Dünya mediası azərbaycanlı oliqarxdan nələr yazdı?

Azərbaycanlı oliqarx Hafiz Məmmədovun Fransanın “Lans” futbol klubunu alması bu ölkənin idman mediasında rusiyalı oliqarx Dmitri Rıbolovlevin “Monako” klubunu alması ilə müqayisə olunur. Bəs bu iki milyarderin Fransa futboluna investisiya qoymasında və onların planları arasında hansı fərqlər var?
Məlumata əsasən, Hafiz Məmmədov “Lans”ı yeni alanda pafoslu bəyanatlar verdiyini, kluba İbrahimoviç və Falkao kimi məşhur oyunçuların transferinin problem olmayacağını demişdi. “Zəngin azərbaycanlının fantaziyasının hüdudu yox idi. “Lans” dünyada ən yaxşı klubdur” - deyə o, klubun sahibi olanda bildirmişdi. Noyabrda “Canal +” kanalına müsahibəsində o, daha da uzağa getdi: "Biz dünyanın ən yaxşçı klublarından biri olmaq istəyirik və investisiya qoymalıyıq. Əgər biz İbrahimoviç və Falkao kimi oyunçuları da “Lans”a transfer edə biləriksə, niyə də olmasın?”
Lakin xəbərdə deyilir ki, H.Məmmədovun “Lans”la bağlı planlarının nədən ibarət olduğu aydın deyil. Vaxtilə rusiyalı milyarder Dmitri Rıbolovlev “Monako”nu, Qətər şeyxi isə PSJ klubunu alanda onların məqsədi aydın idi.
“Məmmədovun məqsədi isə aydın deyil. Olduqca dumanlıdır. Rıbolovlev “Monako”nu alanda məşhur futbolçuların transferi üçün pul kisəsinin ağzını açdı. Lakin azərbaycanlı milyarder Rıbolovlev və Qətər şeyxi kimi pul kisəsinin ağzını açmağa hazırdırmı?" - deyə məlumatda bildirilir.
H.Məmmədovun sahibi olduğu “Bakı” futbol klubunda oynamış fransalı futbolçu Stefan Barbikoni deyir ki, oliqarx istəsə, “Lans”a 40 milyon avro da verə bilər: “Onun futboldan pul qazanmaq marağı yoxdur. Milyardlarla dollarlıq sərvətin sahibidir. Ona görə də “Lans”a daha çox pul qoyması üçün bu klubla bağlı daha çox ambisiyası olmalıdır”.
İdman iqtisadiyyatı üzrə ekspert Fredrik Jachere deyir ki, şübhəsiz, Məmmədovun maliyyə vəziyyəti kifayət qədər yüksəkdir: “Ancaq o, doğrudan da istəyirsə ki “Lans” Avropada ən yaxşı klublardan biri olsun, o zaman daha çox pul verməlidir”.
Ekspert deyir ki, “Lans”ın stadionunun təmiri və futbolçulara daha yaxşı maaş vermək üçün milyarder əlini cibinə salmalıdır.
“Əgər belə olsa, o zaman “Lans” yeni mövsümü “Gaillette Bollaert” stadionunda qarşılayardı və hesab edirəm ki, bu zaman tamaşaçılar Hafiz Məmmədovu “qəhrəman” kimi daha yaxşı alqışlayardılar” - deyə ekspert bildirib.