Şakir Mustafayevin başını partladıblar, böyrəkləri sıradan çıxan Qarabağ əlilinin isə ürəyi getdi; təqsirləndirilənlər ibtidai istintaqa verdikləri ifadələrdən imtina etdilər
Dekabrın 24-də Şəki Ağır Cinayətlər Məhkəməsində İsmayıllı məhbuslarının işi üzrə növbəti məhkəmə iclası keçirildi. İş üzrə 16 İsmayıllı sakini ilə yanaşı, Müsavat başqanının müavini, “Yeni Müsavat”ın köşə yazarı Tofiq Yaqublu və REAL sədri İlqar Məmmədov da hadisələrin təşkili və əhalinin iğtişaşlara təhrik olunmasında təqsirləndirilir.
24 dekabrdakı məhkəmə prosesini Müsavat və REAL rəhbərliyi də müşahidə edirdilər. Onların arasında Müsavat başqanı İsa Qəmbər, Arif Hacılı, Vurğun Əyyub, Qubad İbadoğlu, AXCP-dən Sahib Kərimli var idi. Polislər məhkəməni müşahidə etməyə gəlmiş insanların bir hissəsini məhkəmə binasından xeyli kənarda küçədə saxlayaraq, onların binaya yaxınlaşmasına imkan vermədilər. Buna baxmayaraq, Müsavat rəhbərliyi məhkəmə salonuna keçə bildi.

Saat 11:00-a təyin olunan proses yubandı və saat 12:30-da başladı. Buna səbəb təqsirləndirilən şəxs - Qarabağ əlili Mirkazım Abdullayevin Yevlax təcridxanasında halının pisləşməsi olub. Onun böyrəkləri sıradan çıxıb, üzündə şişkinlik əmələ gəlib və təcridxanada ürəyi gedib.

Ümumiyyətlə, M.Abdullayevin səhhəti çox ağırdır, vəziyyəti kəskinləşib, elə məhkəmə prosesi zamanı da onun üçün təcili tibbi yardım çağırıldı.

Proses isə təqsirləndirilən şəxslərin dindirilməsi ilə davam etdirildi. Hadisələrin təşkilində ittiham olunan Vasif İbrahimov vəkillərin suallarını cavablandırarkən dedi ki, “Çıraq” otelinin qarşısına gecə saat 23:30-da gedib.

O, vəkil Xalid Bağırovun “o saata kimi bəs nə edirdiz” sualına “yatırdım” deyə cavab verdi. Vəkil ittiham aktına ironiya ilə yanaşdı: “İstintaq o qənaətə gəlib ki, yuxuda bir neçə saat ərzində prosesləri təşkil edibmiş”. Hakim isə replikalara son qoymağa çağırdı. V.İbrahimov ifadəsində bildirdi ki, otelə çatanda onun artıq 1-ci mərtəbəsi yandırılmışdı: “Mənimlə otel arasında 100-120 metr məsafə vardı. Kütləni yarıb otelə yaxınlaşmaq mümkün deyildi. Kiməsə daş atmamışam, xəsarət yetirməmişəm, polisə müqavimət göstərməmişəm. Kim əleyhimə ifadə verib mənə şər atıbsa, ayıb olsun”.

Təqsirləndirilən şəxs əhalinin icra başçısı Nizami Ələkbərovun evinə doğru yürüş etdiyini, konkret kimlərin daş atdığını görmədiyini söylədi: “Əhali başçının istefasını tələb edirdi. Camaat deyirdi ki, otelin sahibinin başçı ilə qohumluğu var”.

Sonra hakim onun istintaqa ifadəsini oxudu. İbtidai istintaq verdiyi ifadədə qeyd olunub ki, əhali təhqir olunub, o da qəzəblənmiş kütlə ilə birlikdə başçıdan məsələni aydınlaşdırmağa gedib. İfadəsində deyilir ki, İbrahimov icra başçısının darvazasını təpiklə açıb.

“Mənim yanımda vəkil olmayıb. Olanlar da maskalı vəkillər idi. Mən ifadədə başçının darvazasını təpiklədiyimi deməmişəm. Özlərindən yazıblar”


Təqsirləndirilən şəxs istintaq zamanı ifadəsinin kompüterdə yazıldıqdan sonra ona göstərildiyini, çapa gedəndə isə onun adından başqa cümlələr yazıldığını qeyd etdi. O, başçının yox, gözətçisinin açıq darvazasını ayağı ilə itələdiyini etiraf etdi.
Məhbus ondan ifadəsinin protokolunda göstərilən kimi, Bakıda saat 23:40-da yox, gecə 2-3 radələrində ifadə alındığını dedi: “Mənim yanımda vəkil olmayıb. Olanlar da maskalı vəkillər idi. Mən ifadədə başçının darvazasını təpiklədiyimi deməmişəm. Özlərindən yazıblar”.

Vəkillərin suallarına cavab verən İbrahimov Tofiq Yaqublu və İlqar Məmmədovu tanımadığını açıqladı: “Onları burda tanımışam. Ümumiyyətlə, onları İsmayıllıda görməmişəm. Çünki artıq həbs olunmuşdum”.

Nahar fasiləsindən sonra da təqsirləndirilən Şakir Mustafayev ifadə verərək qeyd etdi ki, ona Baş Mütəşəkkil Cinayətkarlıqla Mübarizə İdarəsində (BMCMİ) işgəncələr verilib: “Mənim vurub başımı partladıblar, döyüblər, başımdan gələn qanı dayandırmaq üçün tibbi yardım göstərməyiblər. Məndən təzyiq altında ifadələr alınıb və ibtidai istintaqa verdiyim ifadədən imtina edirəm”.

Vəkillər vəsatət qaldıraraq onun döyülməsi ilə bağlı tibbi ekspertiza keçirilməsini təmin olunmasını istədilər. Ancaq hakim vəsatətin yazılı olmadığını deyərək baxılmasını rədd etdi. Ümumilikdə, digər təqsirləndirilənlər - Cəfər Cəfərov, Qənbər Ağamalıyev, Aydın Cabbarov ifadələrində ibtidai istintaq verdikləri ifadələrdən imtina etdilər, ilkin ifadələrin əvvəlcədən hazırlanmış olduğunu açıqladılar. Onlar da təzyiq və işgəncə altında ifadə verdiklərini söylədilər. Hakim növbəti prosesi dekabrın 29-u, saat 10:00-a təyin etdi.
***
Prosesdən sonra Müsavat başqanı İsa Qəmbər məhkəmə prosesini dəyərləndirdi: “Bu, məhkəmə yox, məzhəkədir, absurddur. Vəkillər nə bacarırlarsa edirlər. Həmişəki kimi cəsarətli və peşəkar şəkildə müdafiə edirlər. Tofiq Yaqublu və İlqar Məmmədov isə formadadır. Onlar haqqı-ədaləti qoruyurlar”.

Müsavat lideri vurğuladı ki, İsmayıllı hadisələrinə görə günahsızlar tutulub, əsl baiskarlar isə azadlıqda gəzir: “Cəmiyyət bu ədalətsizliyə etiraz etməlidir. Günahkarların cəzalandırılmasına, xalqa qarşı həqarət, hörmətsizlik göstərənlərin qanun qarşısında cavab verməsinə nail olacağıq. Buna inanıram və həmin günün yaxınlaşması üçün müsavatçılarla, cəbhəçilərlə, gənclərimizlə birlikdə mübarizəmizi davam etdiririk”.
Xatırladaq ki, iş üzrə ittiham olunan T.Yaqublu və İ.Məmmədov beynəlxalq hüquq müdafiə təşkilatları tərəfindən vicdan məhbusu elan olunub.

“Yeni Müsavat”ın reportyor qrupu, Şəki