“Şirkətlər qrupuna daxil olan heç bir şirkətdə hər hansı bir araşdırma aparılmır və adı qeyd edilən iş adamının bu şirkətlərlə heç bir biznes əlaqəsi yoxdur və olmayıb”
“Yeni Müsavat”-ın 19 yanvar 2014-cü il tarixli sayında “Rza Zərrabın işi Azərbaycanı da silkələyir” adlı yazı dərc edilib. Yazıda Türkiyədə rüşvət ittihamı ilə həbs edilən iş adamı Rza Zərrabın Azərbaycandakı fəaliyyətindən bəhs edilirdi. Yazıda qəzetimizin özəl mənbələrinə və Aznews.az saytının məlumatlarına istinad olunub.

Yazının əsas mövzusu “Zaminbank”-ın R. Zərrabın çirkli pullarının yuyulmasında iştirakı olub. Bu məsələdə qəzetimizin qaynaqlarına, Rusiya mətbuatına və “WikiLeaks” saytında açıqlanan məxfi teleqramlara istinad edilib. Yazının ikinci hissəsində isə, Aznews.az saytının məlumatlarından istifadə edilib. Ancaq təbii ki, biz saytın məlumatlarını da mötəbər saymamışıq və imkan daxilində bunu dəqiqləşdirməyə çalışmışıq. Məsələn, həmin məlumatlarda R.Zərrabın Bakıdakı tərəfdaşlarından biri kimi “Bank of Baku” ASC-nin adı çəkilirdi. Ancaq biz bankla əlaqə saxlayıb məlumatı dəqiqləşdirdik və bunun yalan olduğu üzə çıxdı.

Təəssüf ki, saytın məlumatında adı çəkilən və “NAB Holding”ə daxil olan “Qafqaz Lizinq” ASC ,"Buta Sığorta" ASC, "Sultan's Restaurant" və "Sultan's Plus"-la əlaqə saxlamaq mümkün olmadığından onların mövqeyini öyrənə bilmədik.

Azərbaycan mətbuatında və o cümlədən də “Yeni Müsavat” qəzetində gedən bu iddialarla bağlı redaksiyamıza “NAB Holding”in Bakı ofisindən təkzib məktubu daxil olub.
Məktubu olduğu kimi, oxucuların diqqətinə çatdırırıq:

- “Yeni Müsavat” qəzetinin 19 yanvar 2014-cü il tarixli buraxılışında “Rza Zərrabın işi Azərbaycanı da silkələyir” başlığı altında məqalə dərc edilmişdir. Məqalədə AZNews.az saytına istinad edilərək Türkiyədə rüşvət ittihamı ilə həbs edilən azərbaycanlı iş adamı Rza Zərrabın Azərbaycandakı fəaliyyətinin araşdırılması, R.Zərrabla bağlılığı olan və Azərbaycanda bir çox sektorlarda fəaliyyətini hazırda da davam etdirən "NAB Holding”lə bağlı araşdırmaların başlanması, onun biznes setinə “Qafqaz Lizinq” ASC, "Buta Sığorta" ASC, "Sultan's Restaurant" və "Sultan's Plus"unda daxil olması kimi həqiqətə uyğun olmayan məlumatlar öz əksini tapmışdır.

Nəzərinizə çatdırırıq ki, “NAB Holding” şirkətlər qrupuna daxil olan və Azərbaycanda fəaliyyət göstərən adları çəkilən şirkətlər həyata keçirdikləri sahibkarlıq fəaliyyətlərində Azərbaycan Respublikasının qanunlarını rəhbər tutur və heç bir qeyri-qanuni fəaliyyətlə məşğul olmur. Şirkətlər qrupuna daxil olan heç bir şirkətdə hər hansı bir araşdırma aparılmır və adı qeyd edilən iş adamının bu şirkətlərlə heç bir biznes əlaqəsi yoxdur və olmayıb.

Hesab edirik ki, yazılmış məqalə, öz xidmət sahələrində aparıcı yerləri tutan bu şirkətlərin işgüzar mənafelərinə zərər vura bilər.

Qeyd olunanlara əsasən, məqalədə “NAB Holding” şirkətlər qrupuna daxil olan şirkətlərin adlarının hallanmasını əsassız hesab edirik. Bu səbəbdən sizə ünvanladığımız bu məktubu “NAB Holding” şirkətlər qrupuna daxil olan şirkətlərin mövqeyi kimi qəbul edib, məqalədə əks olunmuş yoxlanılmamış, heç bir əsası və həqiqətə uyğun olmayan və oxucularda bizim şirkətlər haqqında yanlış təəssürat yarada biləcək yalan məlumatların təkzibi kimi qəzetinizin növbəti nömrəsində və internet səhifəsində dərc etməyinizi xahiş edirik”.

* * * *
Redaksiya bir daha qeyd edir ki, bu məlumatları kiminsə işgüzar nüfuzuna zərər vurmaq üçün yaymamışıq. Sadəcə olaraq ölkənin çoxsaylı internet resurslarında “NAB Holding”ə yönələn ittihamları araşdırmağa çalışmışıq. “Yeni Müsavat”dan başqa heç bir media quruluşu qarşı tərəf kimi hansısa ünvanı danışdırmağa cəhd göstərməyib. Eləcə də, “NAB Holding”in Bakıdakı təmsilçiliyi barələrində ölkənin internet məkanında 8- 10 saat dolaşan xəbərlərə operativ reaksiya verməyib. “Yeni Müsavat” məhz bu müddət keçəndən və heç bir təkzib müşahidə olunmayandan sonra həmin yazılara “Bank of Baku” rəhbərliyini münasibətini də əlavə etməklə,məqalə hazırlayıb. Biz bu məsələdə tərəflərdən heç birinin mövqeyini müdafiə etmirik və sırf qəzetçi marağı ilə hər bir mövqeyə yer ayırmağa hazırıq. Yaxşı olardı ki, “NAB-Holdinğ” bu tip informasiyalara daha çevik reaksiya versin, media ilə əlaqələrini genişləndirsin.