Aralarında yaranmış mübahisəyə görə tanışı ilə dava etdi, ağır xəsarət yetirdiyi şəxs bir neçə ay sonra dünyasını dəyişdi. Bu səbəbdən də həbs edilən şəxsin ittihamı ağırlaşdırıldı.

gundemxeber.az Musavat.com-a istinadən xəbər verir ki, Bakı Ağır Cinayətlər Məhkəməsində tanışını döyərək öldürməkdə təqsirləndirilən Kamil Quliyevin cinayət işi üzrə məhkəmə prosesi keçirilib. Prosesə hakim Cavid Hüseynov sədrlik edib.

Bildirək ki, hadisə keçən il Sumqayıtda baş verib. Kamil Quliyev münaqişə zəminində tanışı Rahib Zeynalovla əlbəyaxa olub. Əlbəyaxa dava zamanı R.Zeynalov ağır xəsarətlər alıb. O, xəstəxanaya yerləşdirilib. Bundan sonra zərərçəkmişin şikayəti əsasında K.Quliyev həbs edilib. Onun barəsində Cinayət Məcəlləsinin (CM) 126.1-ci (qəsdən sağlamlığa ağır zərər vurma) maddəsi ilə cinayət işi açılıb.

İş Sumqayıt şəhər prokurorluğunda araşdırılaraq baxılması üçün Bakı Ağır Cinayətlər Məhkəməsinə göndərilib. Məhkəmə istintaqı dövründə xəsarət alan Rahib Zeynalov dünyasını dəyişib. Bu səbəbdən prokuror vəsatətlə çıxış edib və cinayət işinin məhkəmə baxışına xitam verilməsini və K.Quliyevə verilən ittihamın daha da ağırlaşdırılmasını tələb edib.

Məhkəmə vəsatəti təmin etmişdi. İş yenidən Sumqayıt Şəhər Prokurorluğunda araşdırılıb və K.Quliyevə verilən Cinayət Məcəlləsinin 126.3-cü (qəsdən sağlamığa ağır zərər vurma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham irəli sürülüb.

Bu gün keçirilən prosesdə təqsirləndirilən şəxs K.Quliyev ifadə verib. O, deyib ki, mərhum Rahib Zeynalovla əvvəldən tanışlığı olub. Hadisə baş verən gün Rahib və bir neçə dostu ilə kafedə yeyib-içiblər: "Əvvəlcədən danışmışdıq ki, kafedə hesabı vermədən çıxıb gedək. Bir az oturandan sonra bizimlə gələn Zülfüqar getdi. Hesabı verməmək üçün Rahib buna stolu aşırdı, bakalı qırdı. O, içkili idi. Sonra dedi ki, guya mən Zülfüqar gedəndən sonra atasına söymüşəm. Bunu aydınlaşdırmaq üçün Zülfüqarın yanına getdik. Rahiblə aramızda mübahisə düşdü. Məni kəllə ilə vurdu. Mən də onu itələdim, Rahib yerə yıxıldı. Sonra onu maşına qoyub xəstəxanaya apardıq. Oradan da çıxıb evə getdim. Bir gün sonra məhəllədə eşitdim ki, Rahibin vəziyyəti ağırdı. Özüm gedib polisə təslim oldu".

Məhkəmədə mərhum Rahib Zeynalovun anası, hüquqi varis Bəsti Zeynalova da ifadə verib. Oğlunun günahının olmadığını deyən ana təqsirləndirilən şəxsin yaxınlarının onlarla maraqlanmadığını deyib: "Xəstəxanada olanda vəziyyəti ağır idi. Həkimlər dedilər ki, əməliyyat olunmalıdır. Buna görə 3 min manat lazım idi. Özüm tapdıb verdm. Rahib əməliyyatdan sonra beş ay evdə yatdı. Həmin vaxt oğlum danışırdı. Rahib evdə yatanda hadisə yadına düşdükcə danışırdı. Deyirdi ki, "məni döydülər". Oğlum deyirdi ki, Zülfüqar da onu vurub".

Bəsti Zeynalova oğlunun uşaq vaxtı da ağır xəsarət aldığını söyləyib. O, qeyd edib ki, R.Zeynalovu uşaq vaxtı avtomobil vurub: "Həmin vaxt oğlum dördüncü sinifdə oxuyurdu. Maşın onu vurandan sonra dalağı çıxmışdı. Xəstəxanada 16 gün yatdı, sağlam da evə apardıq. Heç bir problemi olmayıb. Bu hadisədə isə onu döyəndən sonra aparıb xəstəxanaya atıb, qaçıblar. Hətta xəstəxanada onun adını başqa adla da qeydiyyata yazdırıblar. Oğlumun boyununu qırmışdılar. Rahibin özü dedi ki, onu Kamilgil boynundan vurublar. Kamilin anasına və bacısına dedim ki, əməliyyata pul lazımdır, köməklik edin. Amma razı olmadılar. Anası mənə dedi ki, qoy oğlum gedib 15 il cəzasını çəksin".

Prosesin davamında məhkəmə tibbi ekspertizasının rəyi elan edilib. Rəyə əsasən, K.Quliyevin xəsarət yetirdiyi R.Zeynalov məhkəmə dövründə aldığı xəsarətlərdən sonra ev şəraitində olan zaman dünyasını dəyişib.

Məhkəmənin davamında təqsirləndirilən şəxsin yaxınları ilə zərərçəkənin anası arasında mübahisə yaranıb. Tərəflər bir-birlərini ittiham ediblər. Məhkəmə nəzarətçiləri hər iki tərəfi sakitləşdirib.

Növbəti məhkəmə prosesi sentyabrın 14-nə təyin edilib.