Qarabağ veteranı Heydər Əliyev mərkəzinin xadiməsindən 11 dəfə az müavinət alır

Gündəmi işğal edən qanunun – mövzunun Fövqəladə Hallar Nazirliyindəki “xidmətdə eyş-işrət macərası” olması ilişgilsiz-şübhəsizdir. Lap “Min bir gecə” nağıllarının çağdaş “elektron-video” versiyasına bənzəyir. Can da , canan da xüsusi çin-rütbə altında “yanğından mühafizə xidmətinin yanğısını” çıxarırlar. Kimi bu hərəkəti mənəvi dəyərlərə, kimi uniformaya sayğısızlıq kimi dəyərləndirir, kimi illər öncənin “köhnə palan içinin sökülməsi” ilə şantaja əl atıldığını vurğulayır. Hətta bütün ölkənin bütün xidməti  (və digər) binalarının içini və çölünü “bəzəyən” mərhum prezident Heydər Əliyevin abidəsinə hörmətsizlik edilməsini vurğulayanlar da az deyil. Nə etmək olar, necə deyərlər,  olan olub, torba dolub; heç kimin söz, fikirləşmək haqqına girmək olmaz. 

Adamı yandıran odur ki, Qarabağ döyüşlərdə canlarını qoyan döyüşçü ərlər işgəncə altında, hələ də nə haqlarına qovuşublar, nə azadlıqlarına, amma xüsusi rütbəli “kefkom”lar eyş-işrətdə. Təsəvvür edin, Qarabağ savaşı veteranı 80 manat aylıq müavinət alır, Heydər Əliyev mərkəzinin xadiməsi 876 manat! Bir xadimə 11 Qarabağ veteranının müavinəti qədər dövlətdən haqq alır. Hələ mərkəzin elektrikini, sürücüsünü, operatorunu demirik , 1206 manatlıq aylıq haqla ordunun polkovnikindən də çox təminata yiyələnib. Heç mərkəzin direktorunu da demirik, 3012 manatlıq aylıq donluqla döyüş generalını maddi yöndən iki dəfə üstələyir . Ümumiyyətlə, Heydər Əliyev mərkəzinin 12 vəzifə ştatına ayda  toplam 22694 manat büdcədən vəsait ayrılır ki, 220 nəfər  3-cü dərəcəli Qarabağ əlilinin aylıq müavinəti (110 manat ) həddindədir. Təsəvvür edin, 12 nəfər mərkəz işçisi 220 nəfər qazi əlilin aylıq müavinəti qədər aylıq  haqq alır. Əlbəttə, belə disbalans “çal oynasın, vur çatlasın” “xidməti”nə nədən olar. Döyüşçü çörək pulu dərdi çəkir , kabinet zabitləri, generalları görüntülü eyş-işrət çəkirlər. 

Bəs prokurorluq orqanları nəyə nəzarət edir? Hərbi prokurorluq “hərbi şantaj” nəzarətini, fövqəladə hallar orqanlarının işinə nəzarət idarəsi “iş işdən keçəndən sonra tumanbağını bərkitmək” nəzarətini həyata keçirir. Belə prokuror nəzarəti ilə isə yalnız şantaj,  şər-böhtan zəfər çalar. 

Məğrur Bədəlsoy