2013-cü il bitir. Bu il ölkəmizin ictimai-siyasi və mədəni həyatında baş verən bir çox önəmli hadisələrlə yadda qaldı.

Bu il ölkəmizdə keçirilən 9 oktyabr prezident seçkiləri, bir çox dünya dövlətləri liderlərinin Azərbaycana gəlişi, prezident İlham Əliyevin xarici ölkələrə səfərləri, ölkənin iqtisadi inkişafına yönələn beynəlxalq layihələrin həyata keçirilməsi kimi hadisələri ilin yaddaqalan ictimai-siyasi və iqtisadi-siyasi hadisələri sırasında sadalamaq olar.

2013-cü ildə siyasi proseslərdə olduğu kimi mədəniyyət sahəsində də uğurlarımız az olmadı. Bunların sırasında “Eurovision-2013”də uğurlu çıxış kimi 4-cü yerin tutulmasını, ölkədə keçirilən muğam festivallarını, beynəlxalq sərgiləri, ilk dəfə keçirilən “Turkvision” mahnı müsabiqəsində qalib olmağımızı göstərmək olar.

2013 xalq adına, ölkə adına uğurlar əldə etdiyimiz bir il kimi tarixə yazılsa da ölkənin ictimai-siyasi, elmi, mədəni həyatında böyük nüfuza sahib, sevilən, dəyər verilən insanları da bizlərdən aldı.

Virtualaz.org 2013-cü ildə ölkəmiz, millətimiz adına böyük itki sayılan, mənən itirilməyən şəxsiyyətləri bir daha yad edir. Bu il həmin adamları itirdik:



Akademik Mahmud Kərimov

2013-cü ilin ilk itkisi Azərbaycan Milli Elmlər Akademiyasının prezidenti, akademik Mahmud Kərimov oldu. Bir müddət xəstəlikdən əziyyət çəkən M.Kərimov fevralın 10-u dünyasını dəyişdi.

Qeyd edək ki, M. Kərimov 18 oktyabr, 1948-ci ildə Ermənistanın İrəvan şəhərində anadan olub. Azərbaycan Dövlət Universitetinin fizika fakültəsini bitirib. Yarımkeçicilər və dielektriklər fizikası ixtisası üzrə doktorluq dissertasiyası

müdafiə edib. 2001-ci ildə AMEA-nın həqiqi üzvü seçilib.



Unudulmaz “Mixaylo”

Bəlkə də yaddaşlardan bir ömür boyu silinməyəcək “Mixaylo” obrazı ilə əziz olan xalq artistimiz Nodar Şaşıqoğlu da 2013-cü ildə itirdiklərimizin siyahısına düşdü.

N.Şaşıqoğlu 13 mart, 1927-ci ildə Batumidə dünyaya gəlib. O, Azərbaycan və Rusiyanın xalq artisti idi. Özünü Azərbaycan tamaşaçılarına “Mixaylo” obrazı ilə təqdim edib sevdirən Nodar Şaşıqoğlu 1983-cü ildə Azərbaycan SSR xalq artisti fəxri adına layiq görülüb. Aktyor “Onun böyük ürəyi” (1958), “Uzaq sahillərdə” (1958), “Əsl dost” (1959), “Matteo Falkone” (1960), “Səhər” (1960), “Bizim küçə” (1961), “Leyli və Məcnun” (1961), “Telefonçu qız” (1962), “De ki, məni sevirsən!” (1977), “Sevinc buxtası” (1977) filmlərinə çəkilib. Acar əsilli xalq artisti Nodar Şaşıqoğlu Bakı şəhərində yaşadığı evdə uzun sürən xəstəlikdən sonra aprelin 12-də dünyasını dəyişdi.



Komediyamızın aslanı - Səyavuş Aslan

2013-də itirdiyimiz dəyərli şəxsiyyətlərimizdən, xalq artistlərimizdən biri də Səyavuş Aslandır. Gülüş ustamızı iyunun 27-də itirdik.

Azərbaycan realist aktyor məktəbinin görkəmli nümayəndələrindən biri olan S.Aslan 1935-ci il, sentyabrın 5-də Bakıda doğulub. Aktyorluğa həvəskar kimi dram dərnəyindən başlayıb. Uzun illər Azərbaycan Dövlət Musiqili Komediya Teatrının aparıcı aktyorlarından olub. Bir müddət həmin teatrın bədii rəhbəri işləyib (1994-1996) və bir çox obrazlar yaradıb. 1984-cü ildən Akademik Milli Dram Teatrının aktyoru idi. Televiziya tamaşalarında 100-dən çox obraz ifa edib.

Səyavuş Aslan teatr və kino yaradıcılığındakı səmərəli fəaliyyətinə görə 1974-cü ildə əməkdar artist, 1982-ci ildə xalq artisti fəxri adları ilə təltif olunub. Prezident təqaüdçüsü idi. Bu il iyunun 25-də “Şərəf” ordeni ilə təltif edilmişdi.



Şərqin ilki - Şəfiqə Axundova

Şərqin opera yazan ilk qadın bəstəçisi, xalq artisti Şəfiqə Axundova da 2013-cü ilin bizdən aldığı ölməz korifeylərdəndir. Uzun müddət səhhətində problemlər yaşanan Şəfiqə Axundova iyulun 26-da 89 yaşında dünyasını dəyişdi.

Öz mahnıları ilə dinləyici qəlbinə yol tapan Şəfiqə Axundova 1924-cü ildə Şəkidə doğulub. 1943-1944-cü illərdə A.Zeynallı adına Bakı Musiqi Məktəbində oxuyarkən Üzeyir Hacıbəyovdan dərs alıb. 1956-cı ildə Ü.Hacıbəyov adına Azərbaycan Dövlət Konservatoriyasını bəstəkarlıq ixtisası üzrə B.Zeydmanın sinfini bitirib. 1998-ci ildə xalq artisti adına layiq görülüb. 2004-cü ildə isə “Şöhrət” ordeni ilə təltif edilib.



Çılğın Sirus Təbrizli

Ölkənin siyasi proseslərində kifayət qədər koloritli çıxışları və açıq söhbəti ilə diqqət çəkən Sirus Təbrizli 2013-cü ildə itirdiyimiz əvəzolunmaz siyasətçimiz oldu.

Azərbaycan xalq hərəkatının fəallarından olmuş məşhur siyasi xadim, YAP-ın qurucularından biri, keçmiş mətbuat və informasiya naziri Sirus Təbrizli sentyabrın 7-də dünyasını dəyişdi.

Sirus Təbrizli 1942-ci il, mayın 9-da Təbriz şəhərində anadan olub. Azərbaycan Dövlət Universitetinin jurnalistika fakültəsini bitirib. YAP sədrinin müavini işləyib. Birinci çağırış Milli Məclisin deputatı olub. 2000-ci il, noyabrın 5-də 13 saylı Nizami-Xətai seçki dairəsindən deputat seçilib. Milli Məclisin qərarına əsasən 1 dekabr, 2000 -ci il tarixində Milli Məclisin İnsan hüquqları daimi komissiyasının sədri təyin olunub.



Dilçilik elminin nüfuzlu siması Yusif Seyidov

Azərbaycan dilçilik elminin nüfuzlu simalarından olan filologiya elmlər doktoru, professor Yusif Seyidov da adını ilin itkiləri siyahısına yazdığımız dəyərli şəxsiyyətlərdən biridir.

Yusif Seyidov 1929-cu il, mayın 2-də Naxçıvanın Şərur rayonunun Yengicə kəndində anadan olub. Azərbaycan Dövlət mükafatı laureatı olan Yusif Seyidov Bakı Dövlət Universitetinin filologiya fakültəsidə Azərbaycan dili və onun tədrisi metodikası kafedrasının əsasını qoyaraq 1965-ci ildən vəfat etdiyi gümədək oranın rəhbəri olub.

Tənqidçi və ədəbiyyatşünas kimi də tanınan Yusif Seyidov Azərbaycan ədəbiyyatşünaslığı və dilçilik elminin tarixində bir sıra sanballı əsərlərə imza atıb.

Y.Seyidov gənc kadr kimi 1967-ci ildə artıq professor adını qazanıb. Azərbaycan dilinin sintaksisi öz inkişaf meyarlarına görə məhz Yusif Seyidova minnətdardır. Alim 2013-cü il, noyabrın 18-də 84 yaşında vəfat edib.



General Məhəmməd Abbasquliyev

Dövlət Sərhəd Xidmətinin rəis müavini, general-mayor Məhəmməd Abbasquliyev noyabrın 22-də vəfat etdi.

Uzun illər Milli Təhlikəszilik Nazirliyində çalışan Məhəmməd Abbasquliyev iş otağında dünyasını dəyişdi. General-mayor ixtisaslı kəşfiyyatçı və sərhədçi kimi tanınıb.



Qarmon ustası Aslan İlyasov

Azərbaycan musiqisinin unudulmaz adlarından biri, sənəti ilə yaddaşlardan silinməyəcək Aslan İlyasov 2013-cü ilin bizdən aldığı sonuncu sənət adamı oldu.

Tanınmış qarmon ifaçısı Aslan İlyasov dekabrın 20-də dünyasını dəyişdi. O, uzun müddət idi sirrozdan əziyyət çəkirdi, yataq xəstəsi idi.