Sözügedən yazıdan sonra daha bir valideyn Lent.az-a həmin həkimlə bağlı müraciət edib.  

Minar Bayramov bildirib ki, övladı, 1 yaşlı Səyyad Bayramlı da E.Həsənovun etdiyi əməliyyatdan sonra ölüb:

“Övladımı sentyabrın 17-də cari həkim yoxlanışına aparmışdıq və məlum oldu ki, ürəyinin klapanında ciddi qüsur var. Buna qədər uşaqda heç bir problem olmadığı üçün xəstəlikdən xəbərsiz idik. Bunu biləndən sonra səhəri gün ayrı-ayrı iki xəstəxanada uşağı yoxlatdırdıq. Hər iki müayinə nəticəsində bəlli oldu ki, əməliyyat olunmalıdır.

Bundan sonra bir neçə özəl xəstəxanada çalışan həkimlərə üz tutduq. Əməliyyat xərcinə imkanımız çatmadığı üçün bizə dövlət sığortası ilə əməliyyat etməyimizi tövsiyə etdilər. Ağstafa rayonunun səhiyyə qurumuna müraciət etdik və onlar sığorta ilə əməliyyatı ancaq sözügedən klinikaya və şəxsən Elnur həkimə göndərə biləcəklərini dedilər.

Sözün düzü, həkimin yanına gedəndə əməliyyatdan imtina etməsini və özəl xəstəxanaya yönəltməkdə yardımçı olması üçün getmişdik. E.Həsənov bizi əməliyyatın uğurlu keçəcəyinə inandırdı və dedi ki, özəl klinikalarda həkimlər ancaq pul düşünürlər. Sonra əlavə etdi ki, uşağınız 100 % sağ-salamat əməliyyatdan çıxacaq. Bizi inandırdı və yoxlanış etdiyi günün səhəri əməliyyat olunmasını istədi. Halbuki digər klinikalarda ən azı bir həftə müalicə olduqdan sonra əməliyyata ala biləcəklərini demişdilər. 

Əməliyyatdan qabaq sığorta bunu qarşılamır və 5 300 manat verməlisiniz dedi. Oğlumun əməliyyatı oldu və həkim dedi ki, uğurlu alınıb. Əməliyyatdan bir gün yarım keçməmişdi ki, uşağı oksigendən ayırıb palataya göndərdi. Uşaq palataya gələndə isə həddindən artıq qızdırma içində olub və nəfəs almaqda çətinlik çəkib. Bunu görən anam təcili uşağın reanimasiyaya qaytarılmasını istəyib. Həkimlə mübahisələrdən sonra uşaq reanimasiyaya yerləşdirilib. Uşağı aparanda yoldaşım oğlumun gözlərini yumduğunu, gec-gec nəfəs aldığını görüb qışqırmağa başlayıb. Ona isə hər şeyin qaydasında olduğu deyilib. Biz düşünürük ki, oğlumuz elə onda ölüb. Amma hadisədən 12 saat sonra - gecə saat 23:20 radələrində bizə deyildi ki, uşaq ölüb. Təcili xəstəxanaya getsək də, həkimi tapa bilmədik. Nə qədər zəng etdik, amma bizə cavab verilmədi. Sonra hamımızın nömrəsini blok etdi. Polis çağırdıq və polis də zəng etdi, amma yenə cavab vermədi. Bir xəstədən məsul olan şəxs niyə belə bir şey etsin?

Məsələ ilə bağlı hüquq-mühafizə orqanlarına məlumat vermişdim və hazırda prokurorluq bununla bağlı araşdırma aparır. İndi ekspertiza nəticələrini gözləməkdəyik. Ümid edirəm ki, ekspertizanın nəticələrinə görə, həkimin məsuliyyətsizliyi səbəbindən ölümün baş verdiyi aşkara çıxacaq.

Mən bir ata olaraq bu məsələnin sonuna qədər gedəcəm və növbəti balaları bunlar kimi cəlladlardan qorumaq üçün əlimdən gələni edəcəm”.

Oğlu ilə bərabər eyni gündə atasını da itirən valideyn bildirir ki, sözügedən xəstəxanada həkim məsuliyyətsizliyi səbəbindən atasını da itirib:

“Xəstəxanada oğlumun ölüm xəbərindən sarsılan atam İbadət Bayramov bütün bu məsələlərin gərginliyi arasında ağır infarkt keçirdi. Xəstəxanadan ürək tutmasına görə, nə qədər kömək istəsək belə, səsimizə səs verən yarım saat sonra tapıldı. Biabırçılıq orasındadır ki, həmin xəstəxanaya təcili yardım çağırmalı olduq. Daha sonra yuxudan ayılan xəstəxananın həkim kardioloqu gəldi və dedi ki, xəstədə heç nə yoxdur, ona hava lazımdır.

İnfarkt keçirtdiyini bilmədik, ancaq hər ehtimal Respublika Klinik Xəstəxanasına maşın ilə getdik. Yoxlanış nəticəsində həkim bildirdi ki, atam ağır infarkt keçirib və bu xəbərdən 10 dəqiqə sonra onu da itirdik. Bir gündə etinasızlıq, vəzifələrini doğru yerinə yetirməyən həkimlər ucbatından ailəmin iki üzvünü itirdim. 

Elnur Həsənovla bağlı Səhiyyə Nazirliyinə, Prezident İlham Əliyevə və Birinci vitse-prezident Mehriban Əliyevaya bu günlərdə müraciətimizi ünvanlayacağıq. Günahkarın yaxın zamanda cəzalanacağına ümid edirik”.

“Topçubaşov adına Elmi Cərrahiyyə Mərkəzinin nəzdində Uşaq Ürək Cərrahiyyəsi Mərkəzi”nin rəhbəri Elnur Həsənov açıqlamasında ittihamları qəbul etməyib.

O bildirib ki, 1 yaşlı Səyyad Bayramlının xəstəliyi Volf-Parkinson-Uayt (WPW) sindromu idi və onun əsas kriteriyası bundan ibarətdir ki, istənilən an tam rahat ölüm baş verə bilər:

“Əməliyyatdan bir gün sonra, 5 gün sonra, bir il sonra - hər an uşaq ölə bilər. Bu, həkimdən asılı olan məsələ deyil. 

Valideynlər bunu əməliyyatdan əvvəl bilir və imza atır. Heç bir həkim bunu izah etmədən əməliyyat edə bilməz. Mən 100 % sağaldacağımı deməmişəm. Əməliyyat uğurlu oldu, amma VFV sindromu rahat olsaydı, bu qədər ölümlər olmazdı”.

E.Həsənov valideynin hüquq-mühafizə orqanlarına şikayətinə də münasibət bildirib:

“Şikayət edirlər, qoy etsinlər. Lap əla... Ən azı onların iftiraları ortaya çıxacaq. Həmçinin sığorta məsələsi də araşdırılacaq”.