibəti ilə konsert keçirtsək, hansı dünya şöhrətli mügənnini Gəncədə görmək istərdiniz? (fikirləriniz önəmlidir, fəal olun!)”-deyə sosial şəbəkədə paytaxt sakinləri arasında sorğu keçirilir.

Səsvermədən sonra ən çox səs toplayan müğənni Gəncədə təşkil olunan konsert proqramında iştirak edəcək.

Qeyd edək ki, Gəncəyə gətiriləcək məşhurlar sırasında Şakira, Rihanna, Cenfer Lopez və tanınmış türk müğənnilərinin adı çəkilir.