14:46

Səhiyyə Nazirliyi Sumqayıt şəhəri H.Z.Tağıyev qəsəbəsində əhali arasında iyunun 7-dən qeydə alınan mədə-bağırsaq infeksiyası ilə bağlı apardığı laborator müayinələrin nəticəsini açıqlanıb.

gundemxeber.az xəbər verir ki, Səhiyyə Nazirliyinin mətbuat xidmətinin rəhbəri Liya Bayramova Trend-ə bildirib ki, uşaqlardan götürülmüş nümunələrin laborator müayinələri nəticəsində xəstələrdə rotavirus aşkar edilib:

"Yayılma yolunun əsasən su olduğunu nəzərə alaraq, infeksiyanın baş verməsinə səbəb paylayıcı su şəbəkəsinin olduğu ehtimal olunur. Qeyd olunanlarla əlaqədar suyun təmizlənməsi və zərərsizləşdirilməsi tədbirləri ciddi nəzarətə götürülüb, aparılan laborator müayinələrin sayı artırılıb. Hazırda suyun tərkibi dövlət standartlarının tələblərinə cavab verir".

Bundan əvvəl "Azərsu" ASC-dən Trend-ə bildirilib ki, Sumqayıt şəhəri, H.Z.Tağıyev qəsəbəsində qeydə alınmış hadisə içməli su ilə əlaqəli deyil və vətəndaşların narahatlığı üçün heç bir əsas yoxdur. "Azərsu" ASC tərəfindən Abşeron yarımadasını içməli su ilə təmin edən mərkəzləşdirilmiş su təchizatı sisteminin mənbədən istehlakçıya qədər bütün mərhələlərində təsdiqlənmiş plan-qrafikə uyğun olaraq gündəlik su nümunələri götürülüb yoxlanılır. Eyni zamanda bu sahədə dövlət nəzarətini həyata keçirən Səhiyyə Nazirliyinin Gigiyena və Epidemiologiya Mərkəzinin mütəxəssisləri də su təchizatı sistemlərində monitorinqlər aparır.

ASC-dən qeyd ediblər ki, Şollar və Ceyranbatan mənbələri Sumqayıt şəhəri ilə yanaşı, Abşeron yarımadasının digər yaşayış məntəqələrini də içməli su ilə təmin edir və bu ünvanlarda belə hal qeydə alınmayıb.

L.Bayramova bildirib ki, son 4 gün ərzində 136 uşaqda infeksiya əlamətləri aşkar olunub. Hazırda 46 uşağın stasionar müalicəsi davam etdirilir, onların vəziyyətləri kafidir və yaxın vaxtlarda evə buraxılacaqlar.

L.Bayramovanın sözlərinə görə, infeksiya baş vermiş ərazidə tibbi profilaktik tədbirlər davam etdirilir.

Qeyd olunan ərazidə əhali arasında mədə-bağırsaq infeksiyasının baş verməsilə əlaqədar dərhal operativ qərargah yaradılıb, Səhiyyə Nazirliyi və Sumqayıt şəhər İcra Hakimiyyətinin aparıcı mütəxəssisləri tərəfindən hadisənin səbəblərinin araşdırılmasını və aidiyyəti qurumlarla birgə kompleks əksepidemik tədbirlərin həyata keçirilməsinə başlanılıb.

Qeyd edək ki, 2 gün əvvəl Sumqayıt şəhərində azyaşlı uşaqlar arasında kütləvi zəhərlənmə ilə bağlı Sumqayıt şəhər Uşaq Xəstəxanasına çox sayda müraciət daxil olub.

14:23

Sumqayıt şəhərində sudan zəhərləndiyi iddia edilən uşaqlarda "Rotavirus" aşkarlanıb.

gundemxeber.az xəbər verir ki, Səhiyyə Nazirliyinin Gigiyena və Epidemiologiya Mərkəzinin direktoru İmran Abdullayev lent.az-a açıqlamasında bildirib ki, iyun ayının 9-10-da uşaqlardan götürülən nümunələrin laboratoriya müayinələrinin nəticələrinə görə, onlarda "Rotavirus" infeksiyası aşkar edilib: ""Rotavirus" infeksiyası azyaşlı uşaqlar arasında baş verən bir xəstəlikdir və əsasən sudan keçir. Bu nümunələrin laboratoriya nəticələrindən aşkarlanan törədici sübut edir ki, infeksiya sudan keçib".

İ.Abdullayev deyib ki, 4 gün ərzində 136 uşaqda belə infeksiya əlamətləri müşahidə edilib: "Hazırda 46 uşağın stasionar müalicəsi davam etdirilir. Onların vəziyyəti kafidir və yaxın vaxtda evə buraxılacaqlar. İnfeksiya baş vermiş ərazidə tibbi-profilaktik tədbirlər və əhali arasında sanitariya-maarifi işləri davam etdirilir".

İ.Abdullayev əlavə edib ki, "Rotavirus"un yayılma yolunun əsasən su olduğu nəzərə alınaraq, infeksiyanın səbəbinin su şəbəkəsi olduğu ehtimal edilir: "Bu qeyd olunanlarla əlaqədar olaraq, suyun təmizlənməsi istiqamətində tədbirlər ciddi nəzarətə götürülüb. Aparılan laborator müayinələrin sayı da artırılıb. Bu gün də biz həmin ərazidən su nümunələrinin götürülməsini davam etdiririk. Hazırda ayın 9-10-da götürülmüş su nümunələrinin nəticələrinə görə, suyun tərkibi bütün standartlara cavab verir. Amma hadisə ayın 7-də baş verib və o gün suyun tərkibində nəyin olub-olmadığına dair nə isə demək mümkün deyil. Çünki ayın 7-dən sonra suda xlorlama işləri aparılıb.

"Azərsu" ASC-nin əməkdaşları ilə birgə infeksiyanın yayıldığı həmin ərazilər xəritələşdirilib və bizə təqdim olunub. Həmin xəritə üzrə bütün nöqtələrdən bir neçə gün ərzində müqayisəli şəkildə su nümunələri götürüləcək. Bu məsələnin gündəlikdə saxlanması məqsədilə 10 gün ərzində işlər davam etdiriləcək. Bu proses tamamilə nəzarət altındadır. Problem aradan qaldırılana qədər gücləndirilmiş rejimdə işlər davam etdiriləcək".

Respublika Gigiyena və Epidemiologiya Mərkəzində Baş direktorun epidemiologiya məsələləri üzrə müavini Afaq Əliyeva isə Lent.az-a bildirib ki, "Rotaviorus" infeksiyası əsasən çirkli əllər vasitəsilə keçir.

Bu infeksiyanın uşaqlar arasında geniş yayıldığını deyən A.Əliyeva bildirib ki, infeksiya çiy sudan da keçə bilər: ""Rotavirus" infeksiyasına qarşı peyvənd var, amma ölkəmizdə bu virus geniş yayılmadığı üçün buna qarşı peyvənd tətbiq edilmir. Ola bilsin, gələcəkdə bu məsələ müzakirə edilsin".

A.Əliyeva bildirib ki, virusdan qorunmaq üçün gigiyenik qaydalara əməl etmək lazımdır: "Əlləri tez-tez yumaq lazımdır. Meyvə-tərəvəzləri yaxşı yumamış yemək olmaz".

13:42

Sumqayıt şəhərində zəhərlənən uşaqlarda aşkarlanan virusun adı açıqlanıb.

gundemxeber.az xəbər verir kİ, Səhiyyə Nazirliyinin mətbuat xidmətindən report-a verilən məlumata görə, uşaqların qanından götürülmüş nümunələrin laborator müayinələrinin nəticəsində xəstələrdə Rotavirus infeksiyası aşkar edilib.

Son dörd gün ərzində 136 uşaqda bu infeksiya aşkarlanıb.
Nazirlikdən verilən məlumada bildirilir ki, hazırda 46 uşağın stasionar müalicəsi davam etdirilir:

"Onların vəziyyətləri kafidir və yaxın vaxtda evə yazılacaqlar. İnfeksiya baş vermiş ərazidə tibbi-profilaktik tədbirlər və əhali arasında sanitariya-maarifi işləri davam etdirilir".

Qeyd edək ki, Rotavirus fəsil dəyişkənliyi ilə əlaqədardır, xüsusilə uşaqlarda, immuniteti zəif olan insanlarda bu xəstəliyə rast gəlinir. Rotavirus 48 saatdan az davam edən qızdırma, qusma ilə başlayır. Sulu, əsasən pis qoxu gələn qansız ishal bu əlamətlərə aiddir. Südəmər uşaqlarda qusma, ishal bədəndə suyun azalmasına gətirib çıxarır. İmmuniteti zəif olan insanlarda xəstəlik uzunmüddətli və ağır olur. Bu xəstəlik 5-10 gün müddətində davam edir. Gigiyenik tədbirlər (əlin yuyulması, suyu qaynadaraq içmək) xəstəliyin qarşısını alır.