Son günlər yayılan məlumatlar Şeyxin vəhhabilərlə əsas əlaqələndiricisinin Salman Musayev olduğunu təsdiqləyir
Xəbər verdiyimiz kimi, yanvarın 28-də Qafqaz Müsəlmanları İdarəsi toplantı keçirərək Suriyada savaşa gedən azərbaycanlılarla bağlı fitva yayımlayıb. Şeyxülislam azərbaycanlıların Suriyaya savaşmağa getməsini pisləyib, bu hadisənin şəhadət olmadığını bildirib. Eyni zamanda ölkədə bəzi məscidlərdə radikal dini cərəyanların təbliğatının aparıldığını ümumi şəkildə deyərək əsas məsuliyyəti hökumət qurumlarının üzərinə qoydu.

Qeyd edək ki, Azərbaycanda radikal dini cərəyanlarla bağlı təhlükə hələ bir müddət meydana çıxsa da, ötən müddət ərzində QMİ xeyli dərəcədə kənarda dayanmağa çalışdı. Məsələ burasındadır ki, ölkənin əsas dini qurumu birinci münasibət bildirməli olduğu halda, Şeyxin idarəsi problemə PA, DQİDK, hüquq-mühafizə orqanları, hətta XİN-dən sonra, demək olar ki, ən sonda münasibət bildirdi. Həm də QMİ-nin fitvası kifayət qədər yumşaqdır və konkret olaraq günahkar olan ünvanlar qeyd olunmur.

Fitvanın verilməsi ilə , demək olar ki, paralel yayımlanan və vəhhabi mənbələrindən qaynaqlanan məlumatlarda Şeyxülislamın ərəb-vəhhabi təşkilatlarından külli miqdarda maliyyə vəsaiti alması iddia olunur. Dünən vəhhabilərin əsas sponsorlarından olan küveytli iş adamı Əl-Babtinin adından QMİ sədrinin müavini Salman Musayev vasitəsilə Şeyxə 1 700 000 dolları Bakıda sələfi yönümlü universitetin tikintisi üçün verildiyini iddia edən e-mail yayımlandı.

Lakin sələfilərin Şeyxə əzələ nümayişi və kompromat savaşı bunla bitmir. Belə ki Youtub-da “esl selefi” ləqəbi ilə hələ 1 neçə gün öncə yayımlanan və məqsədini Əlixan Musayev-Qamət Süleymanov qarşıdurmasında Qamətin əsl üzünü aşkar etmək olduğunu bəyan edən videoda da QMİ-nin Q.Süleymanovla əlaqələrinə toxunulur. Videoda bildirilən iddiaya görə, Azərbaycandan hər il Həcc səfərinə gedən 3600 zəvvardan 200 nəfəri məhz Qamət Süleymanovun rəhbərlik etdiyi sələfi qrupuna ayrılıb. İddiaya görə, bu kvotanın 20-si isə VİP servisə daxildir. Q.Süleymanovun qrupu hər il zəvvar kvotasından öz yerlərini alır və bu əlaqələri də koordinasiya edən müfti Salman Musayevdir. Təkcə 200 nəfərlik (VİP xidmətləri çıxmaqla) zəvvar üçün hər biri 4200 manatdan 1 milyon dollardan artıq vəsait edir ki, bunun da böyük qismi gəlir deməkdir.

Qeyd edək ki, əldə etdiyimiz məlumata görə, Şeyxin vəhhabilərin maraqları ilə ortaq olan çıxar nöqtələrindən biri də ərəb təşkilatlarının (sonradan onların bir çoxu terrora dəstək verməkdə ittiham olunaraq ölkədən çıxarılıb) tikdirdiyi məscidlərə razılığın məhz QMİ tərəfindən verilməsidir. Xatırladaq ki, bu məscidlərin tikildiyi 90-cı illərdə tikintiyə razılığı məhz QMİ və onun rəhbərliyi verirdi. Bizə çatan məlumata görə, həmin vaxt məscidlərin tikintisi və digər dini fəaliyyətlər üçün ərəb-vəhhabi qurum və şəxsləri ilə S.Musayev vasitəsilə Şeyxülislam arasında müəyyən anlaşmaların olması faktları baş verib. Bu əməkdaşlıq sonrakı dövrdə də davam edib və Şeyxin Qamət Süleymanov və ona yaxın qrupla birbaşa münaqişəyə getməməsinin əsas səbəbi məhz köhnə əlaqələrdir.

Görünən odur ki, hökumətin radikal təkfirçi qrupların fəaliyyətindən keçirdiyi narahatçılıq səbəbilə mövqeyini aşkarlamaq məcburiyyəti qarşısında qalan Şeyx radikal dini cərəyanlara qarşı konkret hansı addımların atılacağından danışmır. İclas zamanı Salman Musayevin ovqatının olmaması da məhz həmin mətləbdən qaynaqlandığını deməyə əsas verir.

Üstəlik ölkədə dini maarifçiliyi aparmalı olan əsas idarə bu istiqamətdə demək olar ki, heç bir addım atmır. Yalnız Şeyx axundlara maarifçiliyi gücləndirməyi tapşırıb. Bu isə göründüyü kimi, yalnız sözdür və ötən 20 ildən artıq bir müddətdə QMİ ölkədə dini maarifçilik istiqamətində ciddi hər hansı bir addım atmayıb. Şeyx növbəti dəfə radikal dini qruplara qarşı İslam dinini təbliğ etmək vasitəsilə deyil, administrativ şəkildə mübarizə aparılmasını təklif edib. Bildirib ki, problem yaradan məscid bağlanacaq.
Maraqlı olan daha bir məqam isə Şeyxin birbaşa təsir imkanları olduğu halda şikayətlərin gəldiyi məscidlərlə bağlı konkret heç bir tədbir görməməsidir. Məsələ burasındadır ki, Azərbaycanda məscidlərə axund və imam təyinatı Şeyxin idarəsi tərəfindən aparılır. Hazırda əsas şikayətlər gələn problemli məscidlərə axund və imam təyinatı Şeyx tərəfindən həyata keçirilib və sözügedən toplantıda şikayət olunan Aşur (Ləzgi) məscidi və eləcə də Qaraçuxur, İlahiyyat və Müşfiqabad məscidlərində barələrində şikayət gələn axund və imamları vəzifəsində saxlayan da elə şeyxin özüdür. Halbuki bu məscidlərdə fəaliyyət göstərən problemli axundların yerinə normal sünni imamlar təyin oluna bilərdi.

Hər halda görünən budur ki sələfi qrupları Şeyxə və onun müavininə qarşı kifayət qədər kompromata malikdirlər ki, bu da ölkənin əsas dini mərkəzini xarici qüvvələrdə asılı vəziyyət saldığı üçün, dövlətin o cümlədən hüquq-mühafizə orqanlarının məsələlərə aydınlıq gətirməsi zərurətini yaradır . Bu kompromatın təsirli olub-olmayacağını isə QMİ-nin bəyanatlar müstəvisində təkfirçi qruplara qarşı əməli iş görüb-görməyəcəyi sübut edəcək.