Sağlamlıq imkanları məhdud olan uşaqlar bu dəfə yol xərcindən də məhrum olublar. Nazirlər Kabinetinin hələ 2001-ci ildə təsdiqlədiyi qərarla hər ay onların valideynlərinə verilən 20 manat yol pulunu 5 aydır ala bilmirlər.

Bu barədə uşaqlardan birinin bibisi Lətafət Məmmədova məlumat verib. Onun sözlərinə görə, qardaşı oğlu Fərid Babayev autizm və digər nevroloji xəstəlikdən əziyyət çəkir:

“Hakimlərin rəyinə əsasən, belə xəstələr evdən ayrılıb bir necə saat məktəbdə və ya başqa bir yerdə ola bilməzlər. Ona görə də valideynləri onları 268 saylı məktəbin xüsusi ev təhsili bölməsinə yazdırıblar. Hazırda 2-ci sinifdə təhsil alan Fəridlə müəllim evdə məşğul olur”.

Evdə təhsil alan xəstə uşaqlara ögey münasibət

Qeyd edək ki, sağlamlıq imkanları məhdud olan uşaqlar üçün paytaxtda bir necə məktəb fəaliyyət göstərir. NK-nən qərarı ilə orada təhsil alan şagirdlərin valideynlərinə uşaqları məktəbə, xəstəxanalara, sağlamlıq mərkəzlərinə aparmaq üçün 20 manat məbləğində kompensasiya müəyyən edib. İndiyədək həmin pulu kart vasitəsilə aldıqlarını deyən L.Məmmədova bu ilin avqust ayından həmin ödənişin dayandırıldığını deyir:
“Bunun səbəbini soruşduqda direktor əvvəlcə bizə dedi ki, kartın vaxtı bitib, gedin dəyişin. Uzun get-gəldən sonra kartı da dəyişdik, lakin pul hələ də köçürülməyib. Uşaqları evdə təhsil alan bütün valideynlər həmin puldan məhrum olublar. Onsuz da məbləği uşağın müalicəsinə sərf olunan xərclərimizlə müqayisədə çox az olan pulun kəsilməsi bizə aydın deyil”.

Qərarı niyə dəyişmək istəyirlər?

Məsələyə aydınlıq gətirmək üçün 268 saylı məktəbin direktoru Seyfəddin Mustafayevlə əlaqə yaratdıq. Problemdən xəbərdar olan direktor sağlamlıq imkanları məhdud olan və evdə təhsil alan uşaqlara verilən yol pulunun 5 aydır dayandırıldığını təsdiqlədi. Əlavə etdi ki, buna səbəb NK-nın sözügedən qərarında yalnız məktəbə gedib-gələn qüsurlu uşaqlar nəzərdə tutulur:
“Sənəddə “xüsusi təhsilə cəlb olunan uşaqlar” ifadəsi qeyd olunur. Lakin ayrıca “evdə təhsil alan uşaqlar” ifadəsi olmadığından hansısa qurum bu pulu dayandırıb. Mən də araşdırma aparmaq üçün Bakı Baş Təhsil İdarəsinə bir neçə dəfə müraciət etmişəm. Hələ ki, bir yenilik yoxdur”.

Bakı Baş Təhsil İradəsindən məsələyə aydınlıq gətirmək cəhdlərimiz isə boşa çıxdı. Bir necə gündür etdiyimiz zənglərə, göndərdiyimiz məktuba cavab verilmədi. Lakin araşdırmalarımız davam edir. Digər məktəblərdə də belə problemlərin olub-olmaması, hökumət rəsmilərinin məsələyə münasibətini öyrənməyə çalışacağıq.