Bu gün Bakı Ağır Cinayətlər Məhkəməsində qaynının qətlində təqsirləndirilən Seymur Abıyevin cinayət işi üzrə məhkəmə iclası başlayıb.

Hakim Novruz Kərimovun sədrlik etdiyi iclasda məhkəmə istintaqı başlayıb. Dövlət ittihamçısı ittiham aktını elan edib.

Daha sonra iclasda S. Abıyev ifadə verib. Bildirib ki, mübahisə zəminində qaynını küt alətlə öldürüb, daha sonra həyətdə basdırıb.

Hakim isə deyib ki, meyitin üzərində bıçaq izləri olub. O,bıçaqla vurmadığını deyib.

Baş Prokurorluq və Daxili İşlər Nazirliyinin birgə yaydığı məlumatda qeyd edilir ki, ötən il avqustun 13-də Bilgəh qəsəbə sakini Nəzakət Bayramova Sabunçu rayon Polis İdarəsinin 14-cü Polis Bölməsinə müraciət edərək oğlu Amin Bayramovun itkin düşməsini - bir gün əvvəl yaşadığı evdən xəbərsiz çıxaraq geri qayıtmadığını bildirib.

Məlumatla əlaqədar həmin şəxs itkin düşmüş kimi polis tərəfindən axtarışa verilib. İlkin araşdırmalarla Amin Bayramovun həmin gün Binə qəsəbəsində yaşayan qohumu Seymur Abıyevin evinə getdiyi və məhz bu müəmmalı gedişdən sonra sonuncu şəxs barəsində hər hansı məlumatın olmadığı müəyyən edilib. Barəsində polis əməkdaşlarında yaranan şübhəli məqamlara aydınlıq gətirilməsi məqsədilə Sabunçu rayon Polis İdarəsinə çağırılan S.Abıyev izahatında qaynı Aminin onlara gəldiyini, şəxsi ehtiyaclarını ödəmək məqsədilə ona 90 manat məbləğində pul verdikdən sonra mənzili tərk etdiyini göstərib. Bundan iki gün sonra isə o, cinayətin izini itirmək məqsədilə həqiqiliyi şübhə doğuran növbəti izahat verib və bununla da A.Bayramovun itməsi faktı ilə birbaşa əlaqəsi olduğunu üzə çıxarıb.
Bakı Şəhər Baş Polis İdarəsi, Sabunçu Rayon Polis idarəsi və prokurorluğun əməkdaşları tərəfindən həyata keçirilən intensiv əməliyyat-axtarış tədbirləri nəticəsində itkin düşmüş hesab edilən A.Bayramovun ötən il avqustun 12-də Binə qəsəbəsində aralarında yaranmış münaqişə zəminində S.Abıyev tərəfindən küt alətlə qətlə yetirilərək həyətdə basdırıldığı müəyyən edilib.
Məlumatla əlaqədar polis və prokurorluğun əməkdaşları avqustun 25-də dərhal Binə qəsəbəsinə gələrək məhkəmə-tibb ekspertinin iştirakı ilə hadisə yerinə baxış keçirib, meyit basdırıldığı yerdən çıxarılmış, maddi sübutlar götürülüb, şahidlər dindirilib, digər zəruri prosessual hərəkətlər yerinə yetirilib.

Faktla bağlı Xəzər rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. S.Abıyev iş üzrə təqsirləndirilən şəxs qismində cəlb edilərək ona Cinayət Məcəlləsinin qeyd edilən maddəsi ilə ittiham elan edilibvə barəsində məhkəmənin qərarı ilə həbs qətimkan tədbiri seçilib.

O ifadəsində bildirib ki, öldürdüyü şəxsin ona borcu olub. Borcunu istəyəndə isə həmin şəxs ona arvadını təklif edib:"Mənə dedi ki, arvadımdan xoşun gəlir? Mən də əsəbləşdim vurub öıdürdüm". Hakim isə bildirib ki,istintaq materiallarından görünür ki,S. Abıyev həmin şəxsin arvadına zəng edərək ondan xoşu gəldiyini deyib. S. Abıyev isə bunu təkzib edib.

İclasda şahid qismində həmin qadın da ifadə verib. Bildirib ki, S. Abıyev hadisədən iki ay əvvəl ona zəng edib. Şahid bildirib ki,S. Abıyev zəng edərək ondan xoşu gəldiyini deyib./ölkə.az