Ötən ilin son günündə dünyaya gələn körpənin ölümündə həkimlər valideynləri, valideynlər isə həkimləri ittiham edirlər

Hadisə Şəki şəhərində yeni doğulan körpə dünyasını dəyişib. Bu barədə dünyasını dəyişən körpənin atası Elnur Hacıəhmədov ANS PRESS-ə bildirib. Onun sözlərinə görə, övladı ötən ilin son günü, Şəkidəki Doğum evində saat 19:30 radələrində dünyaya gəlib. Həkimlər bildiriblər ki, uşaq sağlamdır. Doğulan oğlan uşağının çəkisi 4 kiloqram olub. Lakin uşaq vaxtından müəyyən qədər gec doğulduğu üçün vakum aparatına qoyulub. Bir müddət sonra isəoradan çıxarılaraq ailəsinə təhvil verilib.

“Körpəni pediatr müayinə etdi. Uşaqda heç bir problem olmadığı üçün onu evə buraxdılar. Lakin uşağın rəngi saralmışdı. Dedilər ki, keçəcək. Biz Oğuz rayonunda yaşayırıq. Uşağı götürüb Oğuza apardıq. Lakin yanvarın 5-dən 6-na keçən gecə uşağı halı pisləşdi. Qızdırması qalxdı. Körpəni Bakıya apardım və orada öldü. Bakıdakı həkimlər dedilər ki, uşaq doğularkən beyin travması keçirib. Əslində belə uşağı xəstəxanadan çıxartmaq olmazmış”, - deyə Elnur Hacıəhmədov bildirib.

Qeyd edək ki, bu Elnur Hacıəhmədovla Leyla Məmmədovanın birgə nigahından iki qızı olub.

Şikayətçinin sözlərinə görə, körpənin ölümündə Şəki şəhər Doğum Evinin pediatrı Esmira Səmədova, doğumu həyata keçirən Qabiliyyat Qarayeva günahkardır.
“Yalandan mənə dedilər ki, uşaq tam sağlamdır. Doğuma görə mənim 300 manat pulumu aldılar. Bundan əlavə də xərclərim çıxdı. Üstəlik 200 maantlıq dava-dərman aldım. Heç onları da istifadə etmədilər. İstəyirəm ki, bütün günahkarlar cəzasını alsın”.

Məsələ ilə əlaqədar doğuşu həyata keçirən Qabiliyyat Qarayeva ilə əlaqə saxladıq. Həkim Qarayeva ANS PRESS-ə açıqlamasında bildirdi ki, uşaq normal doğulub və sağlam olub. "Körpə həkim nəzarətində olub. 5 gündən sonra isə evə buraxılıb”.

Dünyasını dəyişən körpənin həkimi Esmira Səmədova isə tam əksinə olaraq uşağın çətin doğulduğunu deyib. Onun sözlərinə görə, uşaq çətin doğulduğu üçün vakum aparatına qoşulub. Sonradan səhhəti yaxşılaşdığı üçün onu aparatdan ayırıblar.

“Uşağın sarılığı olmuşdu. Körpəni evlərinə buraxmaq istəmirdik. Lakin valideynləri bayram günündə getmək istədilər. Hətta evə getmək üçün bütün məsuliyyəti öz üzərlərinə götürdülər. Bununla bağlı ərizə də yazdılar. Lakin uşaq bizdən buraxılarkən qızdırması yox idi. Çətin doğulsa da, beyin travması keçirtməmişdi. Biz körpəyə beyin travmasına qarşı profilaktik tədbirlər görmüşdük. Buradan çıxanda körpənin tempraturu 36,5 idi”, - deyə Esmira Səmədova bildirib.

Lakin körpənin atası Elnur Hacıəhmədov bildirib ki, uşağı evlərinə aparmaları onların istəkləri olmayıb. Bu barədə də heç bir ərizə yazmayıblar.

Məsələ ilə bağlı Doğum evinin baş həkimi Fərman Cəlaloğlu ANS PRESS-ə hadisəilə bağlı məlumatalıolduqlarını deyib. Onun sözlərinə görə, araşdırmalar aparılır. "Hadisəyə şəxsən mən nəzarət edirəm. Baş həkimin əmrilə həkimlərə də töhmət verilib. Lakin körpənin ölümündə həqiqətən də həkimlərin günahkar olduğu sübut olunsa bu barədə hüquq-mühafizə orqanlarına da bildirləcək”.

Səhiyyə Nazirliyinin mətbuat xidmətindən ANS PRESS-ə verilən məlumata görə, məsələ nazirliyin Doğuşa Yardım Komissiyası tərəfindən araşdırılacaq. Şikayət nazirliyə daxil olan kimi, məsələ dərhal komissiya tərəfindən araşdırılır. Tibbi ekspertiza təyin olunur. Körpənin həkim səhlənkarlığı, yaxud hansı səbəbdən ölməsi müəyyən olunur.