İmişli sakini çıxılmaz duruma düşüb

Redaksiyamıza Əmək və Əhalinin Sosial Müdafiə naziri Səlim Müslümova ünvanlanmış şikayət məktubu daxil olub. İmişli rayonu Yalavac kənd sakini Tarıverdiyev Elçin İrəvan oğlu tərəfindən ünvanlanan müraciəti olduğu kimi təqdim edirik. Qeyd edək ki, müraciətin bir nüsxəsi də dövlət başçısı İlham Əliyevə ünvanlanıb.
- Möhtərəm prezident! İki azyaşlı övladımla 120 manat sosial yardım alırdım. Novruz bayramı ərəfəsi ƏƏSMN-nin İmişli şöbəsinin rəisi Anar Əliyevin imzası ilə mənə məktub gəldi ki, aldığınız 960 manat pulu geri qaytarın, sizin ayağınızda avtomobil olduğunu gizlətmisiniz. Mən şoka düşdüm. Mənim evimin dəyəri 600 manat deyil, axı mən qapı-qapı düşüb dilənərək o pulu qaytarmaq gücündə deyiləm. Bu məktub mənə və ailəmə qəsd və zülm etmək deməkdir. Mənə sosial yardımı təyin edən komissiya həyətimdə içərisində toyuq yumurtlayan 1990-cı il buraxılışlı istifadəmdə olmayan lakin, ehtibarnamə ilə avtomaşını idarə etməyimə icazə verən sənəd olub və həmin komissiya xarab maşını həyətimizdə görüb. Anar Əliyev isə təzə qanun qoyur. Mən həmin sənədi ləğv etmək gücündə olmamışam və ona görə də pulu geri qaytarmalıyam. Sosial yardımı dövlət verir. Həmin idarənin komissiya üzvləri tərəfindən yoxlama təyin edilərkən müəyyən faktlar ortaya çıxarkən məhkəməyə müraciət etməli idilər, yoxsa bayram günlərində biz və bizim kimiləri bir damın altında ailə və uşaqlarımızdan xəcalətli etməməli idilər. Mənə ən çox təsir edən bu əziz bayram günlərində dilsiz-ağızssız həyət itimizin gecəni sabaha qədər zingildəməsi oldu. Ehtiyac bizi o qədər sıxmışdı ki, it yadımızdan çıxmışdı. İti açıb buraxdım. “Mən nəinki övladlarıma, eləcə də sənə sahiblik edə bilmədim”. İt də bizim ağır günümüzü başa düşmüşdü. Yekdilliklə səs verdiyimiz prezidentimiz İlham Əliyevin Anar Əliyev yerlisi hesab olunur. Bir din xadimi ona bildirdi ki, heç olmasa prezidentlə yerli olduğunuza görə onun yolunu saxla, camaatı prezidentdən narazı salma və ən aşağası bu sənin idarə rəisi kimi mənəvi borcundur. Sən keçmiş rəhbərlərin yeddi arxadan dönəninə rəhmət oxutdurursan. Zülümkar dəyirmançı məsəlini din xadimi Anar Əliyevə məsəl kimi çəkdi. Atasına rəhmət oxutduran dəyirmançı atasından fərqli olaraq pulu darvazanın ağzında alırmış.
Hörmətli nazir!
Sizin təyin etdiyiniz Anar Əliyev həmin dəyirmançı məsəlidir. Mən Anar Əliyevin qəbulunda oldum. Ona dedim ki, İmişli RİH başçısının qəbulunda olacağam, sizdən şikayət edəcəyəm. Bildirdi ki, buranı mənə düzəltməyə tapşırıblar. Belə çıxır ki, ona tapşırıblar ki, imkansız ailələri tamamilə məhv edin. Anar Əliyev tək məni yox, yüzlərlə ailəni mənim vəziyyətimə salıb. Dəfələrlə şahidi olmuşam. Odur ki, sizdən xahiş edirəm mənim buraxılmayan pullarımı heç bir əsası olmadan saxladan Anar Əliyev barəsində lazımi ölçü götürəsiniz. Mənə verilən sosial yardımı bərpa edəsiniz. Əks təqdirdə bu mənim və ailəmin intiharına səbəb olmaq deməkdir. Biz inanırıq ki, prezidentimiz kimi bizi belə bir qanundan xəbəri olmayan arxalı məmurun zülmündən xilas edəcəksiniz.
ELÇİN