“İmişlidəki parkları məmur nəfsindən xilas edin...”

“Gündəm xəbər” qəzetinin redaksiyasına İmişli şəhər Həsənoğlu küçəsi 14 saylı evin sakini Həsənov Əlimuxtar Albaba oğlu tərəfindən Azərbaycan Respublikasının Prezidenti İlham Əliyev cənablarına və Əmək və əhalinin sosial müdafiəsi naziri Səlim Müslümova ünvanlanmış şikayət ərizəsi daxil olub. Həmin ərizəni olduğu kimi diqqətinizə çatdırırıq:

“Cənab Prezident! Ötən həftə Sizə ƏƏSMM və imişli TSEK rəislərinin qəflətən təzə nazir tərəfindən dəyişdirilmə səbəblərindən yazmış, şikayət etmişdim. ƏƏSMM İmişli şöbəsində iyun 2012-ci il korrupsiya idarəsinin apardığı həbslər və bir il altı ay ərzində 3 rəis dəyişdirilməsinin səbəbi çox uzundur. Keçmiş nazir F.Ələkbərov və keçmiş başçı Ə.Ağayev 1980-cı illərdə İmişlidə Böyük Vətən Müharibəsi iştirakçılarının adına salınmış Qələbə parkı və 1992-ci ildən Şəhidlər Xiyabanına çevrilən parkın ərazisini ƏƏSMM İmişli şöbəsi üçün tikinti meydanına çevirdilər.
Həmin xiyabanın salınmasında İmişli RİK şəhər sovetinin deputatı və tikinti briqadiri kimi mənim də ciddi əməyim olub. İmişlidə o vaxt salınmış Qələbə parkı və M.Ə.Sabir adına park MRX qarşısında salınmış park eləcə də indiki H.Əliyev parkı o vaxtkı birinci katib məşhur H.Əliyevçi Qadir İsmayılzadənin təşəbbüsü ilə salınmış parkların salınmasında, tikilməsində, ağacların gətirilib əkilməsində mənim əvəzedilməz əməyim olub. Bütün parkların əraziləri artıq satılıb. Çoxsaylı şikayətlər olsa da səsimiz yuxarı orqanlara çatmasa da ötən il nəticəsi bu oldu ki, ümummilli lider H.Əliyevin adına olan parka da sayğısızlıq edildi. Parkın ərazisində otel və şadlıq sarayı tikildi. H.Əliyevin adına olan parkda yalnız postamentin ətrafı parka aid qalıb.
Aprel 2008-ci il bizə, keçmiş veteran Qarabağ Müharibəsi iştirakçılarına 1993-cü ildən H.Əliyevin çağırışı ilə Rusiya vətəndaşı kimi İmişliyə qayıdıb İmişli-Beyləqan Batalyonunu təsis edən komandiri kimi vuruşan QAT İmişli RT-nın sədri Rafael Aslanov, H.Şirinova və onların əsgərləri etiraz etdik. 05 may 2008-ci il səhər saat 10-da “Şəhidlər Xiyabanına” yığıldıq, başçı Ə.Ağayev polisləri ora tökdürdü. Bizi polis rəhbərliyi qəbul etdi. Deputatlar S.Rüstəmxanlı, F.Mustafa, F.Ağamalıoğlu, İ.Əkbərli və Ə.Əhmədov bizə ciddi dəstək verdilər. Eləcə də Akif Nağı və jurnalistlər dəfələrlə İmişliyə gəlib bizə ciddi dəstək verdilər. Amma İmişli rəhbərliyi bizi ciddi təqib etdirtdi. H.Şirinova 15 gün həbs, mən hepatit “B” virusuna yoluxdum, komandir Rafael Aslanov isə xəstəliyi düçar olub dünyasını dəyişdi. Bizi təqib etdirənlər, edənləri Allah və siz cəzalandırdınız. Ciddi cəhdimizə baxmayaraq Şəhidlər Xiyabanında ƏƏSMM idarəsi tikildi. Həmin idarədə xeyir bərəkət olmadı. Şəhid ruhlarının ağladığı yerdə Nazir F.Ələkbərovun şıdırğı alveri getdi. Naziri və Başçını da şəhid ruhları tutdu. Həmin idarədə artıq 2 il ərzində 4 rəis dəyişib idarəyə mələyi və Allahın sevimlisini gətirib qoysaydılar da yenə də aqibəti yaxşı ola bilməzdi. Əvvəlki rəis N.Xəlilovla 3 nəfəri korrupsiya idarəsi həbs etdi. digərlərinə isə cinayət işi ayrıldı. S.Müslümovun çıxardığı rəis isə Prezident Yanında Ali İdarəetmə Akademiyasını bitirmiş gənc kadr Barat Xəlilov idi ki, 7 ay işlədi. S.Müslümov onun yerinə həmin idarədə 2002-ci ildən korrupsiya idarəsi həbslər apararkən baş mühasib olmuş Könül Cavadovanı təyin etməsi mənə qəribə gəlir.
Nədənsə həmin həbslər zamanı baş mühasib K.Cavadova və müavin Feyruz Lazımov sudan quru çıxdılar. Hər ikisinin otağından AZ. TV yardım kartlarının tapılması göstərilsə də hər ikisi vəzifədə qalıb işlədi. K.Cavadovanı isə Səlim Müslümovun tələbə yoldaşı və hal-hazırda DSMF-də yüksək post tutan Şakir Nuriyevin gözə-görünməz təqdimatı ilə təyin edilib ki, onun bibisi qızı idi. K.Cavadovanın qardaşı Akif Cavadov isə qatı müxalifətçi və anti Heydərəliyevçi olub. Prezident seçkiləri günü DSK İmişli şöbə sədri Sabitin yanında sizin əleyhinizə danışanda ona sərt cavab vermişəm. Mən 05.05.2008-ci ildə təqib olunanda həmin idarədə o vaxtda şıdırğı alver gedirdi. Necə olur ki, H.Əliyevin çağırışı ilə döyüşə atılan vətəni qoruyanlar həbs olunsun, əlehidarları isə İmişlidə parkları zəbt etsin, xiyabanları dağıdıb idarə salsınlar, idarə rəisləri olsunlar.
Səlim Müslümovada etirazımı bildirirəm. Görün, o kimi-kimlə əvəz edir. Cinayət etmiş baş mühasibi rəis təyin edib. İmişlidə hal-hazırda alqı-satqı obyektləri olan parkları H.Əliyevin təşəbbüsü ilə salmışıq. Zəhmətkeşlərinin biri isə mən olmuşam. Sizdən xahiş edirəm qaldırdığım məsələlər aidiyyəti orqanlar tərəfindən araşdırılsın. Sizin sərəncamınızı saymayan Nazir F.Ələkbərovun başçı Ə.Ağayevin aqibəti gec də olsa da digərlərinə hələ çatmayıb. Çatmayanlar unudur ki, mənim kimi dövlətini, xalqını sevənlərin təqibinə yol vermək olar. Əzmək həbs etmək olar. Prezidentin Sərəncam və Fərmanlarına xor baxmağın aqibəti çox pis ola bilər barama qurduna dönə bilər”.

Şahin