Məktubu göndərən vətəndaş "İrşad“ Telekomun 28 may metro-stansiyası yaxınlığında yerləşən dükanlarından birində qarşısına çıxan xoşagəlməz haldan, yersiz süründürməçilikdən və müştərinin reklamlarla cəlb edilərək, sonda aldadılmasından yazıb.
Məktubu təqdim edirik:

"Bakıda yerləşən və paytaxt sakinlərini öz xidmətləri ilə qane etməyə çalışan İrşad Telekomda bu gün “səbr ölçmə” günü idi. Həftə içi işlədiyimdən və mobil telefon almaq istəyim istirahət gününə təsadüf etdiyindən, “İrşad Telekomun vədedici reklamlarına aldanaraq, mağazaya baş çəkməyi bu günə salası oldum. Şirkətin 28 May metrosunun yaxınlığında yerləşən “Azadlıq prospekti 24” ünvanındakı mağazasına yaxınlaşaraq içəri daxil oldum və hər kəs kimi mən də kredit mütəxəssislərinə yaxınlaşma fürsəti əldə etmək üçün sıra nömrəmi götürüb gözlədim.

Uzun növbədən sonra yaxınlaşıb istəyimi bildirdim. Kredit mütəxəssisləri kreditə verəcəkləri 300 AZN-lik mobil telefonun müqabilində nəslimin və nəcabətimin həyatda qalıb-qalmaması, olan qalan mülkiyyəti, ulu babamdan tutmuş qayınatama qədər, qohumlarımın mülkiyyətinin kimin adına olması, qaz, su, işıq sayğaclarının necə işlədiyi haqqında suallara dəqiq cavab tapmaq həvəsində idilər. Onları qane edəcək cavabı verə bilməyəcəyimi düşünsəydim, nəinki kredit mütəxəssislərinin qarşısında Sovet “KQB”sinin əlinə düşmüş “vətən xaini“ kimi davranılacağıma dözər, heç o mağazanın ətrafından keçməyi belə düşüncəmə yaxın buraxmazdım. Təəssüf ki, yalan vədlərə, reklamlara inanıb bu gün bu yanlışı etdim. Bu mağazada nə az, nə çox, 4 saat vaxt itirərək iş yerimin ünvanını, telefonumu bildirdikdən, qohum-əqrabamın siyahısını yazdıqdan və axşam saat 19:00-da qohumlarımı xəbərdarlıqsız narahat edilməsindən sonra evə əliboş qayıdası oldum. Amma bir məqamı anlamış oldum ki, mağazanın işçiləri bəlkə də rəhbərliyin göstərişlərindən irəli gələn davranış sərgiləyir və bu gün xüsusi olaraq müştərinin səbrini daşırtmaqdan ötrü bir-birilə rəqabətə girmişdilər...

Həsən Babayev, jurnalist”.

Qarşı tərəfin mövqeyini dərc etməyə hazırıq.