Məhkəmədə təqsirli bilinən şəxs şok faktlar açıqladı
Almas Almasov: “Cinayətin iştirakçıları məsuliyyətə cəlb edilməyib”

İrandan Azərbaycana külli miqdarda narkotik vasitə keçirməkdə təqsirli bilinən Cəlilabad rayon sakini, 1979-cu il təvəllüdlü Almas Almasovun cinayət işi üzrə məhkəmə prosesi başa çatıb.

İttihama görə, Almas Almasov narkotik vasitələrin dövriyyəsi ilə məşğul olmaq üçün şəxsiyyəti istintaqa məlum olmayan İran İslam Respublikasının vətəndaşı “Hüseyn” adlı şəxslə razılığa gəlib. “Hüseyn” adlı şəxs narkotik vasitəni Azərbaycan Respublikasının gömrük sərhədindən gömrük nəzarətindən kənar keçirib və Cəlilabad rayonunun Cəfərli kəndindən Edişə kəndinə keçən hissəsində təpədə torpağın altında gizlədib.

Almas Almasov narkotik vasitə hesab olunan tiryəki 1500 manat pulun müqabilində 24 dekabr 2016-cı il tarixdə, axşam saatlarında həmin yerdən götürüb və satış məqsədi ilə Cəlilabad rayonu, Cəlayir kəndində yerləşən Cəlayir kənd icra nümayəndəliyinin inzibati binasının yaxınlığına gətirib.

Həmin ərazidə Daxili İşlər Nazirliyinin Baş Narkotiklərlə Mübarizə İdarəsi və Baş İdarənin Cənub Bölgəsində Regional Şöbəsi əməkdaşlarının Cəlilabad rayonu ərazisində həyata keçirdikləri əməliyyat-axtarış tədbirləri nəticəsində Almas Almasov saxlanılıb. Saxlanılan şəxsin əlindəki çantadan 3 kiloqram 490 qram çəkidə heroin və 8 kiloqram 10 qram tiryək aşkar olunaraq götürülüb.

Almas Almasov Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən qaçaqmalçılıq törətmək), 234.4.1-ci (qanunsuz olaraq qabaqcadan əlbir olan bir qrup şəxs tərəfindən və ya mütəşəkkil dəstə tərəfindən narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) və 234.4.3-cü (qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham edilib.

Almas Almasovun cinayət işi Lənkəran Ağır Cinayətlər Məhkəməsində araşdırılıb və hakim Mehdixan Abdullayevin sədrliyi ilə baş tutan prosesdə hökm elan edilib. Məhkəmənin hökmü ilə Almas Almasov 14 il müddətinə azadlıqdan məhrum edilib.

Hökmdən narazı qalan Almas Almasovun vəkili Bəxtiyar Babayev apelyasiya şikayəti verib. O, şikayətində müvəkkilinin ittiham olunduğu Cinayət Məcəlləsinin 206.3.2, 234.4.1 və 234.4.3-cü maddələrinin həmin məcəllənin 234.1-ci (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsinə tövsif edilməsini istəyib.

Vəkilin şikayəti araşdırılması üçün Şirvan Apelyasiya Məhkəməsinə göndərilib. Apelyasiya şikayəti hakim Ələsgər Novruzovun sədrlik etdiyi kollegiyada araşdırılıb.

Məhkəmədə təqsirləndirilən şəxs qismində ifadə verən Almas Almasov elan olunmuş ittiham üzrə özünü təqsirli bilməyib. O, bildirib ki, yalnız narkotik vasitələrin daşınmasında özünü təqsirli bilir: “İran vətəndaşı Hüseyn adlı şəxsi tanımıram. Narkotik vasitələri Hüseyn adlı şəxsə qohumum Nəsib Hümbətov sifariş verib və qaçaqmalçılıq yolu ilə Azərbaycan Respublikasına keçirilmiş narkotik vasitələri isə, Nəsib Hümbətovun tapşırığı ilə həmkəndlim Fizuli İbişov qəbul edib”.

Təqsirləndirilən şəxsin sözlərinə görə, həmin narkotik vasitəni gətirmək üçün Nəsib ona 400-500 manat verəcəyini vəd edib: “Mən də onunla razılaşdım. Qohumum Nəsibin maşını ilə birlikdə Cəlilabad rayonunun Xənəgah kəndinə getdik. Xəstə oldugu üçün Nəsib maşından düşmədi. Mən maşından düşərək narkotik vasitələri torbada Fizulidən aldım və maşına qoydum. Nəsib mənə 1200 manat və 400 ABŞ dolları verdi ki, Füzuli adlı şəxsə verim. Mən də həmin pulları Füzuliyə vermişəm. Füzuli isə mənə 20 manat verib”.

Almas Almasov qeyd edib ki, Nəsiblə birlikdə Cəlilabad rayonu Cəlayir kəndinə gələrkən kəndin ərazisində yerləşən icra nümayəndəliyinin qarşısında polis işçiləri onları bir yerdə tutublar: “Polis işçiləri bizi tutarkən Nəsib Hümbətov da yanımda maşında olub. İstintaq zamanı Nəsib Hümbətovun və Fizulinin adlarını çəkmək istədim. Həm Nəsib və Fizulinin həm də, polis işçilərindən hədələrindən qorxaraq ifadələrimi dəyişdim. Nəsib Hümbətovu bu cinayətdə ifşa edəcək onun qohumlarım ilə narkotik vasitələrin əldə olunması barədə telefon danışıgının səs yazısı vardır”.

Almas Almasov ifadəsinin sonunda Lənkəran Agır Cinayətlər Məhkəməsinin hökmünün dəyişdirilməsini, əməlini Cinayət Məcəlləsinin 206.3.2, 234.4.1 və 234.4.3-cü maddələrindən Cinayət Məcəlləsinin 234.1-ci maddəsinə tövsif etməsini istəyib: “Cinayət Məcəlləsinin 234.1-ci maddəsinin sanksiyasında nəzərdə tutulmuş ədalətli cəza təyin edilməsini xahiş edirəm. Həmçinin törədilmiş cinayətin əsas təşkilatçısı olan Nəsib Hümbətovun cinayət məsuliyyətinə cəlb olunması üçün tədbir görülməsini məhkəmə kollegiyasından xahiş edirəm”.

Təqsirləndirilən şəxsin vəkili bildirib ki, hüquqlarını müdafiə etdiyi Almas Almasova Cinayət Məcəlləsinin 206.3.2, 234.4.1 və 234.4.3-cü maddələri ilə ittiham elan olunması əsassızdır: “Çünki, Almas Almasov nə narkotik vasitənin qaçaqmalçılıq yolu ilə keçirilməsində iştirakçı yaxud köməkçi olub, nə də həmin narkotikin gələcəkdə satılıb-satılmayacagından yaxud, başqa hansı məqsədlər üçün istifadə ediləcəyindən məlumatı olmayıb. Onun maragı narkotik vasitəni mal sahibinə catdıracagı müqabilində alacagı 400-500 manat olub. Belə halda şəxsi Cinayət Məcəlləsinin 206.3.2, 234.4.1 və 234.4.3-cü maddələri ilə ittiham etmək olmaz. Almas Almasovun etdiyi cinayət əməlinin qanuni ittihamı Cinayət Məcəlləsinin 234.1-ci maddəsi ilə verilməli idi və agırlaşdırıcı hal kimi də tamah məqsədi qeyd olunmalı idi. Bu tamah məqsədi gələcəkdə satılıb-satılmayacagı bilinməyən narkotik vasitə ilə əlaqədar deyil. Bu maddi maraq onun qanunsuz narkotik vasitəni sahibinə çatdırmaq üçün daşınmasında və bunun müqabilində ona veriləcək 400-500 manat pul müqabilində idi. İşin faktiki hallarına diqqətlə və qərəzsiz, obyektiv şəkildə fikir verilsə, görünər ki, Almas Almasovun etdiyi cinayət əməlinin əlamətləri Cinayət Məcəlləsinin 206.3.2, 234.4.1 və 234.4.3-cü maddələrinin tərkib əlamətlərini deyil, həmin məcəllənin 234.1-ci maddəsinin tərkib əlamətlərini özündə ehtiva edir. Yəni, şəxs külli miqdarda narkotik vasitənin kim tərəfindən, nə vaxt, hansı şəraitdə qanunsuz sərhəddən keçirilməsindən xəbəri yoxdur, narkotik vasitə ona məxsus deyil, narkotik vasitə sərhəddən qanunsuz keçirildikdən sonra, yalnız həmin narkotiki 400-500 manat müqabilində Nəsib Hümbətovun tapşırıgı ilə Füzuli İbişovdan götürüb”.

Vəkilin sözlərinə görə, cinayət işi üzrə Almas Almasova Cinayət Məcəlləsinin 206.3.2, 234.4.1 və 234.4.3-cü maddələri ilə ittiham verilməsini, onun bu əməllər üzrə təqsirli olmasını sübut edəcək mötəbər sübutlar yoxdur: “İş materiallarında ibtidai istintaq orqanı tərəfindən qeyd olunan guya, Almas Almasov 11 kq dan çox narkotik vasitəni idman çantasında çiyninə aşıraraq yolun kənarı ilə 10 km məsafəni piyada gəlməsi və Cəlilabad rayon Cəlayir kənd icra nümayəndəliyinin inzibati binasının yanında yaxalanması xüsusatları absurddur və məntiqsizlikdən başqa bir şey deyil. Yalnız xroniki ruhi xəstələr bu cür hərəkət edə bilər. İçi dolu külli miqdarda narkotik vasitəni, 11 kq agırlıqda olan kütləni, 11 km piyada yolun qıragı ilə idman çantasında çiynində piyada gətirəsən və özündə icra nümayəndəliyinin yanına gəlib çıxasan ki, gəlmişəm məni yaxalayın. İşin faktiki halının elə bu yönümdə təhrif olunması əməliyyat keçirən, istintaq aparan polis əməkdaşlarının qərəzliliyinə bir sübutdur.

Bundan başqa, iş materiallarında olan baxış və götürmə protokollarından da görünür ki, narkotik vasitələr aşkar edildiyi yerdə baxılmayıb, tərəzidə çəkilməyib və hal şahidlərinin gözü qarşısında qablaşdırılmayıb. Bu prosessual tədbirlər Lənkəranda regional idarədə edilib. Narkotik vasitələr ayrı maşında Almasla Nəsib isə ayrı maşında idarəyə aparılıb. Sonradan idarədə kabinetdə bu proseslər keçirilib ki, bu da kobud prosessual pozuntudur və belə kobud prosessual pozuntu ilə qəbul edilmiş baxış və götürmə protokollarını iş üzrə sübut kimi qəbul etmək olmaz. Narkotik vasitənin hadisə yerində və hadisədən sonra açılmış şəkildə fotoşəkilləri yoxdur. Hadisə yerinin fotoşəkilləri yoxdur. Tutulan an, hal şahidlərinin və müdafiəçinin iştirakı ilə narkotik vasitəyə baxış keçirilməsi, onun çəkisini müəyyən edilməsi barədə fotoşəkil və başqa sübut yoxdur. Polis əməkdaşları narkotikin çəkisinin artırılmasında audio diskdə deyildiyi kimi maraqlı olublar. Həmçinin, istintaq cinayətin əsl subyektini çıx-daş etməkdə maraqlı olduqları üçün belə prosessual pozuntulara yol veriblər”.

Dövlət ittihamçısı Samir ismayılov isə apelyasiya şikayətinin dəlillərinin əsassız olduğunu deyib. O bildirib ki, birinci instansiya məhkəməsinin hökmünün ləğvi və ya dəyişdirilməsi üçün əsasların yoxdur.

Tərəflərin fikirlərini öyrənən hakim heyəti sonda qərar elan edib. Qərara görə, Almas Almasovun apelyasiya şikayəti qismən təmin edilib və Lənkəran Ağır Cinayətlər Məhkəməsinin hökmü dəyişdirilib. Məhkəmə Almas Almasovun cəzasını 12 ilə qədər azaldılması barədə qərar qəbul edib.

Aslan
"Gündəm Xəbər"