Baş redaktor qalmaqal haqda danışdı: “Media ilə təhdid, təzyiq və şantaj diliylə danışan heç kəs uğur qazanmayıb.”
“Baş vermiş hadisə ilə bağlı Azay Quliyevdən rəsmi açıqlama gözləyirik”
Xəbər verildiyi kimi, bu gün saat 14:00 radələrində QHT-lərə Dövlət Dəstəyi Şurasının qhtxeber.az saytının redaktoru Sənan Nəcəfov və Şuranın muhasibatlığında işləyən Şahin Məhərrəmov “Yeni Cumhuriyyət” qəzetinin redaksiyasına gələrək cumhuriyyet.az saytında yer alan “QHT-lərə səlib yürüşü və Azay Quliyev maxinasiyaları” başlıqlı yazıya (http://cumhuriyyet.az/sonxeber/2848-qht-lere-selib-yurushu-ve-azay-quliyev-maxinasiyalari.html) etirazın bildiriblər. Redaksiyada bu şəxslərə qarşı tərəfin mövqeyini dərc edilə bilinəcəyi deyilsə də, onlar bununla razılaşmayıblar. Şahin Məhərrəmov “Yeni Cumhuriyyət” qəzetinin baş redaktor Nəsimi Şərəfxanlı ilə görüşdə ayağa qalxaraq onun oturduğu masaya yaxınalaşaraq “Bilirsənmi mən kiməm? Bu yazını saytdan çıxartmasan və bir də bizim idarə (ifadə həmin şəxsə məxsusdur-red.) haqda yazsan sənin cavabını küçədə verəcəyik və mənim itirdiyim adam tapılmır. Yazı ilə birgə səni də itirərik” deyərək israrla yazının saytdan çıxarılmasını tələb edib.
Redaksiyada “çağrılmamış qonaqlar”- ın qeyri- etik və təhdid xarakterli hərəkətlərinə dair məlumat cumhuriyyet.az saytında yer aldıqdan sonra həmin şəxslər özlərinə yaxın media qurumlarında hadisənin guya təhrif olunmuş formada təqdim olunduğunu iddia ediblər. Qhtxeber.az saytının redaktoru Sənan Nəcəfov və şuranın mühasiblərindən biri olan Şahin Məhərrəmovun açıqlamalarına münasibət öyrənmək üçün N.Şərəfxanlı ilə əlaqə saxladıq. Savash.org-a açıqlama verən baş redaktor son xəbərləri “oğru elə bağırdı ki…” təəssüratı ilə qəbul etdiyini bildirdi:
“Hər halda o otaqda olan söhbətin bizim üçümüzdən başqa Allah da şahiddir və bu adamlar indi dedikləri ilə redaksiyada verdikləri bəyanat, daha doğrusu Şahin Məhərrəmovun təhdidini özləri öz içlərində bilirlər. Görünür bu insanlar lazım gəlsə Allahlarını da dana bilərlər. Biz Şuranın və onun rəhbərliyinin baş verənlərdən doğurdan peşman olduğunu düşünürdük. Çünki hadisə barədə məlumat sayta qoyulduqdan dərhal sonra QHT Şurasının sədri Azay Quliyev, Səfər Alışarlı mənə telefon açaraq təəssüflərini və üzrxahlığını bildirdilər. Xahiş etdilər ki, məlumatı saytdan götürək, amma bəzilərindən fərqli olaraq biz buna getmədik. Ardınca Şahin Məhərrəmov özü mənə zəng etdi, üzr istədi. Bundan sonra isə barışdırıcılıq üçün adını çəkmək istəmədiyim başqa bir dostumuz zəng etdi. Mən çox təəssüf edirəm ki, insanlar bu cür mövqe tutub, həqiqəti ört- basdır etmək yolunu hadisələri təhrif etməklə şantajda, başqalarına böhtan atmaqda görürlər. Bu adamlar unutmasınlar ki, həqiqətin bir üzü var. Onu da unutmasınlar ki, media ilə təhdid, təzyiq və şantaj diliylə danışan heç kəs uğur qazanmayıb. Baş vermiş hadisə ilə bağlı biz Azay Quliyevdən rəsmi açıqlama gözləyirik, ondan sonra baş vermiş hadisə ilə bağlı qanun çərçivəsində digər addımlarımızı atacayıq”.
Yeri gəlmişkən, onu da bildirək ki, bu gün axşam saatlarında cumhuriyyət.az saytında texniki problemlər yaranıb, sayt haker hücumu nəticəsində dağıdılıb. Sayta giriş mümkün deyil. Bunun səbəbi haqda danışan N.Şərəfxanlı bildirib ki, ən yaxın zamanda problemin həll olunacağına ümid edirik: “Sayt yaradıldıqdan üzü bəri birinci dəfədir dağıdılır, səbəbini bilmirik. Hazırda bu istiqamətdə araşdırmalarımız və saytın bərpa olunması istiqamətində çalışmalarımız davam edir. Ümid edirəm ki, tezliklə saytımızın fəaliyyətini bərpa edəcəyik”