Ələt qəsəbəsi son illərdə Azərbaycanın strateji iqtisadi layihələrinin mərkəzinə çevrilib. Burada yerləşən Böyük Dəniz Limanı, Ələt Azad İqtisadi Zonası (AFEZ) və yaxınlıqdakı Beynəlxalq Hava Limanı bu bölgəni təkcə ölkə daxilində deyil, həm də regionda nəqliyyat və logistika qovşağına çevirib. Lakin bu qədər iri layihələrin kölgəsində qalan bir acı reallıq var: Ələtin öz sakinləri üçün yaşam şəraiti, ictimai məkanları və mədəniyyət infrastrukturu baxımından vəziyyət bərbaddır.

Qəsəbənin mədəniyyət evi illərdir baxımsız vəziyyətdədir. Gənclərin, uşaqların yaradıcı və mənəvi inkişafı üçün heç bir şərait yoxdur. Kitabxana yoxdur, dərnəklər yoxdur, mədəni tədbirlər keçirilməz hala gəlib. Halbuki bu cür strateji əhəmiyyətli bir ərazidə yaşayan insanların da sosial və mədəni hüquqları təmin edilməlidir.

Ən sadə ehtiyac – park belə yoxdur. Ələt sakinləri ailələri ilə istirahət etmək, uşaq arabası ilə gəzmək, yaşlılar isə sakit bir guşədə dincəlmək üçün sadəcə bir park belə tapa bilmirlər. Bu, XXI əsrin çağdaş şəhər planlaması ilə qətiyyən uzlaşmayan bir mənzərədir.

Ən təəccüblüsü isə budur ki, qəsəbədə fəaliyyət göstərən onlarla iri yerli və xarici şirkət bu məsələyə biganədir. Onların fəaliyyəti nəticəsində Ələt inkişaf edir, ancaq bu inkişaf yerli əhali üçün faydaya çevrilmir. Sosial məsuliyyət prinsipi hardadır? Niyə bu şirkətlər bir park salmaq, mədəniyyət evini yeniləmək, bir idman kompleksi tikmək təşəbbüsü göstərmirlər?

Ələt qəsəbəsi təkcə strateji layihələrin yox, həm də insanların yaşadığı yerdir. Onlar da bu torpağın sahibidir. Dövlət qurumlarına, yerli idarəetməyə və xüsusilə AFEZ çərçivəsində fəaliyyət göstərən şirkətlərə çağırış edirik: Ələtə sahib çıxın! İnsanlara yalnız iş yeri yox, həm də yaşam mühiti yaradın.

GundemXeber.Az