Azərbaycan Respublikasının vətəndaşı, həqiqi hərbi xidmət keçmiş, kirayələrdə yaşayan Qəhrəmanov Samir Sergey oğlunun redaksiyamız vasitəsiylə, Azərbaycan Respublikasının Daxili İşlər Naziri cənab Ramil Usubova müraciətini olduğu kimi oxuculara təqdim edirik.

Hörmətli cənab Nazir!

Yazıb sizə bildirirəm ki, mən Qəhrəmanov Samir Sergey oğlu, evsiz-eşiksiz, sərgərdan vəziyyətdə kirayələrdə sürünürəm. Hər dəfə sahibkarlar kirayə haqlarını qaldıranda, küçələrə düşməyə məcbur oluram. Bu vəziyyətdən çıxmaq üçün qərara gəldim ki, torpaq sahəsi alım, heç olmasa çadır qurub, "Robinzon-Kruzo" kimi, işıqsız, qazsız da olsa, orada yaşayım. Bu məqsədlə də, "hərəkətə" keçdim və yaxşıca aldadıldım. 2018-ci ilin ortalarında Bakı şəhəri, Sabunçu rayonunun Kürdəxanı sakini, Səyyad adlı şəxs, torpaq satmaq adı altında məni aldatdı o, mənə 10.000 manat (on min manat) dəyərində maddi zərər vurdu. Bununla əlaqədar olaraq, 2018-ci ilin sentyabr ayında, yaxınlarımın da məsləhətləriylə Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə müraciət etdim. Əlimdə olan bütün dəlil və sübutları İstintaq şöbəsinə təqdim etdim.

Orada bu işin icraatı Yusif adlı müstəntiqə tapşırıldı. Amma nə fayda? Elə qara günlərim də o vaxtdan başladı. Müstəntiq nəinki, haqq işimdə mənə kömək etmək istəmədi, hətta telefon zənglərimə belə cavab vermədi...

Şikayət müraciətimdən altı aydan çox vaxt keçməsinə baxmayaraq, hələ də heç bir iş görülməyib. İdarə rəisi Seyfulla Əzimovun adına yazdığım ərizələr isə, dəftərxanada “itirilir”, rəisə çatmır ki, çatmır...

İndi də müstəntiq Yusif məni aldadır ki, guya o adama cinayət işi açılması üçün, Baş Prokurorluğa müraciət edib. Halbuki, mənim bildiyimə və qanuna görə, cinayət işinin açılması üçün, müstəntiq ərazi aidiyyatı üzrə prokurorluğa vəsatət, təqdimat verməlidir. Baş Mütəşəkkil Cinayətkarlıqla Mübarizə İdarəsi də, Bakının Nərimanov rayonu ərazisində yerləşdiyindən, həmin rayonun prokurorluğuna müraciət edilməldir.

Deməli, müstəntiq burada da, açıq-aşkar məni aldadır və onsuzda gərilmiş, tarıma çəkilmiş hisslərimlə oynayır. İdarə rəisi Seyfulla Əzimova, müstəntiqə də, hər dəfə yazıram ki, mənim müraciətimə ya baxsınlar, ya da rədd etsinlər. Çünki mən yaxşı bilirəm ki, bir vətəndaşın barəsində, bir neçə istintaq orqanında istintaq aparıla bilməz. Görünən odur ki, müstəntiqlə dələduz Səyyadın da, arasında məhz belə bir sövdələşmə olub ki, müstəntiq bu işi idarədə saxlasın, mən də başqa istintaq orqanına müraciət edəndə dələduz Səyyad desin ki, onun barəsində “ bandotdeldə” “iş gedir” və bu müddətdə başqa orqan baxa bilməz.

Bu mənim başıma gətirilən birinci oyun deyil. Xatırladırıram ki, Bakı şəhəri Aşıq Ələsgər küçəsi, ev 6, mənzil 3 ünvanında yaşayış və mülkiyyət hüququmu da, bir neçə il öncə kobudcasına pozublar. “Anam”, Qəhrəmanova Sevil İsmayıl qızı, 14 mart 2011-ci ildə dələduzluq edərək, birgə mülkiyyətimizdə olan, Bakı şəhəri Aşıq Ələsgər küçəsi, ev 6, mənzil 3 ünvanında yerləşən 3 otaqlı mənzilimizi Zakir Vəliyev adlı şəxsə guya “ipoteka” müqaviləsi əsasında, qanuna zidd olaraq, ləğv edilmiş etibarnamə əsasında satmış və məni evsiz-eşiksiz qoymuşdur. Ona da bu dələduzluq, saxtakarlıq əməlində 46 saylı Notariat Kontorunun rəisi Tamilla Kərimova yaxından köməklik etmişdir. Bununla bağlı da, Azərbaycanın müvafiq orqanlarına dəfələrlə müraciət etmişəm. Demək olar ki, onlar da, məhz “bandotdelin” mənə göstərdiyi "isti" münasibəti sərgiləmişlər.

Hörmətli Ramil müəllim!

Mən artıq intihar etmək həddinə çatmışam. Düşünürəm ki, atam rus millətinin nümayəndəsi olduğuna görə, Azərbaycanda mənim başıma bu oyunları açır, bu müsibətləri yaşadırlar.

Mən, nə edim? Üzləşdiyim haqsızlıqlarla əlaqədər, Rusiya Federasiyasının Prezidenti cənab Vladimir Putinə, Rusiyanın Azərbaycandakı səfirliyinə müraciət, şikayət edim? Bilirik ki, indi sosial şəbəkələr vasitəsiylə hər yerə, hər kəsə müraciət etmək, çatmaq olur...

Mən sadəcə olaraq, cənab Prezident İlham Əliyevin tolerantlığa, multikultural dəyərlərə göstərdiyi yüksək münasibətlərə görə bunu etmir, onun bu sahədə yürütdüyü uğurlu daxili və xarici siyasətə kölgə salmaq istəmirəm. Bu mənə yaraşmaz.

Hörmətli cənab Nazir!

Sizdən xahiş edirəm ki, mənim şikayətimə Baş Mütəşəkkil Cinayətkarlıqla Mübarizə İdarəsində ya baxılsın, ya da rədd edlsin və mənə rəsmi şəkildə məlumat verilsin.

Dərin hörmətlə,
Samir Sergey oğlu Qəhrəmanov
Tel: 050-210-29-12