Son vaxtlar Tərtər rayonunda dövlət büdcəsindən ayrılan milyonlarla vəsaitin asanlıqla yuyulması barədə, dövrü mətbuatda silsilə tənqidi məqalələr yer almaqdadır. İşıq üzü görən açıqlamalarda qeyd olunur ki, Tərtər rayon İcra Hakimiyyətinin başçısı vəzifəsini daşıyan Müstəqim Məmmədov, bu gün də “abadlıq və quruculuq” işləri adı altında talançılıqla məşğul olur.
Fakt budur ki, yeni “abadlıq” işlərinin görülməsi məqsədilə, ilk öncə rayon mərkəzinin bir çox əraziləri bərbad hala salınır, az sonra da gözdən pərdə asmaqla təmir-bərpa işləri həyata keçirilir. Diqqət yetirmək lazımdır ki, təmir olunan, abadlaşdırılan ərazilər heç bir il keçməmiş yenidən təmirə dayandırılır və həmin ərazilərdə təkrar təmir işləri davam etdirilir. Bu cür əməliyyatlar hesabına isə, büdcədən küllü miqdarda pullar silinir.
Bir neçə gün bundan öncə “Gündəm Xəbər”in elektron poçtuna yerli sakinlər tərəfindən şikayət məktubu daxil olmuşdu. Sakinlər yazırlar ki, “Müstəqim Məmmədov abadlıq adı altında və özünün yaxın adamlarının vasitəsilə büdcə pullarını talamaqda davam edir. Rayonun rəhbəri mərkəzi əraziləri tez-tez təmir elətdirir, amma rayon mərkəzindən kənar ərazilər isə, sanki xarabazarlığa oxşayır. Adicə şəhid və Qarabag müharibəsi əlillərinin yaşadıqları binaya məxsus 2 kanlizasiyasının üstü düz 4 ildir ki, açıqdır. Onu bir kimsə qaydaya salmır və problemin həlli ilə bağlı dəfələrlə aidiyyəti qurumlara şikayətlər olunsa da, bir kimsə edilən şikayətlərə məhəl belə qoymurlar”.

“Gündəm Xəbər”ə çatdırılan başqa bir məlumatlarda o da bildirilir ki, “Müstəqim Məmmədovun Yevlaxdan gətirdiyi komanda, bu gün Tərtərdə əməlli-başlıca “at oynadır” və icra başçısı onlara heç “qaşın üstə qara var” da demir. Məsələn, başçının 1-ci müavin Ramiz Şabanov, İctimai-siyasi və humanitar məsələlər şöbəsinin müdiri Elvin Umudov və bir neçə vəzifə sahibləri, məhz “Yevlax qruplaşması”nın üzvləridirlər ki, başçı da əyri işlərini onların əli ilə görür. Müstəqim Məmmədov daha çox “qara işlərini” özü ilə Yevlaxdan gətirdiyi və bu gün icra hakimiyyətində məsləhətçi vəzifəsini daşıyan Çingiz İsayevin vasitəsilə həyata keçirir”.
İcra başçısının kənd icra nümayəndələrindən rüşvət toplaması da, redaksiyamıza daxil olan ilginc məlumatlardandır. Belə ki, bu gün Tərtər rayonunda cəmi 74 kənd var və hər bir nümayəndəliyin 200 manat maaş alan mühasiblərinin hər birindən, hər altı ay ərzində 800 manat “haqq-hesab” alınır. Bu hələ harasıdır, icra başçısının yüksək çinli vəzifə sahiblərindən hər ay yüksək məbləğdə rüşvət alması da, daxil olan məlumatlardandır.

Müstəqim Məmmədovun Tərtərə icra başçısı təyin olduğu ilk günlərdə, sakinlərə məxsus fərdi yaşayış evlərinin hasarlarını uçurtdurması və həmin yerlərin yenidən satışa çıxarılması da, məhz, onun ittiham olunmasına əsas verən səbəblərdir. Məsələn, sakinlər bildirirlər ki, “Müstəqim Məmmədov sakinlərin darvasasını sökdürdü, daşdan və “setka”dan olan hasarlarını viran etdirdi, indi də həmin yerləri satışa çıxartdırır. Başçının sökdürdüyü ərazilərin təkrar satışa çıxarılmasına, icra hakimiyyətində baş memar vəzifəsini daşıyan Tofiq müəllim nəzarət edir. Əldə olunan pullar da, məhz onun vasitəsilə ünvan üzrə çatdırılır.
Onu da vurğulayaq ki, Müstəqim Məmmədov Tərtər RİH-nin başçısı təyin olunmazdan əvvəl, Yevlax şəhər İcra Hakimiyyəti başçısının müavini–şəhər təsərrüfatı şöbəsinin müdiri vəzifələrini daşıyıb. Hal-hazırda o, icra başçısı olsa da, bu gün onun Yevlaxda tikinti materiallarının istehsalı və satışı ilə məşğul olan, eləcə də bir sıra ictimai-iaşə obyektləri var. Çox yaxın vaxtlarda Müstəqim Məmmədova məxsus obyektlərin siyahısını və foto-şəkillərini geniş ictimaiyyətin diqqətinə çatdırmağa çalışacağıq. O halda hər kəs biləcək ki, icra başçısı vəzifəsini daşıyan bu şəxsin maliyyə imkanları, heç də ölçüyəgəlməzdir.
Araşdırmamız davam edəcək.

Akif