“Qarabağ Komitə”si İdarə Heyətinin üzvü Əlövsət Sadıqlı öz facebook səhifəsində təmsil olunduğu Komitənin 16 mart tarixinə planlaşdırdığı mitinqin keçirilməsini Bakı Şəhər İcra Hakimiyyətinin məqsədəuyğun saymaması ilə bağlı status paylaşıb. Həmin statusu Əlövsəd bəyin təqdim etdiyi kimi GundemXeber.Az-ın oxucularının diqqətinə çatdırırıq:

“Ha özümü sıxsam da, münasibət bildirməyə bilmədim...
Sərbəst toplaşmaq azadlığı haqqında" Qanunun 7-ci maddəsində göstərilir ki, sərbəst toplaşmaq azadlığı yalnız aşağıdakı hallarda məhdudlaşdırıla bilər:
1) ictimai və dövlət təhlükəsizliyi mənafelərinin qorunması üçün;
2) ictimai asayişin pozulmasının qarşısını almaq üçün;
3) iğtişaş və ya cinayətlərin baş verməməsi üçün;
4) əhalinin sağlamlığının mühafizəsi üçün;
5) əxlaq normalarının və mənəviyyatın mühafizəsi üçün;
6) başqa şəxslərin hüquq və azadlıqlarının müdafiəsi üçün.

Bakı Şəhər İcra Hakimiyyəti isə "Sərbəst toplaşmaq azadlığı haqqında" Qanunun bu tələblərini heç nəyinə almayaraq və ənənəvi olaraq, "Qarabağ Komitə"sinin 16 mart tarixə planlaşdırdığı mitinqin keçirilməsini yenə də "məqsədəuyğun" saymadı...

Cavab məktubunda, təxminən, belə, həm də utanmadan, dediyi tam qırmızı yalandan qızarmadan yazdı ki, bəs, möhtərəm prezidentimiz ərazi bütövlüyümüzün təmini, münaqişənin həlli üçün zəruri addımlar atır, bu addımlar KİV-də işıqlandırılır, həm də bütün görüşlərdə ermənistanın təcavüzkarlığı ifşa olunur, ona görə də planlaşdırdığınız mitinqin keçirilməsini məqsədəuyğun saymırıq və s...

Əvvəla, ey "möhtərəm" BŞİH, "quzu kəsim" sənin o hüquqşünasının savadına ki, məhdudlaşdırma üçün QANUNUN 6 əsas müddəasının hər hansı birini yox, prezidentinin hansısa (olmayan) addımlarını əsas kimi göstərir!

İkincisi, sənin o möhtərəminin hansı addımlarından danışırsan?
1) Atəşkəs barədə saziş imzalayaraq, faktiki olaraq, Dağlıq Qarabağın və ətraf 7 rayonun erməniyə təslim edilməsindənmi danışırsan?
2) 26 illik ailə hakimiyyəti dövründə Qarabağ probleminə aid "çöpün çöp üstünə qoyulmamasındanmı" danışırsan?
3) Dədə-baba yurdlarımızda ermənilərin məskunlaşmasına sənin möhtərəminin məqsədli şəkildə göz yummasından və dolayısı ilə bu məskunlaşmaya münbit şərait yaratmasındanmı danışırsan?
4) Paşinyan bəyanat verir ki, işğal olunmuş torpaqlar erməni torpağıdır və onun bir qarışı da Azərbaycana verilə bilməz, sənin möhtərəmin isə səsini də çıxara bilmir: bundanmı danışırsan?
5) Paşinyan təhlükəsizlik şurasının iclasını Dağlıq Qarabağda keçirir (məgər Dağlıq Qarabağ Ermənistan ərazisidirmi?) və bununla da bütövlükdə bizə, Azərbaycan dövlətinə, o cümlədən sənin möhtərəminə "papağımızı yeyim" deyir, sənin möhtərəmin isə "mıqq" da eləmir: bundanmı danışırsan?

Ümumiyyətlə, prezidentin nə iş görməsinin mənim ata yurdumun tələbi ilə mitinq keçirməyimə nə aidiyyəti var axı!? Məgər bu sadə hüquqi məntiqi qanmaq o qədərmi çətindir?
Özünüzü və ya xalqı qanmaz yerinə qoymaqla nə demək istəyirsiniz? Xalqa meydanmı oxuyursunuz və ya kişisinizsə, meydana çıxınmı demək istəyirsiniz?...

Ərazi bütövlüyü, Qarabağ probleminin həllində iqtidar-müxalifət məsələsinin olmaması vacib, həm də hava-su qədər vacib olduğu halda, xalqı qarşıdurmaya sürükləmək düşmənçilikdir: bunu etməyin...!!!”