Azərbaycana məxsus yük maşınının Qarabağdakı Rusiya sülhməramlıları ilə yanaşı, qondarma rejimin “polisi” tərəfindən yoxlanılması Azərbaycana qarşı növbəti təxribat hesab edilir.

Qeyd edək ki, Rusiya Müdafiə Nazirliyinin rəsmi saytında yerləşdirilmiş videogörüntülərdə Kəlbəcər rayonuna ərzaq və qeyri-hərbi təyinatlı yük aparan maşın saxlanaraq polis uniforması geyinmiş bir şəxs tərəfindən yoxlanıldığı əks olunub. Suqovuşan-Qızqala-Vəng yolu ilə hərəkət edən və üzərində latın əlifbası ilə “Qarabağ” sözü yazılmış avtomobilin yoxlanılmasında iki nəfər Rusiya sülhməramlısı ilə yanaşı, əynində Qarabağdakı separatçılara məxsus “polis” geyimi olan bir kişi də iştirak edir. Rusiya Müdafiə Nazirliyinin məlumatına görə, video Azərbaycana məxsus 20-yə yaxın yük maşınının daxil olduğu iki kortejin Suqovuşan-Qızqala-Vəng istiqamətində və əksinə hərəkəti zamanı çəkilib. Videoda yoxlandığı görünən yük maşınının məxsus olduğu "Qarabağ" yükdaşıma şirkətinin rəhbəri Şövqi Həsənov “BBC News Azərbaycanca-ya müsahibəsində hadisəni təsdiqləyib.

“Maşını Suqovuşandan Kəlbəcərə və əksinə istiqamətdə özüm idarə etdim. Suqovuşanı keçdikdən sonra orda ermənilərin də postu var. Ruslar bizə yaxınlaşıb dedilər ki, onları maşının kabininə baxmağa qoymayın, amma yük yerini açın baxsınlar,” - Şövqi Həsənov qeyd edib. Humanitar yüklərin daşınmasını həyata keçirdiklərini deyən Şövqi Həsənov Qarabağdakı “erməni polislərin” maşınların yük yerinə baxdığını bildirib. Şirkət rəhbəri vurğulayıb ki, Xankəndidən keçməklə Şuşaya getdikləri zaman heç vaxt "erməni polislər" maşınlara baxış keçirməyiblər.

“Amma Kəlbəcər yolunda nə məsələdirsə, maşına baxış keçirirlər. Mən orda ruslara dedim ki, niyə bunlara icazə verirsiniz maşına baxsın? Erməninin nə maddi marağındadır ki, biz nə aparırıq, nə gətiririk? Dedi, yuxarıdan tapşırıq belədir ki, yük yerlərinə onlar da baxmalıdır. Gedəndə də açdırıb baxdılar, gələndə də,” - Şövqi Həsənov belə deyib. Qeyd edək ki, Qarabağda sülhməramlı fəaliyyət, yəni daşınan yüklərin, nəqliyyat vasitələrinin təhlükəsiliyinin təmini və yoxlanılması birbaşa Rusiya hərbi kontingentinin səlahiyyətlərinə daxildir. Azərbaycanın suveren ərazisində nə Ermənistanın hərbçilərinin, nə də dünyada tanınmayan qondarma rejimin hər hansı yoxlama aparmaq hüququ yoxdur. Bu, Azərbaycan, Ermənistan və Rusiya arasında 2020-ci il noyabrın 10-da imzalanmış üçtərəfli Bəyanatın pozulmasıdır. Çünki Rusiya sülhməramlıların Azərbaycan ərazisinə yerləşməsi və missiyası həmin bəyanatla müəyyən edilir. Ancaq Rusiya hərbçilərinin “yuxarıdan tapşırıq belədir” deməsi “erməni polislər”in Azərbaycan maşınlarını yoxlamaq əmrinin birbaşa sülhməramlı qüvvələrin komandanı Andrey Volkov tərəfindən verildiyini göstərir. Lakin Volkov Rusiya Müdafiə Nazirliyinin göstərişi olmadan cinayətkar rejimlə belə bir sövdələşməyə gedə bilməz.

Videogörüntülərin Rusiya Müdafiə Naziriliyinin rəsmi saytında yerləşdirilməsi də bunu təsdfiq edir. GUNDEMXEBER.AZ xəbər verir ki, baş verən olayı Cebhe.info-ya şərh edən sabiq xarici işlər naziri Tofiq Zülfüqarovun sözlərinə görə, Rusiya sülhməramlılarının müvəqqəti nəzarət bölgəsində mürəkkəb proseslər baş verir. Kreml Qarabağda ermənilərin sayını artırmaq və bundan özünün siyasi planları ilə bağlı istifadə üçün müxtəlif təxribatlara əl atır.

Sülhməramlılarala yanaşı, ərazidə “Qarabağ polisi”nin peyda olması da bu təxribatın tərkib hissəsidir: “10 noyabr Bəyanatının qəbulundan sonra biz gördük ki, Rusiya ermənilərin Qarabağa kütləvi surətdə qaytarılmasına çalışır. Bu məqsədlə ermənilərə kömək etdilər, yaşayış binaları tikdilər və s. Məqsəd müharibə vaxtı və ondan sonra Qarabağdan ermənilərin axınının qarşısını almaq idi. Amma bir il ərzində bu mümkün olmadı. Hətta Azərbaycan Prezidenti də müsahibəsində dedi ki, çıxmağa gedəndə yoxlayırlar, amma gələndə ciddi yoxlanış olmur. Yəni orada siyasi mübarizə və qarşıdurma var. Rusiyaya gələcəkdə öz siyasətində istifadə etmək üçün o bölgədə erməni əhalisinin qalması vacibdir. Bu siyasətin nədən ibarət olduğu hamıya bəllidir. Söhbət konflikt-menecmentdən gedir. Amma münaqişənin baş verməsi üçün orada ermənilər olmalıdır. Bu da alınmır”.

Sabiq nazir qeyd edib ki, daim təxribatlar törətməyə çalışırlar:

“Bu və ya digər səviyyələrdə bəyan edirlər ki, Rusiya gəlib və oradan getməyəcək. Məqsəd həmin insanlarda hansısa ümid yaratmaqdan ibarətdir. Amma bu müharibədən və məğlubiyyətdən sonra ermənilər hansısa siyasi oyunların qurbanı olmaq istəmir. Axın da davam edir. Azərbaycan maşınlarının “erməni polis” tərəfindən yoxlanılması da bu prosesin bir hissəsidir. Ya Azərbaycan Rusiyaya qarşı hansısa addımlar atmalı və buna son qoyulmalıdır. Ancaq proseslərin hansı istiqamətdə inkişaf edəcəyi bilinmir. Daha doğrusu, ermənilərin istədiyi vəziyyət yaranacaq. Yəni Azərbaycan, Türkiyə və Rusiya qarşıdurması ola bilər. Ermənilər həmişə kimisə istifadə edərkən öz məqsədlərinə çatmaq istəyirlər. Ona görə də baş verən təxribatların məqsədi budur. Azərbaycanın taktikası və strategiyası strateji səbr göstərməkdən ibarətdir. Yəni vəziyyəti elə həddə çatdırsın ki, bu və ya digər qərarların qəbulu çox məntiqli olsun. Yenə də Prezidentin çıxışlarına diqqət yetirsək, o deyir ki, 25 min nəfərə status verilə bilməz. Deməli, axın davam etsə, bu rəqəm daha da aşağı düşəcək. Məsələn, Putinin çıxışını yada salsaq, o, bir dəfə dedi ki, 50 min nəfər qayıdıb. Bir neçə ay keçəndən sonra dedi ki, 54 min nəfər qayıdıb. Amma Azərbaycanda olan rəsmi göstəricilər fərqlidir. Cənab Prezident də onu qeyd etdi ki, biz gediş-gəlişə tam nəzarət edirik. Yəni mən dediyim kimi, orada siyasi qarşıdurma var. Mən səbri və siyasi təcrübəsi olmayan insanlar kimi məsələni siyasi qarşıdurma səviyyəsinə çıxartmağın əleyhinəyəm. Hiss olunur ki, Rusiyanın erməniləri alət kimi orada saxlamaq və yenə münaqişə törətmək layihəsi alınmır. Hesab edirəm ki, bu, bizim üçün müsbət haldır”.

Tofiq Zülfüqarov bildirib ki, Azərbaycan Qarabağda ermənilərin sayının azalmasına nail olmaq taktikasını davam etdirməlidir. Belə olan təqdirdə, Azərbaycanın suverenliyinə və ərazi bütövlüyünə təhlükə törədən siyasi layihə öz əhəmiyyətini itirəcək: “Bu proses gedir. Hesab edirəm ki, münaqişə zonası artıq Qarabağdan sərhəddə çəkilir. İstisna etmirəm ki, gələcəkdə Ermənistanı və Azərbaycanı idarə etmək üçün Rusiyaya sərhəd mövzusu və Zəngəzur məsələsi daha önəmli olacaq”.

Gundemxeber.az