Şərikini sifariş verən Hümbət Məmmədovun istəyi təmin edilmədi
Yanvarın 8-də Bakı Apelyasiya Məhkəməsində “Azər-Ross” MTK-nın baş ofisində törədilən dəhşətli qətl hadisəsindən sonra həbs olunan Hümbət Məmmədov, Vüsal Qurbanov Tofiq Bəkirov, Fərman Hacıyev, Sahil Şamilov və Şamil Şamilovun apelyasiya şikayəti üzrə məhkəmə keçirilib.

Hakim Mirpaşa Hüseynovun sədrliyi ilə keçirilən prosesdə çıxış edən prokuror Ceyhun Budaqov deyib ki, təqsirləndirilən şəxslərin apelyasiya şikayəti məhkəmə istintaqı aparılmadan baxılmalıdır. Prokuror əlavə edib ki, Hümbət Məmmədovun həyat yoldaşı Marina Məmmədova müsadirə olunan əmlakının geri qaytarılması ilə bağlı apelyasiya şikayəti əsassızdır. Prokuror Marina Məmmədovanın apelyasiya şikayətinin icraata götürülməməsini tələb edib.

Sahil və Şamil Şamilov qardaşlarının vəkili apelyasiya şikayətlərinə məhkəmə istintaqı aparılmaqla baxılmasını istəyib. Vəkil deyib ki, apelyasiya şikayətlərində Şamilov qardaşlarına bəraət hökmünün çıxarılması istənilib: “Belə olan halda qismən də olsa şikayətə məhkəmə istintaqı aparılmaqla baxılmalıdır”.

H.Məmmədovun vəkili apelyasiya şikayətlərinə məhkəmə istintaqı aparılmaqla baxılmasını istəyib. Digər təqsirləndirilən şəxslərin vəkilləri də vəsatətləri müdafiə ediblər. Ş.Şamilov deyib ki, cinayət işində adı hallanmayıb. Günahsız olduğunu qeyd edən Ş.Şamilov bildirib ki, məhkəmədə baxılan işin ona heç bir adiyyatı yoxdur. Mərhum Əflatun Piriyevin qardaşı Ərəstun Piriyevin nümayəndəsi Aslan İsmayılov deyib ki, dələduzluq ittihamı ilə bağlı apelyasiya şikayətinə məhkəmə istintaqı ilə aparılması vacibdir. Onun sözlərinə görə, iş üzrə mənzil problemi yaranan şəxslərin hüquqları həll edilməlidir: “Birinci məhkəmə instansiyasında Hümbət Məmmədovun mülklərinin siyahısı məlum olub. Məhkəmədən sonra isə onun bir çox mülkünün üzərindən həbs götürülüb. Belə olan halda zərərçəkmişlərə dəymiş ziyan hansı mənbədən ödəniləcəyi məlum deyil. Buna görə də dələduzluqla bağlı hissədə məhkəmə istintaqı tam aparılmalıdır”. Zərərçəkmiş Tahir Əliyev deyib ki, 2011-ci ildə “Azər-Ross” MTK-dan mənzil alması üçün 86 min manat ödəyib. Onun sözlərinə görə, bu günə kimi nə mənzil verilib, nədəki pulunu ala bilməyib. Digər zərərçəkmişlərdə işin uzadılmamasını istəyiblər. Onlar pullarının Hümbət Məmmədovdan tələb ediblər. Tərəfləri dinləyən hakimlər qərar qəbul etmək üçün müşavirə otağına yollanıblar. Müşavirədən qayıdan hakimlər vəkillərin vəsatətinin təmin edilməməsi barədə qərar açıqlayıblar. Qərara görə, apelyasiya şikayətinə məhkəmə istintaqı aparılmadan baxılacaq. Həmçinin H.Məmmədovun həyat yoldaşının apelyasiya şikayətini icraata götürülməsindən imtina edilib. Məhkəmə baxışı yanvarın 22-nə təyin edilib.

İttihama görə, 2011-ci il iyulun 11-də, saat 13 radələrində paytaxtın Nərimanov rayonu ərazisində yerləşən “Azər-Ross” mənzil-tikinti kooperativində qurumun təsisçisi Əflatun Piriyev odlu silahdan açılan atəşlə qətlə yetirilib, baş mühasib Əmiraslan Əhmədov ağır yaralanıb.

İstintaq araşdırmaları zamanı cinayət işi üzrə dələduzluq faktları da üzə çıxıb. Məlum olub ki, şirkətin təsisçilərindən biri olan Hümbət Məmmədov vətəndaşları aldadaraq bir mənzili bir neçə nəfərə satmaqla dələduzluq ediblər. Cinayət işi üzrə dələduzluqla üzləşmiş 26 vətəndaş zərərçəkmiş qismində tanınıb. Zərərçəkən vətəndaşlardan 24 nəfərindən 1 milyon 777 min manat pul alınıb. Və onların heç birinə mənzil verilməyib.
Bakı Ağır Cinayətlər Məhkəməsinin hökmü ilə Hümbət Məmmədov və Vüsal Qurbanov ömürlük, Tofiq Bəkirov 14 il, Fərman Hacıyev 14 il 6 ay, Sahil Şamilov və Şamil Şamilov isə hər biri 12 il 6 ay müddətinə azadlıqdan məhrum ediliblər. hökmdən təqsirləndirilən şəxslər apelyasiya şikayəti veriblər. Sahil və Şamil qardaşları barələrində olan hökmün ləğv edilməsini və bəraət hökmünün çıxarılmasını istəyiblər. Digər təqsirləndirilən şəxslər cəzalarının yüngülləşdirilməsini xahiş ediblər.