Yaxud, zəlzələdən zərər çəkmiş vətəndaşlarımızı kim necə aldadıb?

Bir müddət bundan əvvəl, ölkəmizin şimal rayonlarında baş verən zəlzələnin vurduğu ziyan, bu gün də əksəriyyətin müzakirə etdiyi məsələlərdən birinə çevrilib. Düzdür, sakinlərə dəymiş ziyan ilk vaxtlar dövlət orqanlarının dəstəyi sayəsində kifayət qədər aradan qaldırılsa da, hələ də saysız-hesabsız problemlər həllini gözləməkdə davam edir. İstər rayonun mərkəzi ərazilərində, istərsə də ucqar kəndlərinin yaşayış evlərində və digər tiklilərdə təmir-bərpa işləri aparılarkən, qeyri-dəqiqliyə yol verilməsi, bu gün də hansısa xoşagəlməz olayların əmələ gəlməsinə səbəb olur.
Amma, bu günədək baş verən problemlər nə fövqəladə hadisələr nəticəsində, nə də ki, hakimiyyət orqanlarının səhlənkarlığı sayəsində baş verməyib. Yəni, zəlzələdən sonra yaranmış vəziyyətdən ustalıqla yararlanmağı bacaran elə dələduzlar peyda olur ki, onların atdıqları addımların hər biri öz-özlüyündə böyük bir cinayət əməlinə yol açır. Və onların əməlləri nə qanuna, nə əxlaqa, nə də ki, heç bir normaya sığası məsələ olmur.
Məsələn, bir müddət bundan əvvəl Balakən rayonunun Qaysa kənd sakini Umarpaşayeva Cənnət Mahama qızı, redaksiyamıza ünvanladığı şikayət ərizəsində bildirirdi ki, bizim ailəyə də məxsus yaşayış evi, baş verən zəlzələ nəticəsində ziyan çəkmişdi.Onun məktubunu olduğu kimi dərc edirik:

“Düzdür, evimizin təmiri ilə aidiyyətı dövlət qurumları məşğul olacaqlarına söz versələr də, nədənsə vaxt keçdikcə problemin həlli uzanmağa başladı. Elə hallar da olub ki, yerli hakimiyyət təmsilçilərinin görüşünə gedib, problemlərin mahiyyətini təkrar-təkrar onların diqqətinə də çatdırmışıq. Təəssüflər olsun ki, etdiyimiz cəhdlərin heç bir nəticəsi olmayıb.
Amma, 10 aprel 2013-cü il tarixdə, əslən Tərtər rayonundan olan Zeynalov Vüsal Fazil oğlunun bizim həyətə gələrək, özünü Fövqəladə Hallar Nazirliyinin səllahiyyətli vəzifə sahibi kimi təqdim etməsi, bizdə hansısa inamın əmələ gəlməsinə səbəb oldu. Yəni öz-özlüyümüzdə fikirləşdik ki, deməli hakimiyyət orqanları hələ də bizim problemimizi unutmayıblar. Bizimlə görüşdə V.Zeynalovun ilk söz-söhbət o oldu ki, “mən sizin zonada zəlzələdən zərər çəkmiş hər kəsə kömək edəcəyəm. Bunun üçün kifayət qədər imkanım və geniş əlaqələrim var. O, onu da vurğuladı ki, Fövqəladə Hallar Nazirinin müavini Orucəli müəllim mənim dayımdır” deyərək, bizi əməllicə-başlıca inandıra bildi. Və Zeynalovla görüş zamanı onun mənə ilk təklifi o oldu ki, əgər evinin təmir olunmasını istəyirsənsə bir qədər xərcə düşməli olacaqsan. O, bu yolla məni inandırıb, 4700 manat pulumu bu ad altında ala bildi. Həmin vaxtdan bir müddət keçdikdən sonra, kənddə gəzən söz-söhbətlərdən eşitdim ki, V.Zeynalov 13 nəfəri də belə bir yolla aldada bilib və külli miqdarda pul da mənimsəyib.
Artıq aldadıldığımı başa düşdüm və böyük peşmançalıq hissi də keçirdim. Məcbur oldum ki, 02 iyun 2013-cü il tarixdə Balakən RPŞ-nə yazılı surətdə ərizə ilə müraciət edim. Bu belə də oldu. Şikayət ərizəsi verib tələb qoydum ki, məni və başqalarını aldadaraq dələduzluq əməllərinə qol qoymuş V.Zeynalovun, tutulub lazımınca cəzalandırılması həyata keçirilsin. Düzdür, şikayət verdiyim gündən 6 aydan çox vaxt keçməsinə baxmayaraq, təəssüflər olsun ki, Balakən polisi problemin həllinə bu günədək də nail ola bilməyib”.
Əslində belə bir yanaşma polis əməkdaşlarına olan inamın itməsinə gətirib çıxarır. Axı, Azərbaycan polisi hər zaman çevik, mübariz və qətiyyətli addımları ilə əksəriyyətin inamını qazanıb, hər kəsin güvənc mənbəyinə çevrilib. Bəs belə olan halda səbəb nədir ki,Zaqatala polisi dələduzluq etmiş bir şəxsi həbs edib onu lazımınca cəzalandıra bilmir və yaxud da cəzalandırmaqda maraqlı görünmür.
Dələduzluq etmiş şəxsin yağlı vədlərinə aldanan Cənnət Umarpaşayeva, bu gün polis əməkdaşlarının sayğısız hərəkətlərini gördüyü üçün, məcbur olur ki, KİV nümayəndələrindən dəstək istəsin. O, həm də üzləşdiyi problemin ictimailəşməsini istəyir ki, bəlkə o halda Balakən polisi qəti addım atmaq haqda mütləqi-qərarını verdi. Yoxsa, problemin varlığı elə problem olaraq qalacaq. Udan V.Zeynalov, uduzan isə aldadılan yerli sakinlər olacaq.
Qeyd qəzetmizdə "Dələduzluğun Azadlığı" başlıqı ilə gedən yazıda Zaqatala rayon polis idarəsinin yerinə səhvən Balakən RPİ-nin adı getmişdir.
Balakən rayonunun azsaylı xalqının zərər çəkmiş nümayəndələrinin siyahısını da təqdim edirik:

1. Qurbacova Ziyafət Məhəmməd qızı—Xalatala kəndi, məbləğ 6000 manat AZE N 3333457
2. Umarpaşayeva Cənnət Mahama—Yeni Şərif kəndi, məbləğ 4700 manat AZE N 06214649
3. Borayeva Padimat Bahəddin—Xalatala kəndi, məbləğ 4000 manat AZE N 04466815
4. İsakov Əhmədullah Şaban---Xalatala kəndi, məbləğ 7000 manat AZE N 06214202
5. Həsənova Havva Ramazan---Xalatala kəndi, məbləğ 5000 manat AZE N 13333396
6. Mustafayev Cərullah Şəmsəddin---Yeni Şərif kəndi, məbləğ 6000 manat AZE N 01052663
7. Copsiyev Paşa Ömər---Qaysa kəndi, məbləğ 6000 manat AZE N 07310726
8. Çunayeva Həlimət Ramazan---Qaysa kəndi, məbləğ 8000 manat AZE N 08077605
9. Əlibəyov Məhəmməd Mustafa---Qaysa kəndi, məbləğ 8000 manat AZE N 02753812
10. Tuhumova Cahan Əli---Yeni Şərif kəndi, məbləğ 6000 manat AZE N 04467575
11. Atayeva Gülnaz Mustafa---Şərif kəndi, məbləğ 5000 manat AZE N 06212943
12. Canayeva Gülnarə Rüfət---Yeni Şərif kəndi, məbləğ 7000 manat AZE N 04467019