O, 17 mart 2017-ci il tarixdə başına gətirilənlərlə bağlı aidiyyəti qurumlara şikayət məktubları ünvanlasa da, son anda heçnə dəyişmir və günahkarlar da cəzalandırılmır


Bu xəbəri “Gündəm Xəbər” qəzetinə keçmiş siyasi məhbus Asif Lətifovun yaxınları çatdırıblar. Adı çəkilən şəxs günəgün cəzasını çəkərək 28 fevral 2017-ci il tarixdə azadlığa çıxsa da, hal-hazırda onun səhhətinin olduqca ağır durumda olduğu bildirilir. İndiki halda onun sağlamlığının yüz faiz bərpa olunacağını düşünmək olduqca müşkül məsələdir. Asif Lətifovun sağlamlığının 70-80 faiz səviyyəsində bərpa olunması, yəqin ki, onun yaxınlarının xoşbəxt olmasına da səbəb olar. Bu şəxs xəstəliyi cəza çəkdiyi həbsxanada tapıb. O, cəza çəkərkən vəziyyəti 2015-ci ilin oktyabr ayında olduqca ağırlaşır və çox keçmir ki, onu Penitensiar Xidmətin Müalicə Müəssisəsinə yerləşdirirlər.
Ümumiyyətlə, xəstə olan hər kəsin durumunu açıqlamaq, müzakirə mövzusuna çevirmək olduqca ağır məsələdir. Yaxşı olar ki, Asif Lətifov da hər ay müayinə olunsun və təyin olunan dərman preparatlarını qəbul etsin ki, sağlamlıq durumu az-çox bərpa oluna bilsin. Bunun üçün Asif Lətifov təmiz havada çox olmalıdır və ona müntəzəm sistem də qoşulmalıdır. Onun hər ay klinikada müayinə və analizlərinə üstüstə 110 AZN-dən çox pul tələb olunur. Sifarişli həbsin nəticəsi olaraq və Asif Lətifovun xəstə ola-ola dəfələrlə karsa (cərimə təcridxanasına) salınması, onun belə bir duruma düşməsinə də səbəb olub. Cəza çəkdiyi doqquz il ərzində səhhətindəki çoxsaylı problemlərin varlığına baxmayaraq, müəssisəsinin rəisi müxtəlif bəhanələrlə onun bir neçə dəfə soyuq karsa salınması haqda göstərişlərini də verir. Karsda ona həkim tərəfindən təyin edilmiş dərman preparatlarının qəbuluna qadağa da qoyulur. Ona qarşı atılan haqsız addımlardan Ombudsmana və yuxarı təşkilatlara şikayət etmək üçün, kağız və qələm belə vermirlər və KİV-i ilə vasitəsilə informasiya əldə etmək hüququna da məhdudiyyət qoyulur. Bundan əlavə, cəzaçəkmə müəssisəsinin rəhbərliyi Asif Lətifova “əgər cəza qərarından digər qurumlara şikayət edərsənsə, o halda Müəssisə Kollektiv Şurasının məhkumları bir-bir sənin üzünə duracaqlar” deyir. Bu barədə Asif Lətifov dəfələrlə Dövlət Təhlükəsizlik Xidmətinin 9 saylı cəzaçəkmə müəssisəsi üzrə kuratoruna ərizə ilə müraciət etsə də, onun problemi heç bir halda həllini tapmır. Yalnız ona “DTX-nin kuratoru səni qəbul etmək istəmir” deyə cavablar çatdırılır. 30 oktyabr 2016-cı ildə və 31 oktyabr 2016-cı il tarixlərdə yazdığı ərizələr isə, Asifin özünə qaytarılmır. 11 oktyabr və 20 avqust 2015-ci il tarixlərdə 9 saylı cəzaçəkmə müəssisəsinə məxsus yeməkxananın ərazisində yerləşən və Asif Lətifova məxsus olan soyuducunun qıfıl taxdığı petlələrin küt alətlə sındırılması və içərisindəki ərzaqların oğurlanması, çox keçmir ki, müəyyən problemə də çevrilir. Bu barədə Asif Lətifov 9 saylı cəzaçəkmə müəssisəsinin rəisinə və müavininə ərizə ilə müraciət etsə də, son anda heç nəyə nail ola bilmir. Bunu danmaq üçün ya kar, ya da ki, kor olmalısan. Son anda da Asifin özü borclu çıxarılır.

Asif Lətifov cəza çəkdiyi müddət ərzində müxtəlif vaxtlarda, yəni 14 avqust 2014-cü il tarixdə beş sutka, 01 oktyabr 2015-ci il tarixdə xəbərdarlıq elan edilərək 6 saat, 19 sentyabr 2016-cı il tarixdə isə 14 saat müddətində karsda saxlanılır. Karsda saxlandığı vaxtlarda Asif Lətifov haqsız və sifariş əsasında karsa salındığına görə, hətta qida qəbulundan da imtina edir. O, 19 sentyabr 2016-cı il tarixdə isə, on gün su və şəkərdən başqa heçnə qəbul etmir, eyni zamanda tətbiq olunan cəzaya da etiraz edir. Hətta, 26 sentyabr 2016-cı ildə keçirilən referendiumda onun iştirakına müxtəlif səbəblər üzündən qadağa qoyulmasını, keçmiş siyasi məhbus özü də təsdiq etdi. Onun özü “Gündəm Xəbər”in əməkdaşı ilə söhbətində bildirir ki, “9 saylı cəzaçəkmə müəssisəsinin rəhbərliyi mənə qatı cinayətkar kimi baxırdı”. Asif Lətifov 17 mart 2017-ci il tarixdə başına gətirilənlərlə bağlı aidiyyəti qurumlara şikayət məktubları ünvanlasa da, son anda heçnə dəyişmir və günahkarlar da cəzalandırılmır.
Xatırladaq ki, Asif Lətifov 17 il Xüsusi Dövlət Mühafizə Xidmətinin “BETA”-dəstəsində zabit olub. Dəfələrlə “Qüsursuz xidmət”lərinə görə müxtəlif orden və medallarla da təltif olunub. 2014-cü ilin may ayında xidmət vaxtı gizlədilmiş odlu silahı ayıq-sayıqlığı sayəsində tapıb rəhbərliyə təqdim etdiyinə görə, general V.Ə.Axundov tərəfindən pul mükafatına da layiq görülür.
“BETA” dəstəsinin rəisi polkovnik Rzayev Fikrət Əşrəf oğlunun qeyri-qanuni hərəkətlərini, onun korrupsioner əməllərini, həmçinin səriştəsizliyini XDMX-nin rəhbərliyi qarşısında sübuta yetirdiyinə görə, çox keçmir ki, Asif Lətifov işindən də kənarlaşdırılır. O, belə bir qərarla razılaşmayaraq işə bərpa və məcburi işə buraxılmamağa görə, məhkəməyə müraciət etməli olur. Hüquqları uğrunda mübarizəyə başladıqdan sonra, 1(bir) il 3 (üç) aydan sonra onun barəsində sifarişli qərar çıxarılmasına start verilir. 06 mart 2011-ci ildə XDMX-nin Müfəttiş-Təşkilat İdarəsinin rəis müavini polkovnik Müşfiq Məmmədova təqdim etdiyi sübutlar, çox keçmir ki, Asif Lətifovun əksinə yönəldilir. Maddi sübutlar saxtalaşdırılaraq uydurma ittihamlarla ona 5 il 6 ay müddətinə cəza təyin olunur. Ali Məhkəmə onun cəzasını bir il yüngülləşdirərək, cəza müddətini 4 il 6 aya endirir. Fransada mühacir həyatı yaşayan MTN-i İstintaq Baş İdarəsinin sabiq zabiti Ramin Nağıyev və Müdafiə Nazirliyinin sabiq zabiti Ələkbər Məmmədov, hələ xeyli vaxt bundan Asif Lətifovun sifariş əsasında həbs olunduğunu və onun günahsız olduğunu açıqlamışdılar. Hal-hazırda Asif Lətifovun həbsi ilə bağlı cinayət işi Avropa Məhkəməsinin icraatında olduğu bildirilir. BMT, Fredium House, Amnesty İnternational, Human Right Vateh və digər nüfuzlu təşkilatlar Asif Lətifovu “Siyasi məhbus” elan etmişlər. 14 noyabr 2012-ci ildə işə bərpa və məcburi işə buraxılmamağa görə əmək haqqının ödənilməsi tələbi ilə, onun Avropa İnsan Haqları Məhkəməsinə göndərdiyi şikayət təmin olunmur. 14 mart 2013-cü il tarixdə Strasburqdan gələn № 99001 nömrəli cavab məktubunda Azərbaycan nümayəndələri qeyd edirlər ki, İnsan Hüquqları üzrə Avropa Məhkəməsi işə bərpa və əmək haqlarının ödənilməsi tələbinə əsaslanan şikayətə baxılmır. İddiaçı tərəf isə, Avropa Məhkəməsinin 14 mart 2013-cü ildə göndərdiyi məktuba şübhə ilə yanaşır və tətbiq olunan qərarları ədalətli qərar hesab etmir.
Mövzu diqqətimizdədir.

Rəsafil

gundemxeber.az