Bu gün bir ata qısqanclıq zəminində öz namuslu qızının yanbızına iynəylə heroin vuraraq öldürüb.

Yazırlar ki, qız ədəb-ərkanla öz şəkillərini İnstagramda, Facebookda dərc edir, paylaşır, klient tutur, görüşür, bir sözlə, başını saxlayırmış. İndi o ataya "qəsdən adam öldürmə"ylə iş açacaq, 10 ildən 12 ilə qədər iş kəsəcək, törətdiyi əmələ görə peşman edəcəklər.
Olan isə, qıza oldu. Binəvanın cəmi 24 yaşı varmış. Bu dünyadan öz kamını almamış, sevib-sevilməmiş, ağ gəlinliyini geyməmiş, toyunda doyunca "Ay canı yanmış"ı oynamamış, əli ər əlinə dəyməmiş, gərdək, döşək, qan, "3 günlük" və hələ başqa bu kimi şeyləri görməmiş Cənnətə yola salındı...

Kimdir günahkar?

İnstagrammı? Facebookmu? Kişilərmi? Atamı? - Yox!!!
Bəlkə günahkar pandemiyadır, COVİDdir, maskadır, ara məsafəsidir, spirtdir, metronun işləməməsidir, MOLL-ların 1 ildir bağlı olmasıdır, benzinin, taksilərin bahalaşmasıdır...
Bir qız nə qədər bəzənib-düzənmək eşqilə alışıb-yanar, amma maska bunların hamısını gizlədər, qızın gözəlliyini, özünüifadəsini məhv edər? Bir xanım canından artıq sevdiyi bir oğlanla neçə ay ara məsafəsi saxlaya bilər?
Əgər o dindardırsa, neçə ay haram buyrulmuş spirtlə əllərini dezinfeksiya etmək məcburiyyətində qalmalıdır?
Axı, şənbə və bazar günlərində bir gənc qadın bir cavan oğlanla əl-ələ tutub bulvara getmək istəyər və yadına düşəndə ki, metro işləmir, deməli ƏHMƏDLİdən SAHİLə taksiylə getməlidirlər və taksi də "dədəsinin qiymətini" üstünə qoyub kəf gələcək, onda qızın nə günahı olmalıdır? Nə günahı var?
Və bəlkə elə qız MOLLda çalışırmış, satıcı imiş, hər gün 12 saat işləyib atasını, anasını, qardaşlarını aldığı 350 manatla birtəhər dolandırırmış...
Hmm... Qızda günah yoxumuş. Qız günahsızdır.
Qız baxıb görüb ki, adamlar restoranlarda maskasız, bir-birinin qucağında oturub yeyib-içirlər, amma çölə çıxanda nəyə görəsə maska taxırlar və atası buna heç bir münasibət bildirmir, heroini iyləyir, uçur...
Qız görüb ki, metro işləmir, amma avtobuslarda adamlar bir-birinin yumurtalarını əzir və atası bunlara görə evdə bir qram narahat olmur, heroini qaşığa töküb qızdırır...
Qız görüb ki, benzin bahalaşır, taksilər od qiymətinə aparır, amma atası bunu rahatca qeyrətinə sığışdırır, qızdırdığı heroini şprisə çəkir...
Qız bütün bunları görəndən sonra fikirləşib ki, yəqin atam bu məsələyə də dinməz, qolunu iplə sıxar və damara qulluq edər...

Gözəl qız

Səni o qədər yüksək qiymətləndirir, o qədər əziz tuturam ki! Və müqəddəs Ruhun qarşısında dərin ehtiramla baş əyirəm. Kaş, səni görmüş olaydım. Kaş, səninlə heç olmasa, bircə gecəlik vaxt keçirəydim. Səni rahatca dinləyəydim. Və sən də mənə yatdığın oğlanlarla etdiyin söhbətləri bir-bir danışaydın.
Bilirsən, qəşəng qız, indi hamı yorulub. Dünya öz mənasını itirib. Heç kim heç kimin kitabını oxumur. Hamının dərdi bir qarnı, bir də orasıdır.
Və sənə heç kim "pis qız" deyə bilməz, uzaq başı "seks işçisi" adlandırılacaqdın, narahat olma, Ruhun şad olsun, çünki sən ulu bir işə girişmişdin, qədim bir işə, peşəyə və bil ki, bu işlə çoxları məşğuldur, qalstuklu, pencəkli, gözəl nitq qabiliyyətli və hər gün efirlərdə...

Sən də verirdin, onlar da verirlər.

Üzeyr Abbas