“Bu özbaşınalığa “Sədərək” və “Binə”də də son qoyulsaydı, əla olardı. Açıq-aşkar soyğunçuluq, qanunsuzluqdur.

Yalandan bir qəbz verirlər, heç bir əsası olmayan kağız parçasıdır, vəssalam, hər maşından 50 qəpik alırlar”.

gundemxeber.az AzEuroNews.com-a istinadla xəbər verir ki, bunu Bakının “Sədərək” bazarına girişin pullu olmasından şikayətlənən Namiq Quliyev deyir.

O, “Sədərək” və “Binə”də avtomobillərə girişin pullu olmasını soyğunçuluq adlandırır: “Bazardan alış-veriş eləməyə gələn adam maşınını hardasa saxlamalıdır.

Buna görə “ərəbzəngi” kimi yol pulu tələb edirlər. Heç bir qanuni əsası da yoxdur və o pullar özlərinin cibinə gedir.

Hər gün bura minlərlə maşın girir və aya vuranda milyonlar dövr edir. Avtovağzalda da eyni özbaşınalıq idi. İndi saata görə qiymət müəyyənləşdiriblər. Burda da heç olmasa eyni qaydanı tətbiq etsinlər”.

Sürücü Firudin Əzimov da deyir ki, dayanacaq pulu verməyənləri buraxmırlar: “Bunun adı quldurluqdur. Necə yəni, mən bazara gəlib mal alıram, sənə onsuz da xeyir verirəm, pul qazanırsan.

Hələ bir deyirsən ki, giriş pulu da ödə. Eyni qanunsuzluq aeroportda da var. Hava limanına girişi pullu ediblər.

Bunlar hamısı pul hərisliyidir, daha çox qazanmaq istəyidir. Gürcüstanda “Tbilisi mall”a get, səndən pul tələb etmirlər”.

Xüsusən həftə sonu “Sədərək” və “Binə”də qələbəlik olur. Hər iki yarmarkanın ərazisində avtomobil saxlamaq üçün yer tapılmır. Hər maşından 50 qəpik alan bazar rəhbərliyi sözün əsl mənasında “qaz vurub, qazan doldurur”.

Üstəlik, bu pulların vergidən yayındırıldığı iddiaları var. Çünki sürücülərə təqdim olunan qəbzlərin heç bir hüquqi statusu yoxdur.

Sadəcə, 50 qəpik ödəniş edirsən, şlaqbaum açılır və “yaşıl işıq” yandırılır. İllərdir ki, bu vəziyyətlə bağlı şikayətlər olunur, mətbuatda yazılar gedir. Di gəl ki, çi fayda?!

Onu da deyək ki, dünənə kimi Bakı Beynəlxalq Avtovağzal Kompleksində bu qurumun ərazisinə daxil olan hər bir avtomobil sahibindən müddətindən asılı olmayaraq 1 manat ödəniş tələb edilirdi. Əksəriyyət isə vəziyyətdən narazı idi.

Narazılığa səbəb ödənişin 5 dəqiqə müddətinə əraziyə daxil olub, sərnişini götürdükdən sonra oranı tərk edənlərə də şamil olunması idi. Ödəniş etməyənlərin yolunu isə şlaqbaum kəsirdi.

Prezidentin İşlər İdarəsinin balansına verilən Bakı Beynəlxalq Avtovağzal Kompleksi yenidən Nəqliyyat, Rabitə və Yüksək Texnologiyalar Nazirliyinin balansına qaytarıldı.

Ondan sonra avtovağzalın əsas girişində müasir ödəniş qurğuları quraşdırıldı. Parkinqə daxil olan nəqliyyat vasitələri ilk 20 dəqiqə ödənişsiz dayanır. Artıq dayandıqda vaxta görə ödəniş edir.

20 dəqiqədən 2 saatadək – 1 manat;

2 saatdan 3 saatadək – 2 manat;

3 saatdan 6 saatadək – 3 manat;

6 saatdan 24 saatadək – 4 manat.

Avtovağzalın giriş hissələrində bu cədvəl əks olunub.