Hər kəsə məlumdur ki, Azərbaycan Sahibkarlar (İşəgötürənlər) Təşkilatları Milli Konfederasiyası (ASK) bir ictimai birlikdir və bu qurum mülkiyyət, təşkilati-hüquqi formasından asılı olmayaraq, hal-hazırda sahibkarlıq fəaliyyəti ilə məşğul olan hüquqi və fiziki şəxslərin könüllülük əsasında faəliyyətlərini əlaqələndirməklə bərabər, eyni zamanda onların hüquqi və iqtisadi mənafelərini də müdafiə edir. 

Bundan əlavə, ASK-ı özünüidarəedən, ictimai-faydalı məqsədləri daşıyan və fəaliyyəti zamanı heç bir gəlir əldə etməyi nəzərdə tutmayan qeyri-kommersiya, qeyri-hökumət təşkilatıdır. Qeyd edək ki, bu qeyri-dövlət qurumu 05 mart 1999-cu ildə təsis olunmuş və 09 aprel 1999-cu il tarixdə rəsmən dövlət qeydiyyatından keçmişdir. 

Hazırda adı çəkilən bu Konfederasiyanın bir neçə rayonda nümayəndəlikləri fəaliyyət göstərir ki, onlar da bütün respublikanı əhatə edir. Faktdır ki, ASK sahibkarlığın inkişaf etdirilməsinə lazımi dəstəyini ifadə etməklə bərabər, eyni zamanda bu gün ölkəmizin iqtisadi sahəsinin yeni mərhələyə qədəm qoymasında da xüsusi rola malik olur.

Bəli, ölkəmizdə həyata keçirilən islahatların uğurlu alınması səbəbindən, hazırda müxtəlif sahələri əhatə edən dövlət proqramlarının, genişmiqyaslı infrastruktur layihələrinin lazımi səviyyədə icra olunması, məhz ölkəmizi beynəlxalq aləmdə etibarlı tərəfdaş kimi tanıtmışdır. Belə bir halın varlığı dünyanın aparıcı iqtisadi mərkəzləri tərəfindən, bu gün də yüksək qiymətləndirilməkdədir. 

Hal-hazırda qeyri-neft sənayesində və kənd təsərrüfatı sahələrində əldə olunan uğurlar, sahibkarlıq fəaliyyəti ilə məşğul olan hər kəsə biznes fəaliyyətlərini genişləndirməyə lazımi imkanlar yaradır.

Eyni zamanda milli iqtisadiyyatımızın dayanıqlı inkişafında sahibkarlığın əhəmiyyətli rolunu getdikcə də artırır.

Bütün bunları əsas tutaraq, ASK-nin yaranmasının və fəaliyyətə başlamasının 20 (iyrimi) illiyi münasibətilə, bu gün Goranboy rayonunda geniş tədbir təşkil olundu və tədbiri rayon icra hakimiyyətinin başçısı cənab Məhərrəm Quliyev açdı. O, açılış zamanı qeyd etdi ki, “Mərhum prezidentimiz Heydər Əliyev hakimiyyətdə olduğu illər ərzində, daim sahibkarlığın inkişafına öz dəstəyini göstərib. Yəni, ölkə rəhbəri olaraq o, ölkəmizin hər bir şəhər və rayonunda, o cümlədən Goranboyda da sahibkarlığın inkişafına daim dövlət dəstəyini ifadə edib.

 Bəli, biz 44 günlük Vətən müharibəsi dövründə sahibkarların ordumuza verdikləri dəstəyi gördük və lazımınca da qiymətləndirdik. Belə bir səbəbdəndir ki, bu gün sahibkarlar ölkə rəhbəri tərəfindən diqqət və qayğı ilə əhatə olunurlar. 

Hazırda biz də əlimizdən gələn köməklikləri göstəririk ki, Goranboyda iş adamlarının normal fəaliyyət göstərmələri üçün lazımi şərait olsun. Qeyd edim ki, bu rayonda fəaliyyət göstərən “Med Life” klinikasına məxsus əlavə korpusun inşa olunması üçün, keçirilən təməlqoyma tədbirində RİH-nin başçısı olaraq mən də iştirak etdim. Hal-hazırda klinikaya məxsus korpusda tikinti işləri sürətlə davam etdirilir və gələcəkdə 232 nəfər şəxs burada işlə təmin olunacaqlar. Təbii ki, belə bir müasir tibb mərkəzin daha geniş formada fəaliyyət göstərməsi,  ümumi şəkildə regionun iqtisadi inkişafına lazımınca təsirini göstərəcək”.

İcra başçısı etdiyi çıxış zamanı Vətən müharibəsi dövründə goranboyluların göstərdikləri qəhrəmanlıqlardan da bəhs etdi. Daha sonra Konfederasiyasının vitse-prezidenti cənab Vüqar Zeynalovun təşkilati məsələlərlə bağlı etdiyi çıxış, məhz tədbir iştirakçılarının daha çox nəzər və diqqətini cəlb etdi.  Yəni, bu şəxs çıxışı zamanı bildirdi ki, “25 aprel 2002-ci ildə mərhum prezidentimiz Heydər Əliyevin xeyir-duası ilə yaradılan bu təşkilat, sahibkarların hüquqlarının qorunmasında və onların iş fəaliyyətlərinin stimullaşdırılmasında müstəsna rola malik oldu”.

Sonda tədbirin keçirilməsi üçün yaradılmış şəraitə görə, hər kəs RİH-nin başçısı cənab Məhərrəm Quliyevə dərin təşəkkürlərini çatdırdılar. Daha sonra ASK-nin Goranboy rayonu üzrə təmsilçisi Rüstəm Nağıyev, yerli sahibkarların müsbət fəaliyyətlərindən və rayon rəhbərliyinin sahibkarlara göstərdiyi diqqət və qayğıdan bəhs etdi. 

Yerli sahibkarlar təşkilatın fəaliyyətini və tədbirin əhəmiyyətini yüksək qiymətləndirdilər və onlar  bir çox məsələlərlə bağlı əhəmiyyət kəsb edən fikirlər də səsləndirdilər. Tədbirin sonunda sahibkarlıq fəaliyyəti ilə məşğul olanlardan 8 (səkkiz) nəfər şəxs fəxri fərmanla da təltif olundular.

GundemXeber.Az