Mehman Əliyev: “Biz 15 ildir ki, böhranlı durumdayıq”

Turan İnformasiya Agentliyinin direktoru Mehman Əliyevlə müsahibəni “Gündəm Xəbər”in çoxsaylı oxucularına təqdim edirik:

- Mehman bəy, Vergilər Nazirliyi yanında Vergi Cinayətlərinin İbtidai Araşdırılması Departamenti avqustun 7-də rəhbəri olduğunuz Turan İnformasiya Agentliyinə qarşı cinayət işi açıb və ibtidai istintaqa başlayıb. Eyni zamanda, həmin departament avqustun 8-də agentliyin fəaliyyətinin səyyar vergi yoxlamasına başlayıb. Fakta münasibətiniz nədən ibarətdir?

- Faktın özünü ciddi qiymətləndirirəm.

- Hansı mənada?

- O mənadakı ictimaiyyət, beynəlxalq aləm, cəmiyyətimiz görür k, bizim vergi qurumları nə işlə məşğul olur. Yəni qanun pozuntuları göz qarşısındadır və bu danılmaz durumdur. Mən uşaqlara deyirəm ki, Allah bizi o qədər sevir ki, bundan öncədə bu kimi hallar baş verib, amma sonda səhv tərəf kimi həmin vergilər qurumu çıxıb. Bundan əvvəl bizə 3 min cərimə yazdılar, sonra hesabdan 5 minə həbs qoydular, sildilər və s. Bununla bağlı Vergilər Nazirliyi özü bu qərarı ləğv edir, yüksək səviyyədə yoxlama aparır, az qala bizdən də üzr istəyirlər. Biz deyirik ki, bizdən nə istəyirsiniz, bunu kim edibsə onu cəzalandırın. Lakin cəzalandırmadılar. Əgər cəzalandırsaydılar indi bu hal baş verməzdi. Amma fakt odur ki, bu hal indi baş verdi. Belə bir biabırçı qərarın vertilməsi nonsensdir.
İkincisi, bu onu göstərir ki, Vergilər Nazirliyi daxilində bilmirlər ki, kim nə qərarı verib, kim nə yoxlayıb.
Üçüncüsü, elə tapşırıq verilib ki, həmin Vergilər Nazirliyinin müvafiq orqanı birinci səhv etmişdi, ancaq ikinci səhvi üçqat edib. Yəni məcburiyyət qarşısında. Bu anormal haldır. Bu Vergilər Nazirliyinin və onun strukturlarının nə gündə olduğunu göstərir. Mənim üçün vacibi odur ki, bu hal göründür.

- Necə düşünürsünüz, bu Vergilər Nazirliyinin müvafiq idarələrinin şəxsi qərarıdır, yoxsa sifariş verənlər olub?

- Vergilər Nazirliyi ilə bizim aramızda 2008-ci ildə və 2013-cü ildə buna oxşar hadisə olub. Hər ikisində də prezident seçkiləri keçirilirdi. İndi də biz yenidən keçid dövrünə düşmüşük. Məlumat üçün qeyd edim ki, 2013-cü ildə biz məhkəmələr yolu Vergilər Nazirliyini udduq. O zaman bizdə törəmə müəssisə olan Turan-Servisi iflic vəziyyətə salmışdılar və 8 min manat pul silmişdilər. Mən bir il ərzində məhkəmələrdə oldum və qarşı tərəfi uddum. Çünki ortaya bir fakt çıxara bilmədilər. 2008-ci ildə də buna oxşar hal yarandı, nəticədə ortaya yazışmalar çıxdı, sonda məcbur olub bizdən əl çəkdilər.
Mən sonuncu işlə bağlı müstəntiqin yanında olanda açıq dedim ki, bu siyasi sifarişdir, qərəzli yanaşmadır və bizə qarşı yönələn bu hərəkətin arxasında fakt yoxdur. Bizə deyirlər ki, sizə qərar göndərmişik, filan illərdə vəsait göstərilməyib. Özü də, göndərəndən bir gün sonra sual edir ki, araşdırma aparmısınızmı? Mən də deyirəm ki, yoldaş, siz bizə tezis formasında göndərmisiniz və yazmısınız ki, belədir. Deyirəm siz ortaya sübut qoyaraq deməlisiniz ki, ortada olan bu faktlardır, onu təsdiq edirsiniz, ya etmirsiniz?. İndi mənə göstər ki, hansı qanunu pozmuşam, ortaya fakt qoy?. Üzümə baxır. Nə göstərəcək mənə, bəyəm özünün xəbəri var ki?



- Açılan cinayət işi ilə bağlı siz İnzibati-İqtisad Məhkəməsinə müraciət etmisiniz. Perspektivdən nə gözləyirsiniz?

- Mən başa düşürəm ki, məhkəmələr də asılı durumdadır. Bunu özüm qənaətim əsasında deyirəm. Nəzərə alın ki, mən korrupsiya faktları ilə bağlı dövlət orqanlarını məhkəmələrə vermişəm. Misal kimi Azərsunu, Bakı Şəhər İcra Hakimiyyəti ilə bağlı prosesim olub. Məhkəmələrdə gedən proseslər onu göstərir ki, tapşırıqdan kənara çıxmırlar. Biz ictimaiyyətə məhkəmə çərçivəsində nələrin baş verdiyini də göstərəcəyik. Bizim üçün bu məqam da vacibdir ki, məhkəmədə baş verənləri ictimaiyyət görsün bə bilsin.

- Yerli məhkəmələri uduzduqdan sonra hansı addım ata bilərsiniz?

- Bilirsinizmi, yerli məhkəmələrin və lap sonda Avropa İnsan Hüquqları Məhkəməsinin hansı qərarlar çıxaracağı mənim üçün texniki məsələlərdir. Biz Turan İnformasiya Agentliyi olaraq illər boyu təzyiq altında olmuşuq. Görün mətbuat hansı günə düşüb ki, jurnalistlər özlərinə mənzil ala bilmirlər. Belə vəziyyətdə gəlib sənin üzərinə düşürlər ki, vergi verməmisən və s. Mən onlara dedim ki, görün mətbuat hansı günə salınıb ki, jurnalist özünə ev ala bilmir və dövlət jurnalistə ev verir. Götürün bu gün mətbuat orqanlarını, baxın görün onların gəliri var ya yoxdur?. Bizim medianın reklam bazarı faciəvi dərəcədədir, reklam bazarı ümumiyyətlə yox dərəcəsindədir. Biz beynəlxalq standartlara heç yaxın da deyilik. Dedim, anlayıram, sizə deyiblər və siz də edirsiniz, Ancaq başqa məsələlərə baxmaq lazımdır. Söhbət bundan gedir.

- Bəlkədə Azərbaycan mediasında ən intizamlı vergi ödəyicisi Turan İnformasiya Agentliyidir. Siz daima bu haqda danışmısınız. Nədən qəfildən belə probleminiz yarandı?

- İş ondadır ki, bizdə hər il yoxlama gedir. Amma ortaya heç nə çıxmayıb. Başqa sözlə, heç bir problem çıxmayıb. Ola bilər ki, bunlar 7 min yazıblar, bəlkə min çıxdı. Amma heç buna da inanmıram. Söhbət ondan gedir ki, bizə qarşı bu cür münasibət sadəcə olaraq təzyiqdir. Başqa məsələ yoxdur. Onlara deyirəm ki, əgər sizdə Turana qarşı bir şübhə varsa, birinci bizi dəvət edib deməli idiniz ki, təqdim edilən sənədlərdə ki, rəqəmlər üst-üstə gəlmir. Bu halda mən yenidən sizə rəqəm göstərməliyəm, sizdə yoxlama aparmalısınız. Yoxlamadan sonra əgər fakt varsa cinayət işi aça bilərsiniz. Orada dedim ki, Vergilər Nazirliyinin Bakı Şəhəri Lokal Gəlirlər Departamenti səhv edib və sonradan onun qərarı da ləğv edilib. Ancaq sən onun qərarı əsasında cinayət işi aça bilmərsən. Əvvəlcə yoxlama aparmalısan, sonra nəticəyə baxıb cinayət işi aça bilərsən. Vergilər Nazirliyinin Bakı Şəhəri Lokal Gəlirlər Departamenti heç bizi dəvət edib deməyib ki, gəlin sənədi göstərin. Bu da faktdır.
İkincisi, səyyar yoxlama təyin ediblər. Çox gözəl! Səyyar yoxlama aparılmalıdır ki, onun nəticəsi əsasında sən qərar verə bilərsən. Cinayət olmaya-olmaya, sübut olmadan necə cinayət işi açıblar? Şəxsən mən bunu anlamıram. Bu nə deməkdir? Bunlar necə işləyirlər?
Üçüncüsü, səyyat yoxlama aparan vergi məmuru deyir ki, sənədlərinizi gətirin idarəyə. Deyirəm ki, sizin işiniz səyyar yoxlama aparmaqdır. Bu o deməkdir ki, siz Turan-ın ofisinə gəlib əyləşməli və sənədləri yoxlamalısınız. İndi mən onlara verdiyim sənədlərin sürətini çıxarıram, möhür vurub verirəm ki, sabah deməsinlər ki, belə sənəd yoxdur. Anormal durumdur. Deyirəm əgər səyyar yoxlamadırsa, gəl əyləş yanımda işlə. Əks halda bu yoxlamanın adını dəyişin. Bunlar vacib proseslərdir və biz məhkəmədə Vergilər Nazirliyinin hərəkətlərini göstərəcəyik.

- İndi başlanan prosesin sonunda Turan üçün problemlərin yaranması, fəaliyyətin dayandırılması ehtimalı varmı?

- Bilirsinizmi, mənim qarşı tərəflə yüksək səviyyədə müzakirəm olub. Əməkdaşlıq təklifi veriblər və s. Mən də açıq demişəm ki, biz necə işləyiriksə, elədə işləyəcəyik. Yox, əgər işləmiriksə, bağlanacaq və gedib başqa işlə məşğul olacağıq. Bunun başqa yolu yoxdur. Odur ki, bu məsələlər bizim üçün problem deyil. Şəxsən mən bu vəziyyətə çoxdandan hazıram.

- Əgər cinayət işi açılırsa deməli avtomatik olaraq sizin ölkədən çıxışınıza yasaq qoyula bilər. Bu halda siz ölkəni tərk edə bilməyəsdiniz...

- Lap gözəl. Qoysunlar. Bəyəm mən ölkədən getmək üçün canfəşanlıq edirəm? Mən ömrümdə bir dəfə də olsun xaricə istirahətə getməmişəm. Çünki cibimdə pulum yoxdur. Bu illər ərzində bir dəfə də olsun ailəmi xaricə istirahətə apara bilməmişəm, çünki elə bir imkanlara sahib deyiləm. Mən xaricə ancaq beynəlxalq təşkilatların və xarici dövlətlərin dəvəti ilə gedib tədbirlərdə iştirak etmişəm. Mən öz puluma heç vaxt xaricə getməmişəm. Ailə üzvlərimi, övladlarımı nəinki xaricə, hətta Azərbaycan hüdudları çərçivəsində gəzməyə aparmamışam. Mənə bu iradaları ailə üzvlərim belə bildirir, deyirlər ki, bizi bir dəfə də olsun istirahətə aparmamısan. Mənim bu problemim də var. Odur k, xaricə getməyimə qadağa qoyulması mənim üçün düşündüyünüz qədər də ciddi problem deyil. Mən onsuz da həmin iclaslara getməkdən, orada boş-boş və nəticəsiz çıxışlara qulaq asmaqdan bezmişəm. 1998-ci ildən mediaya təzyiqlər başlayıb. O vaxtdan da mən bu prosesə hazır olmuşam. Hər gün düşünəsi deyiləm ki, Turan bağlanar, problem yaranar və s. Düşünürəm ki, qatar gedir və yol var. Yol yoxdursa, qatar da dayanacaq. Başqa nə problem var ki?

- Turan fəaliyyətini dayandırsa ölkə nə itirəcək?

- Bilmirəm ki, ölkə nə itirəcək. İnanmıram ki, böyük bir şey itirsin. Onsuz da böhrandır, günü-gündən vəziyyət pisləşir. Devalvasiya yeni başlayanda məndən soruşurdular ki, necəsiniz? Məndə gülərək deyirdim ki, yaxşıyam. Deyirdilər ölkədə böhran var, sən necə yaxşısan. Cavab verirdim ki, mən onsuzda 15 ildir böhrandayam. Bu vaxta qədər siz kef edirdiniz, bizim kimi adamlara da deyirdiniz ki, dəlidirlər, düşüblər ortaya. İndi hamı düşüb bu vəziyyətə.

HÜSEYN ABBASOĞLU
"Gündəm Xəbər"