Bəyanatda deyilir:

''Repressiya və İşgəncələr Əleyhinə Komitə Azərbaycan hökumətinin koronavirus pandemiyası və karantin rejimindən sui-istifadə etməklə son bir ayda siyasi repressiya və psixoloyi terror tədbirlərini intensivləşdirməsi faktlarını, 06 aprel tarixli əfv sərəncamının mahiyyəti barədə məsələni, həbsxana, cəzaçəkmə müəssisələri və istintaq təcridxanalarında pandemiyanın önlənməsi sahəsində təxirəsalınmaz tədbirlərin zəruriliyi, həmçinin məhbusların qidalanması və ərzaqla təminatı məsələlərini müzakirə edərək, Azərbaycan hakimiyyətinin, yerli və beynəlxalq ictimaiyyətin, Azərbaycanın qoşulduğu beynəlxalq təşkilatların diqqətinə yönəlik aşağıdakıları bəyan edir:
1. Son müşahidələr göstərir ki, mövcud hakimiyyət pandemiya və karantin rejimindən rəqiblərinə – Milli Şura, AXCP, ADR Hərəkatı, Müsavat Partiyası və digər qurumların fnksioner və fəallarına, həmçinin hüquq müdafiəçiləri, jurnalistlər, blogerlər və digər tənqidçilərinə qarşı cəzalandırma və siyasi qisasçılıq məqsədilə sui-istifadə etməkdədir.
İlham Əliyevin daha çox müxalifəti hədəfləyən təhdidedici 19 mart 2020-ci il tarixli "bayram təbriki"ndən, müxalifəti ünsür, düşmən və satqın adlandıraraq, fövqəladə vəziyyət elan edəcəyi və həmin şəraitdə müxalifətçiləri təcrid (həbs) edəcəyi bəyanatından sonra müxalif düşərgəyə qarşı repressiyalar intensiv xarakter almışdır. O cümlədən:
a) Tofiq Yaqublu, Elvin Muradov, Elçin Məmməd, Təzəxan Mirələmli və Əlizamin Salayev barədə qondarma cinayət işləri açılıb, əvvəlki üç nəfər haqqında uzunmüddətli həbs-qətimkan tədbiri seçilib, Təzəxan Mirələmlidən heç yerə getməmək barədə iltizam alınıb, Əlizamin Salayev barədə cinayət təqibi təxirə salınıb,
b) Fuad İsmayılov, Araz Quliyev, Anar Məlikov, Şakir Məmmədov, Vüsal Başaratov, Natiq İsbatov (sərbəst hərəkət icazəsi olub), Faiq Əmirli, Ruslan Əmirov, Vəfadar Əliyev, Nicat Abdullazadə, Hikmət Ağayev, Nəriman Abdulla, İbrahim Vəzirov, Baba Süleymanov inzibati həbslə cəzalandırılıblar. Fuad İsmayılov işgəncələrə məruz qoyulub: dişi sındırılıb, zərbə nəticəsində qulaq pərdəsi cırılıb.
c) Rövşən Murad, Məhəbbət Muradov, İlqar Yaqublu, Ülfət Haqverdiyev evlərindən zorla çıxarılaraq polisə aparılıb, hər biri 100 manat cərimə edilib, həmçinin parolları məcburi alınaraq facebook hesablarındakı hökumətin siyasətinə yönəlik tənqidi statusları silinib
d) Fikrət Cəfərli və Namizəd Səfərov sərbəst hərəkət icazələri olduğu halda, hər biri 200 manat cərimə edilib. Fikrət Cəfərli 18-ci polis bölməsində kobud rəftar və təhqirlərə məzuz qoyulub,
e) Aqil Hümbətov İlham Əliyevə uşaq pulu tələbi ilə video-müraciət etdiyi üçün Respublika Ruhi Xəstəliklər Xəstəxanasına (dəlixanaya) salınıb,
f) Təzəxan Mirələmli facebook statusuna görə Bakı Şəhər Baş Baş polis idarəsinə aparılıb və xəbərdarlıq edilib,
g) Rza Səfərsoy evindən məcburi aparılıb, kobud rəftar və təhqirlərə məruz qoyulub, həmçinin facebook hesabına müdaxilə edilərək, statusları silinib,
h) İlkin Rüstəmzadəni facebook statuslarını silməyə məcbur etmək məqsədilə atası polisə aparılaraq təhqir edilib, saxta profillər və muzdlu saytlar vasitəsilə həyat yoldaşı barədə qarayaxma kompaniyası başladılıb.
"Repressiya və İşgəncələr Əleyhinə Komitə" İlham Əliyevin koronavirus pandemiyasından fürsət kimi sui-istifadə edərək, öz siyasi rəqiblərinə qarşı yürütdüyü total repressiya, qisasçılıq, psixoloji terror siyasətini şiddətlə qınayır və onu bu antikonstitusion əməllərini dayandırmağa dəvət edir.
"Repressiya və İşgəncələr Əleyhinə Komitə" Azərbaycan hökumətindən tələb edir ki, qondarma ittihamlarla şərlənərək həbs edilən bütün şəxsləri azad etsin!
"Repressiya və İşgəncələr Əleyhinə Komitə" hazırkı pandemiya şəraitində günahsız insanların qondarma ittihamlarla həbsə göndərilməsini həmin insanların həyatına sui-qəsd – yoluxdurma tədbiri kimi qiymətləndirir.
"Repressiya və İşgəncələr Əleyhinə Komitə" beynəlxalq və ölkə ictimaiyyətini, o cümlədən, Azərbaycanın qoşulduğu beynəlxalq təşkilatları, beynəlxalq səviyyəli hüquq-müdafiə təşkilatlarını, aparıcı demokratik dünya dövlətlərini İ.Əliyev rejiminin repressiya siyasətinə səssiz qalmamağa çağırır.
2. "Repressiya və İşgəncələr Əleyhinə Komitə" bəyan edir ki, 06.04.2020-ci il tarixli əfv sərəncamı siyasi ayrıseçkilik zəminində hazırlanıb, sosial sifarişə hesablanmayıb, ədalətli deyildir və qərəzlidir: Azərbaycanın dövlət təhlükəsizliyinə, dövlətçilik prinsiplərinə sarsıdıcı zərbələr vurmuş, tutduğu vəzivə səlahiyyətlərindən sui-istifadə edərək rüşvət, korrupsiya, başqasının əmlakını qeyri-qanuni yollarla ələ keçirmə, qanunsuz həbs və qətllərdə ittiham olunmuş sabiq MTN generalları Akiv Çovdarov, Sübahir Qurbanov kimi cinayətkarların cəzalarının çəkilməmiş 10-11 ili əfv edilərək azadlığa buraxıldığı halda, İslam Partiyası Astara Rayon Təşkilatının sədri 66 yaşında olan siyasi məhbus Ruhulla Axundzadənin 12 il 6 ay ümumu cəzasının çəkilməmiş 3 ilinin əfv edilməməsi bu ədalətsizlik və qərəzin təsdiqidir.
3. Siyasi motivlərlə həbs edilmiş şəxslərin yoluxma ehtimalını və bunun üçün bütün məsuliyyətin hökumətin üzərinə düşəcəyini bəyan edərək, bütün siyasi məhbusların azad edilməsini tələb edirik.
4. "Repressiya və İşgəncələr Əleyhinə Komitə" olaraq, paket şəklində dəfələrlə etdiyimiz təkidli təkliflərə baxmayaraq, müvafiq dövlət orqanları hələ də məhbusların normal qidalanması problemini həll etməyib:
a) Penitensiar Xidmətin diqqətinə çatdırırıq ki, CÇM-də məhbusların qidalanması ilə əlaqədar monitorinq apardığınız gün mağazalarda gördüyünüz qiymət siz gedən kimi yenidən qaldırılıb və hazırda ümumi pərakəndə satış qiymətindən ən azı 50% çoxdur və bəzi mallar ikiqat qiymətə satılır ki, buna da nə məhbusun, nə də məhbus ailələrinin maddi durumu adekvat deyil,
b) Hesab edirik ki, məhbusa qanunvericilikdə nəzərdə tutulan ərzaq sovqatının qadağan edilməsi infeksiyanın qarşısının alınmasına yox, daha çox bu sahədə manapoliya yaratmağa və müvafiq şəxslərin haram yolla varlanmasına xidmət edir,
5. Təklif edirik:
a) CÇM və məhbus ailəsinin adığı ərzağın mənbəyinin eyniliyi (topdan satış yerləri, bazar və marketlər), hətta ailənin aldığı ərzağın daha keyfiyyətli, ekoloji təmiz olması faktı nəzərə alınmalı, infeksiyanın qarşısının alınması tədbirləri görülməsi şərtilə, məhbuslara sovqat qəbulu bərpa edilsin.
b) Həbsxana, CÇM, istintaq təcridxanalarında infeksiyanın qarşısının alınması imkanlarını yaxşılaşdırmaq, bu sahədə hökumətin yükünü və məsuliyyətini yüngülləşdirmək məqsədilə cəmiyyət üçün təhlükəli olmayan məhbuslar azadlığa buraxılsın.
Bəyanat "Repressiya və İşgəncələr Əleyhinə Komitə"nin virtual toplantısında qəbul edilmişdir.''
1. Eldəniz Quliyev
2. Namizəd Səfərov
3. Rövşən Əhmədli
4. Zəfər Əhmədov
5. Arzu Abdulla
6. Lalə Aibova
7. Nasir Əliyev
8. Rövşən İldırım
9. Əlövsət Sadıqlı

Bakı şəhəri 14.04.2020