Hüquq müdafiəçisi Bəşir Süleymanlı DİN-in Baş Mütəşəkkil Cinayətkarlıqla Mübarizə İdarəsində (BMCMİ) dindirilib.

Bəşir Süleymanlı Toplum Tv-yə açıqlamasında yanlış məlumata görə saxlanıldığını bildirib: “Saat 12 radələri idi. Polislər özlərini təqdim edib, onlarla Baş Mütəşəkkil Cinayətkarlığa qarşı Mübarizə idarəsinə getməli olduğumu dedilər. Rəis mənimlə görüşməli idi, lakin orada olduğum 6 saat ərzində rəislə görüşə bilmədim, deyəsən, çox məşğul idi. Belə bir yanlış məlumat daxil olub ki, mənim Cahangir Hacıyevlə əlaqəm var və guya mənim onun siyasi məhbus kimi tanınmasında rolum olub. Aydınlaşdırdıqdan sonra isə məlum oldu ki, mənim Cahangir Hacıyevlə heç bir əlaqəm yoxdur və məni buraxdılar”.
Daxili İşlər Nazirliyinin mətbuat xidmətinin rəisi Ehsan Zahidov isə gönorta saatlarında Toplum TV-yə açıqlamasında Bəşir Süleymanlı haqda heç bir məlumatının olmadığını qeyd etmişdi.
Bəşir Süleymanlının saxlanması ilə bağlı Demokratik Təşəbbüslər İnstitutunun rəhbəri Akif Qurbanov Sivil Toplum Platforması (STP) üzvləri adından açıqlama yayıb. O, STP qurucularından olan hüquq müdafiəçisi Bəşir Suleymanlının yoxa çıxmasından narahatlıqlarını ifadə edib:
“Onun vəziyyəti haqqında hakimiyyət orqanlarından məlumat istəyirik. Vəkil Elçin Sadıqovun verdiyi açıqlamadan, Başir Süleymanlının öz həyat yoldaşına telefon zəngində dediyi sözlərdən, Azərbaycanda oturuşmuş praktikadan belə qənaət hasil olur ki, onu polis orqanları saxlayıb. Ona görə də STP olaraq Daxili İşlər Nazirliyindən və aidiyyatı hakimiyyət orqanlarından onun yeri və durumu barədə açıqlama tələb edirik”.
Martın 30-da hüquq müdafiəçisi Bəşir Süleymanlının atası 66 yaşlı Süleyman Süleymanov Yevlax şəhər Polis İdarəsinə çağrılmışdı.
Bəşir Süleymanlının yaydığı məlumata görə, əməliyyatçı Süleyman Süleymanovun yaşadığı mənzilə gələrək polis rəisinin onu idarəyə çağırdığını deyib. İdarədə ona ailə tərkibi, nə işlə məşğul olmaları, partiya üzvlüyü, ümumilikdə əməliyyat xarakterli suallar ünvanlanmışdı. Bundan əlavə, ondan telefonunun, maşınının nömrəsi və kimin adına olması barədə məlumatlar istənmişdi.
Seçkilərin Monitorinq və Demokratiya Mərkəzinin direktoru Bəşir Süleymanlı 2014-cü ilin may ayında 2 il vəzifə tutmaq hüququndan məhrum edilməklə 3 il 6 ay azadlıqdan məhrum olunub.
O, 2015-ci ilin 19 martında əfv edilib.
Argument.az