Avropa Komissiyasının vitse-prezidenti Nili Kroesin mətbuat katibi Rayn Heat: “Kompüterimdə heç bir məlumat itkisi yoxdur”

5-9 noyabr tarixlərində Bakı şəhərində baş tutan 7-ci İnternet İdarəçiliyi Forumunda iştirak edən Avropa Komissiyasının Rəqəmsal Gündəlik üzrə vitse-prezidenti Nili Kroesin (Neelie Kroes) mətbuat katibi Rayn Heat (Ryan Heath) öz şəxsi “Twitter” ünvanında ölkəmizdə olduqları zaman kompüterlərinə müdaxilə edilməsi barədə yeni məlumatlar yerləşdirib.
Xatırladaq ki, İnternet İdarəçiliyi Forumunda mətbuat katibi Rayn Heat birmənalı şəkildə qeyd edib ki, onun qaldığı hotel nömrəsində kompüterinə müdaxilə olunub və cənab Heat bu müdaxiləni onlara olan nəzarətin təzahürü kimi ictimaiyyətə açıqlayıb (mənbə: BBC News Technologies - http://www.bbc.co.uk/news/technology-20308939, 13 noyabr, 2012-ci il).
Rabitə və İnformasiya Texnologiyaları Nazirliyinin mətbuat xidmətindən “Qafqazinfo”ya verilən məlumata görə, ötən gün Rayn Heat “Twitter” ünvanında qurumun İT mütəxəssislərinin bu işlə bağlı araşdırmalarını bitirdiklərini və faktiki olaraq müdaxilənin sübut olmasına dair heç bir dəlil aşkar olunmadığını qeyd edib.
Cənab Heatın bəyanatını olduğu kimi təqdim edirik (mənbə: http://ecspokesryan.tumblr.com/) .
“Artıq bizim İT təhlükəsizlik xidmətlərindən mənim şəxsi kompüterimlə bağlı əhəmiyyətli yeniliklərimiz var. Kompüterdə ziddiyyətli sertifikatlar, şübhəli mesajlar qəbul olunub və parollara müdaxiləni istisna etmək mümkün deyil. Digər tərəfdən, kompüterimdə heç bir məlumat itkisi qeydə alınmayıb və zərərli proqram yoxdur. Bu xəbər bizi rahatlatdı və biz bu məsələni bağlı hesab edirik”.