İcra başçısının müavini: “Həsən Camalov böhtan xarakterli yazılar yazmaqla heç nəyə nail ola bilməz”
Sabunçu rayonu, Bakıxanov qəsəbəsi, Səmədbəy Mehmandarov küçəsi ev 26/1 ünvanda yaşayan Həsən Camalovun şikayət məktubunu dərc etmişdik. 13 övlad atası olduğunu qeyd edən H.Camalov Sabunçu Rayon İcra Hakimiyyətinin vəzifəli şəxslərinin haqsızlığına etiraz olaraq ailə üzvləri ilə birgə aclıq aksiyasına başlayacağını yazırdı. Sabunçu Rayon İcra Hakimiyyəti başçısının müavini Qəzənfər Həsənov məsələ ilə bağlı “Yeni Müsavat”a münasibət bildirib. Q.Həsənov bildirdi ki, H.Camalovun iddia etdiyi kimi heç vaxt onun yaşadığı evin sökülməsi üçün məsələ qaldırılmayıb. Əksinə ərazidə tikinti işləri aparan şirkət ona həyətinin abadlaşdırılmasını təklif edib: “Həsən Cаmаlov аyrı-ayrı dövlət orqanlarına və mətbuata müraciət edərək ailəsinə məxsus Bakıxanov qəsəbəsi, Sülh küçəsi 14/2 saylı ünvanda 400 kvadrat metr torpaq sahəsinin Sabunçu Rayon İcra Hakimiyyəti tərəfindən qanunsuz zəbt olunduğunu, S.Mehmandarov küçəsi 26 saylı ünvanda çoxmənzilli bina inşa edən “Bərgüşad Ş” firmasının onun hüquqlarını pozduğunu və bu işdə Sabunçu Rayon İcra Hakimiyyətinin məsul şəxslərinin maraqlarının olduğunu bildirib. Bildirmək istəyirəm ki, H.Camalovun müxtəlif orqanlara yazdığı ərizə və şikayətlər qərəzli, yalnız öz şəxsi marağının təmin edilməsinə yönəlmiş əsassız ittihamlardır. Biz bu məsələni ətraflı, hərtərəfli araşdırmışıq. Camalovun əsassız narazılığı ilə bağlı “Bərgüşad-Ş” firmasının rəhbərliyi bizə bildirib ki, S.Mehmandarov küçəsi 26 saylı ünvanda tikilən yeni çoxmənzilli binanın ətrafında aparılan abadlıq işləri ilə bağlı Camalova yaşadığı evin əvəzinə pul kompеnsasiyası olaraq 350 min manat, yaxud yaşadığı evin sahəsinə uyğun olaraq yeni inşa edilmiş binada 321 kvadrat metr sahəsi olan mənzil və ya ona məxsus evə uyğun başqa yerdə həyət evi tikilib verilməsi təklif olunub. Lakin o, bunların heç biri ilə razılaşmır. Bildirmək istəyirik ki, Həsən Camalov öz şəxsi marağından çıxış edərək “Bərgüşad-Ş” firması tərəfindən hüquqlarının pozulduğunu bəyan etməklə bu işdə Sabunçu Rayon İcra Hakimiyyətinin də maraqlı olduğunu bildirərək nəyəsə nail olmaq fikrindədir. Belə hal qəbulolunmazdır və demokratik cəmiyyətdə arzuolunmaz haldır. Əgər iddia etdiyi kimi hüquqları pozulubsa о, öz hüquqlarını sivil qaydada müdafiə və bərpa edə bilər. Böhtan xarakterli yazılar yazmaqla heç nəyə nail ola bilməz. Aparılan abadlıq-tikinti işlərinin ona heç bir maneçiliyi yoxdur və ola da bilməz. Onun Bakıxanov qəsəbəsi, Sülh küçəsi 14/2 saylı ünvanda istifadə, icarə və mülkiyyət hüququ əsasında rəsmi qaydada qeydə alınmış hər hansı torpaq sahəsi olmayıb və yoxdur. 2008-ci ildə qeyd edilən ünvanda ona torpaq sahəsi verilməsi üçün müxtəlif orqanlara dəfələrlə müraciət etsə də, tələbi qanunsuz və əsassız olduğundan təmin edilməyib. Sonuncu dəfə ona Bakı Şəhər İcra Hakimiyyətindən 18/03-8/6290 saylı 17.11.2008-ci il tarixli bildirilib ki, “Sizin fərdi yaşayış evinin tikintisi üçün torpaq sahəsinin ayrılması barədə Azərbaycan Respublikası Prezidentinin İcra Aparatından daxil olmuş ərizənizə Bakı Şəhər İcra Hakimiyyətinin Memarlı və Şəhərəsalma Baş İdarəsində baxılıb. Təkrarən bildirirk ki, sözügedən ərazi bələdiyyə mülkiyyətinə təhvil verilmiş ərazilərə aid olmadığından, xahişinizi yerinə yetirmək imkanımız xaricindədir”.
H.Camalovun hazırda yaşadığı S.Mehmandarov küçəsi, 26/1 saylı ünvanda “Bərgüşad-Ş” firması tərəfindən onun hüquqlarının pozulması və bu işdə Sabunçu Rayon İcra Hakimiyyətinin məsul şəxslərinin maraqlarının olması ilə bağlı məlum edirəm ki, “Bərgüşad Ş” firması tərəfindən S.Mehmandarov küçəsi 26 saylı ünvanda yerləşən ikimərtəbəli qəzalı vəziyyətdə olan yaşayış binası sökülərək yerində müasir tələblərə cavab verən yaşayış evi inşa edilib. Sabunçu Rayon İcra Hakimiyyəti Yerli İcra Hakimiyyətləri haqda Əsasnaməyə uyğun olaraq müvafiq ərаzidə sahibkarlığın inkişafı və dəstəklənməsi, memarlıq və şəhərsalma, vətəndaşların sosial müdafiəsi, sağlamlığının qorunması sahəsində dövlət siyasətinin həyata keçirdiyini, vətəndaşların hüquq və azadlıqlarının həyata keçirilməsinin təmin edilməsində səlahiyyətli olduğunu nəzərə alaraq qeyd edilən məsələyə həssas yanaşılıb, mübahisənin həll edilməsinə yardımçı olmаğа çalışıb. Məsələ araşdırılarkən məlum olub ki, S.Mehmandarov küçəsi 26/1 saylı H.Camalova məxsus fərdi yaşayış evi keçən əsrin əvvəllərində S.Mehmandarov küçəsi 26 saylı ünvanda yerləşən çoxmənzilli yaşayış binasının həyəti birbaşa zəbt edilərək tikilib”.
Başçı müavini qeyd edib ki, zəbt olunan əraziyə sonradan Sabunçu Rayon Məhkəməsi istifadə hüququnu tanayan qətnamə çıxarıb.
Q.Həsənov şikayətçinin 4 həyat yoldaşından 13 övladının olduğunu, sözügedən ünvanda həmin qadınlardan 2-nin, Bakıxanov qəsəbəsinin Aşıq Alı küçəsi ev 22 a saylı ünvanda isə digər 2 qadının yaşadığını da qeyd etdi.