Cinayət işi üzrə adı keçən Ramil Hacıyev hadisədən sonra ölkəni tərk edib

Dünən Bakı Ağır Cinayətlər Məhkəməsində “Azər-Ross” MTK-nın baş ofisində törədilən dəhşətli qətl hadisəsində və dələduzluqda ittiham olunan Hümbət Məmmədov, Tofiq Bəkirov, Fərman Hacıyev, Sahil Şamilov və Şamil Şamilovun cinayət işi üzrə məhkəmə davam etdirilib.

İttihama görə, 2011-ci il iyulun 11-də, saat 13 radələrində paytaxtın Nərimanov rayonu ərazisində yerləşən “Azər-Ross” mənzil-tikinti kooperativində qurumun təsisçisi Əflatun Piriyev odlu silahdan açılan atəşlə qətlə yetirilib, baş mühasib Əmiraslan Əhmədov ağır yaralanıb.
İstintaq araşdırmaları zamanı cinayət işi üzrə dələduzluq faktları da üzə çıxıb. Məlum olub ki, şirkətin rəhbər şəxsləri – Hümbət Məmmədov və Fərman Hacıyev vətəndaşları aldadıb bir mənzili bir neçə nəfərə satmaqla dələduzluq ediblər. Cinayət işi üzrə dələduzluqla üzləşmiş 26 vətəndaş zərərçəkmiş qismində tanınıb. Zərərçəkən vətəndaşlardan 24 nəfərindən 1 milyon 777 min manat pul alınıb və onların heç birinə mənzil verilməyib.
Hakim Eldar Mikayılovun sədrliyi ilə keçirilən prosesdə məlum olub ki, təqsirləndirilən şəxslərin vəkillərinin bəziləri və dövlət ittihamçısı prosesdə iştirak etmirlər. O da qeyd edilib ki, cinayət işi üzrə çıxan dövlət ittihamçısı başqa məhkəmə iclasında iştirak edib və buna görə də bu məhkəmə iclasında iştirak edə bilmir. Amma təqsirləndirilən şəxslərin vəkillərinin məhkəmə iclasına gəlməmələrinin səbəbləri məlum olmayıb.
Hakim bildirib ki, tərəflərə məhkəmənin yeri və vaxtı barədə əvvəlcədən məlumat verilib, amma tərəflərin bir çoxu məhkəmə iclasında iştirak etmir. Hakim prosesin başqa vaxta keçirilməsi barədə qərar qəbul etməsi cinayət işi üzrə adı keçən zərərçəkmişlərin etirazına səbəb olub. Tikinti dələduzluğu üzrə zərərçəkənlər prosesin başqa vaxta keçirilməsinə etiraz ediblər. Onlar prosesə gəlməyən vəkillərin barəsində tədbir görülməsini tələb ediblər. Bundan başqa, cinayət işi üzrə qətlə yetirilən Əflatun Piriyevin ailəsinin vəkili Aslan İsmayılov da etiraz edib. O, deyib ki, prosesin bir neçə dəfə təxirə salınması qanuna ziddir. Buna baxmayaraq hakimlər məhkəmə iclasının davamını mayın 7-dək təxirə salıblar.
Priyevlərin vəkili Aslan İsmayılov açıqlamasında bildirib ki, cinayət işi üzrə məhkəmə iclası bir ildən artıqdır davam edir. Onun sözlərinə görə, cinayət işi üzrə məhkəmə istintaqı aprelin 16-da başa çatıb: “Aprelin 16-da çıxış etmək üçün dövlət ittihamçısına söz verilib. Həmin prosesdə dövlət ittihamçısı çıxışa hazır olmadığını, çıxışa hazırlaşmaq üçün vaxt istəyib. Hakimlər dövlət ittihamçısına çıxışa hazırlaşmaq üçün aprelin 23-dək vaxt verdilər. Həmin gündə dövlət ittihamçısı çıxışa hazır olmadığını əsas gətirildiyindən məhkəmə iclası aprelin 30-dək təxirə salınıb. Növbəti prosesdə də dövlət ittihamçısı iştirak etmədi. Belə olan halda cinayət işi üzrə başqa ciddi işlər görülür. Hümbət Məmmədovun ətrafındakılar onun əmlakının satılması üçün ciddi işlər həyata keçirirlər. Bu cinayət işi hər kəsin diqqət mərkəzində olmalıdır. Çünki tikinti şirkətində rəhbər şəxsin sifarişi ilə şərikini sifarişlə qətlə yetirilib. Bir ildir məhkəmə iclası gedir, amma hökm çıxarılmır. Belə olan halda da Hümbət Məmmədova qəsdən şərait yaradılır”.
Qeyd edək ki, cinayət işi üzrə adı keçən Ramil Hacıyev hadisədən sonra ölkəni tərk edib. Rusiyada olan Ramil Hacıyev adam oğurluğuna görə 14 il müddətinə azadlıqdan məhrum edilib. Azərbaycanda keçirilən cinayət işi üzrə məhkəmə hökm elan ediləndən sonra Ramil Hacıyev Rusiyadan Azərbaycana ekstradisiya ediləcək.

HÜSEYN