Bu rayonda əzilib qul kimi istismar edilən sakinlər, sanki dilənməyə məcbur edilirlər

Saatlıda məmur özbaşınalığı səngimək bilmir. Bu səpkidə yazılara dövrü mətbuatda demək olar ki, hər gün rast gəlinir. Ataların gözəl bir məsəli var: “Yüz dəfə eºitməkdənsə, bir dəfə görmək daha yaxşıdır” deyib, əksər mətləblərə aydınlıq gətirmək məqsədilə yolumu adı çəkilən rayona saldım. Saat təqribən 11:00 radələrində rayonun mərkəzi hissəsində “taksi”dən düşdüm. İlk əvvəl üz tutdum Rayon İcra Hakimiyyətinin qarşısındakı parka, ətrafda heç kim gözə dəymirdi. Sanki ölü bir həyat yaşanırdı. Onu da deyim ki, əksər şəhər və rayonlardan fərqli olaraq bu parkda sakinlərin asudə vaxtlarını səmərəli keçirmələri üçün lazımi şərait yoxdur. Açığı ilin hər bir fəsli üçün parkdakı şərait heç cür uyğun gəlmirdi və milyonlarla vəsaitin havaya sovrulduğunu da görmək olurdu. Burada bir qədər var-gəl etdikdən sonra poçtamta tərəf getdim. Oturacaqda bir nəfər oturmuşdu ki, o da olduqca fikirli görünürdü. Öncə yaxınlaşıb ona salam verdim və sanki yuxuda imiş kimi duruxaraq üzümə baxdı. Az sonra ətrafı seyr edib gördü ki, sakitlikdir və ondan başqa bir kimsə gözə dəymir? İnsanlar hara gedib deyə ona sual etdim. Müsahibim dərindən ah çəkərək “Qardaş görürəm ki, bu yerlərə nabələdsən və bizim rayon haqda təəssüratların çox azdır, bəlkə də heç yoxdur. Mənə de görüm, əgər sənin cibin boşdursa, qarnın da acdırsa, o halda sən rayonda qalarsan? Onsuz da istədiyini tapa bilməyəcəksən, o parkı görürsən? Rayonun sosial-iqtisadi inkişafı adı altında ayrılan büdcə pulları bax o kiçik ərazidə yoxa çıxarılıb. İstifadəsiz qalan Gənclər Mərkəzi və İdman Olimpiya Kompleksi, bu gün ac qalan sakinlərin nəyinə lazımdır? İşsizlik və səfalətdən artıq sakinlər gələcəyə olan ümidlərini itiriblər. Burada yaşamaq cəhənnəm əzabından başqa bir şey deyil. Söz və fikir azadlığı da yoxdur. Pulsuz da necə hərəkət edəsən? Sakinlərin belə bir azadlığını da əllərindən alıblar. Bilmirsən dərdini kimə deyəsən, şikayətlərə baxan tapılmır. Elə ki, ölkə rəhbərinə və Mehriban xanım Əliyevaya yazırsan, qardaş onda bilirsən nə olur? Əvvəlcə səni icra hakimiyyətinə çağırırlar, sonra da söyüb, döyüb polisə təhvil verirlər. “Qurban” bayramında sakinlərdən tam əksəriyyətinin pulu olmadı ki, ət alıb evində qazan xörəyi bişirsinlər. Rayonda elə imkanlı məmurlar və iş adamları var ki, bir qoyunun pulunu Allahdan da üstün tuturlar. Həmin şəxslərin zəngin və təmtaraqlı toy məclislərinə diqqət yetirdikdə bəlli olur ki, onlar yüz min
manatlarla pulu şou-biznes əhlinin nümayəndələrinə peşkəş edirlər. Bütün bunlar azmış kimi, üstəlik həmin pullara sitayiş edən kəslər vicdan əzabı çəkmədən məscidlərdə oturub İmam Hüseyn təziyəsinə qulaq asırlar. Hansı üzlə, hansı əməllə? Bir yandan da savadsızlıq baş alıb gedir. Çünki, təhsil kolxoz bazarından heç nə ilə fərqlənmir. Mədəniyyətimizdə Şərqiyyə Məmmədovanın və Reyhan Ocaqovanın girovluğunda çabalayır. Utanmadan, çəkinmədən ağızdolusu kənd təsərrüfatının inkişafından danışırlar. Hansı ki, bu gün kənd təsərrüfatı özünü təzəllül dövrünü yaşayır. Pul yox, toxum yox, texnika yox!. Bu belə olduğu halda, bəs kəndçi neynəməlidir? Ya küçələrə düşüb dilənməlidirlər, ya da ki rayonu tərk etməlidirlər. Adicə Saatlı kəndində düz 20 ildən çoxdur ki, heç bir meliorasiya işləri aparılmır. “Ağa nəzərəm, belə gəzərəm” deyən su təsərrüfatı idarəsinin müdiri Tahir Rzayev, indiyə kimi rayon sakinlərini su üzünə həsrət qoyaraq, ancaq öz biznesi ilə məşğul olmaqdadır. Rayonun içməli su təchizatı da bərbad vəziyyətdədir. Çirkli kollektorlar iy verən suları camaatın əsas istifadə etdiyi kanallara axıdılır. Sakinləri belə bir yolla istismar edib əzab-əziyyət içində öldürürlər. Digər tərəfdən, banklar da günümüzü lap qara edib ki, bunların içərisində “Kapital bank” daha öndə gedir. Görəsən bu bank kimə məxsusdur və onun başında kimlər dayanıb ki, rayon filiallarının rəhbərliyində olanlar heç kimdən çəkinmirlər. Hər cür saxtakarlığa, hər cür qanunsuzluğa əl atırlar. Yalanları elə düzüb-qoşurlar ki, sanki ovuclarının içindəki həqiqətləri söyləyirlər. Ehtiyac üzündən övladlarımızı bu gün məktəbə göndərə bilmirik. Amma, məmurlarımız gəzməli-görməli olan ölkələrdə yeyib-içib keflərini çəkirlər. “Kapital bank”ın rayon filialının müdiri Sakit Zahidov, sanki rayonun yarısını satın alıb. Hansı pullarla, deyə müsahibim bildirdi. Qəm-qüssə içində kədərli həyat sürən, qəlbi nifrət hissi ilə dolu olan müsahibimdən beləcə ayrıldım. Gördüklərim məni dəhşətə gətirmişdi. Ardı var

İlham Süleymanov