Azərbaycan hakimiyyəti yerli və beynəlxalq səviyyədə dayaqlarını itirdikcə repressiya siyasətini gücləndirir. Son zamanlar biz bu siyasətin artan xətt üzrə davam etdiyini görürük. Hökümət xalqın sosial rifah halını yaxşılaşdırmaq, ölkədə siyasi və iqtisadi islahatlar aparmaq, yeni iş yerləri açmaq, insanların yaşayış səviyyəsini artırmaq əvəzinə, korrupsiyanı və monopoliyanı gücləndirir, boşalan büdcəni sadə vətəndaşların hesabına doldurmağa çalışır. Xalqın artan narazılığının qarşısını almaq, hakimiyyətini qorumaq üçün repressiv metodlara əl atır.
Bir neçə aydır ki, vətəndaşların alternativ mənbələrdən məlumat almaq imkanlarını məhdudlaşdrmaq üçün aparıcı tənqidçi, informasiya resurslarına, saytlara giriş Respublika Prokurorluğunun təqdimatı əsasında məhkəmə qərarı ilə məhdudlaşdırılıb. azadliq.org (“Azadlıq Radiosu”), azadliq.info (“Azadlıq” qəzeti), “azerbaycansaati.com” domenlərinə, habelə Turan telekanalına (Turan TV) giriş bloklanıb. Həmçinin azad və müstəqil media qurumlarından olan "Meydan.tv", 24saat.org və abzas.net saytlarına da giriş məhdudlaşdırılıb, “Kanal13” internet televiziyasının Bakı ofisinin rəhbəri Əziz Orucov həbs edilib. Azad fikir dayışıcısı olan jurnalistlər polis və prokurorluq orqanlarına çağrılaraq təhdid olunur, həbs edirlir. Hazırda 10- dan yuxarı jurnalist və blogger, ümumilikdə isə 160- dan çox şəxs siyasi motivlərlə həbsdədir. Bu yaxınlarda araşdırmaçı jurnalist Əfqan Muxtarlının Tbilisdə başına çuval keçirilərək oğurlanıb Bakıya gətirilməsi və absurd ittihamlarla həbs edilməsi isə dövlət səviyyəsində həyata keçirilən adam oğurluğu cinayətinin Azərbaycan nümunəsi ikimi qara ləkə olaraq tariximizə keçdi. Acınacaqlı və təəssüf doğuran haldır ki, Azərbaycan hakimiyyəti bu addımı ilə beynəlxalq səviyyədə təkcə özünü ifşa etmədi, demokratik dünyaya açılım edən Gürcüstan respublikasının imicini də zərbə və şübhə altına qoydu.

Əfqan Muxtarlının həbsindən öncə Gürcüstanda yaşayan və fəaliyyət göstərən azərbaycanlı iş adamı, “Lancet” klinikasının təsisçisi Fərman Ceyranlının həbs edilməsi, Gözəl Bayramlının, “Namaz məhbusu” kimi tanınan Sərdar Babayevin absurd ittihamlarla azadlıqdan məhrum edilməsi rəsmi Bakının sifarişi və iştirakı ilə öncədən planlaşdırılan və həyata keçirilən ssenarisinin tərkib hissəsi idi. Əfqan

Son zamanlar bütün baş verənlər onu göstərir ki, Azərbaycan sürətlə avtoritarizmə sürüklənməkdədir. Azad mətbuat, vətəndaş cəmiyyəti, siyasi müxalifət sıradan çıxarılır. Tənqidçi və fərqli fikrin susdurulması üçün bütün ölkə boyu qanunsuz həbslər həyata keçirilir. Hakimiyyət cəmiyyəti tam müqavimətsiz vəziyyətə gətirmək və 2018- ci ildə keçirilməsi nəzərdə tutulan prezident seçkilərinə alternativsiz namizədlə getməklə ölkədə monorxiya hakimiyyətini növbəti dəfə gücləndirmək istəyir. Bütün bunlar isə Azərbaycan xalqının mənafeyi, ölkə konistitusiyası, yerli və beynəlxalq hüququn prinsipləri ilə daban- dabana ziddiyyət təşkil edir.

Klassik Xalq Cəhbəsi Partiyası olaraq hakimiyyətdən tələb edirik;

- Ölkədə həyata keçirilən repressiya siyasəti durdurulsun, həbsdə olan bütün siyasi məhbuslar qeyd- şərtsiz azadlığa buraxılsın;

- Mətuata olan təzyiqlərə son qoyulsun, azad medianın fəaliyyətinə mane olan inzibati müdaxilələr aradan qaldırlsın;

- Xalqın sosial rifah halının yaxşılaşması, kölgə iqtisadiyyatının, korrupsiyanın, monopoliyanın aradan qaldırılması üçün təxirəsalınmaz tədbirlər görülsün;

- Ölkədə demokratik seçki mühitinin yaradılması, vətəndaş cəmiyyətinin inkişafı üçün qanunvericilk aktlarına, seçki məcəlləsinə dəyişklik edilsin. Avropa Şurası Venesiya Komissiyasının tövsiyyələri əsasında nəzəri və praktiki addımlar atılsın.