“Ermənistan və Qarabağdakı erməni separatçıları Azərbaycana qarşı təbliğatı davam etdirirlər. Bu təbliğatlarının zirvə nəticəsi Fransa hakimiyyətinin BMT-dəki uğursuzluğu və Parlamentdə qəbul etdiyi  “boşboğaz” sənəddir”.

Gundemxeber.az bildirir ki, bu fikirləri Editor.az-a açıqlamasında Orta Doğu Araşdırmalar Mərkəzinin rəhbəri Sədrəddin Soltan deyib.

Onun sözlərinə görə, Ermənistan hakimiyyəti və dünya ermənilərinin Azərbaycana qarşı başlatdığı aksiya onların istədiyi nəticəni verməyəcək:

“Çünki erməni lobbisi parlamentdəki məlum hadisə ilə bağlı artıq ifşa olunub və özünü biabr edib. Bir daha təsdiqləndi və beynəlxalq ictimaiyyət tərəfindən etiraf olundu ki, Avropa Parlamentində baş verən cinayət əməllərində erməni milyarderlərinin birbaşa əli var. Hazırda belə milyarderlərdən biri də Azərbaycanın Qarabağ iqtisadi rayonunda oturub təbii sərvətlərimizi qanunsuz şəkildə istismar etməklə məşğuldur. Ona görə də Azərbaycan ictimaiyyəti ermənilərin ərazilərimizdə qanunsuz fəaliyyətinə son qoyulmasını tələb edir. Hesab edirəm ki, bu aksiya Azərbaycan cəmiyyətinin haqlı tələblərindən doğub və iştirakçıların tələbləri yerinə yetirilənə qədər davam edəcək. Məlumdur ki, 1988-ci ildə Topxana hadisəsi ermənilərin Azərbaycan ekologiyasına vurduğu zərbə ilə başlamışdı. Ermənilər Zəngəzurdakı mis-molibden fabrikində tullantılarını Araz çayına tökərək suyu çirkləndirməklə Azərbaycanla yanaşı region ölkələrinə qarşı da ekoloji terrorla məşğul olur. Habelə Ermənistanda fəaliyyət göstərən Atom Elektrik Stansiyasının istismar müddəti başa çatsa da fəaliyyət göstərir və region üçün ciddi təhlükə yaradır. Ermənistan regionda ekoloji təhlükə mənbəyidir. Regionda törətdiyi terrorun bir hissəsini isə Azərbaycan ərazilərində davam etdirir. Hesab edirəm ki, Şuşa yolunda davam edən aksiya öz nəticəsini əldə edənə qədər davam edəcək”.

Gundemxeber.az