İsgəndər Həmidovun durumu ağır olaraq qalır. Amma Adil Qeybullanın dediyinə görə, cüzi bir ümid yaranıb.

Gundemxeber.Az xəbər verir ki, Bu sözləri Axar.az-a ötən aydan komada olan keçmiş nazirin qardaşı oğlu Şəhriyar Məcidov İsgəndər Həmidovun hazırki durumu ilə bağlı danışarkən deyib.

Ş.Məcidov bildirib ki, İ.Həmidov mütəmadi olaraq həkimlərin nəzarətindədir.

Tibb üzrə professor Adil Qeybulla isə bildirib ki, İ.Həmidovun səhhətindəki problemlərin aradan qaldırılması üçün təcrübəli həkimlər əllərindən gələni edir:

“İki gün öncə “City Hospital”ın və Türkiyədən olan həkimlərin birgə konsiliumu keçirildi. Hemodinamik göstəricilərin (qan təzyiqi, nəbz) tənəffüs sayının, qan saturasiyasının (oksigen təminatının) stabilləşməsini, xəstənin ağrı və səs qıcıqlarına zəif reaksiyasını, baş beyinin növbəti tomoqrafiyası zamanı ödemin azalma tendensiyasını nəzərə alaraq, xəstəyə traxeostomiya qoyulması qərara alındı və uğurla icra edildi. Hazırda vəziyyəti stabil-ağır olaraq qalır, koma vəziyyətindədir, hemodinamik göstəricilərini inotrop dəstəksiz (dərman preparatlarının köməyi olmadan) saxlaya bilir. Xəstə zondla qidalandırılır”.

Qeyd edək ki, İ.Həmidov 24 yanvardan komadadır və süni tənəffüs aparatına qoşulub.

Gundemxeber.Az