Ziya Məmmədovun nazirlik binası və “Karvan” restoranının ərazisi “Yeni Həyat” yaşayış
kompleksinə pay-puş edilib; alatavalılar “Sovetski”yə dəstək verəcək

Bakının 1-ci Alatava ərazisini də sökməyə başlayıblar. Eyni zamanda bu massivdə yerləşən Nəqliyyat Nazirliyinin inzibati binası da söküləcək. Nazirlik üçün yeni inzibati bina isə Keşlə qəsəbəsində, İntellektual İdarəetmə Sisteminin yaxınlığında tikilir. Hazırda nazirliyin yeni binasının tikintisi davam edir.
Yaxın aylarda nazirliyin Tbilisi prospektində yerləşən hazırkı binasının söküntüsü həyata keçirilərkən nazir Ziya Məmmədova məxsus “Karvan” şadlıq sarayı da yerlə-yeksan olunacaq. Artıq mətbuat bu haqda yazıb. Amma işin yeni tərəfləri barədə “Gündəm-xəbər” məlumatlar əldə edib.
Məlumatda vurğulanır ki, nazirə məxsus restoranın söküntüsü Alatavada davam edən kütləvi söküntünün bir tərkib hissəsi sayıla bilər. Çünki Nəqliyyat Nazirliyi və “Karvan” şadlıq sarayı bir-birinə yaxın yerləşir.
Yeni xəbərə görə, hər iki bina söküldükdən sonra ərazi boş qalmayacaq. Aldığımız məlumata görə, həmin yerdə “Yeni Həyat” yaşayış kompleksinin göydələnləri inşa olunacaq. Bakı Şəhər İcra Hakimiyyəti sözügedən ərazidə yaşayış kompleksinin tikintisinə icazə verib. Ərazidə park salınması, yolların genişləndirilməsi nəzərdə tutulur.
Xəbərdə deyilir ki, nazirin rəhbəri olduğu qurumun binasının ərazisi və şadlıq evinin yeri artıq yaşayış kompleksinə həvalə olunub. “Yeni Həyat” şirkəti Bakının bir çox yerlərində müasir yaşayış kompleksləri inşa edib.
Hazırda isə bu adlı-sanlı tikinti şirkəti Nəqliyyat Nazirliyinin yaxınlığında yerləşən keçmiş 1 nömrəli taksi parkının 4 hektar ərazisində də yeni yaşayış şəhərciyi salmaq istəyir. Alatavanın sökülməsi planı da məhz bu şəhərciklə əlaqədardır.
Eyni zamanda restoran və nazirliyin binası “Yeni Həyat”a qurban verilir. Yerli sakinlərin sözlərinə görə, söküntü ilə bağlı onlara mənzilin kvadratına 1200-1500 manat arası kompensasiya ödənilir. Alatavanın sökülməsi özəl şirkətlə bağlı olsa da, dövlət planı adı altında tikililəri uçururlar. Qəsəbə sakinləri də bunu qanunsuzluq sayır.
Əgər dövlət planı deyilsə, özəl şirkət daha çox kompensasiya ödəmək şərti ilə mülklərə toxuna bilər. Sakinlər qeyd edirlər ki, nazirliyin binası və restoranın yeri artıq alınıb. Bunu necə və hansı şərtlərlə edildiyi bilinmir.
Məlum olanı budur ki, restoran tərəfi buna etiraz etmir. Görünür razılıq əldə olunub. Sakinlər qeyd edirlər ki, Alatavadakı söküntüdən sonra hara gedəcəklərini bilmirlər. Təklif edilən pula mənzil almaq çətindir. Onların sözlərinə görə, “Sovetski” camaatını necə aldadıblarsa, onlara da belə kələk gəlirlər. Amma Alatava əhli “Sovetski” camaatına qoşulub aksiyalara dəstək verməyə hazırdır.
Qeyd edək ki, Bakıda ötən ildən geniş vüsət alan söküntü işləri hələ də davam edir. Hökumət çoxdan plana saldığı qəsəbələrdə evlərin kütləvi şəkildə söküntüsünü həyata keçirir. Artıq Alatava, Xutor qəsəbəsi və Cəlil Məmmədquluzadə (keçmiş Papanin) prospektində tikililərin çoxu yerlə-yeksan olunub. Yeni metro stansiyasının tikintisi ilə əlaqədar “Papanin” adlanan ərazidə də müəyyən tikililər sökülüb.
Amma məhəllənin ümumi söküntüsü ilə bağlı dəqiq məlumat yoxdur. Ümumiyyətlə paytaxtın bütün ərazisində memarlıq baxımından əhəmiyyət kəsb etməyən, birmərtəbəli, kommunikasiya xətti olmayan tikililərin hamısının sökülməsi və yerində parkların salınması nəzərdə tutulub. “Papanin” məhəlləsində isə belə tikililər lap çoxdur.
Rafiq Qara