Dünyanın ən varlı 10 futbol klubu sahiblərinin sırasına girmək istəyən milyarder barədə qalmaqallı film çəkmiş Fredrik Roullyer maraqlı məqamları açıb

Fransanın “Canal + Sport” telekanalının əməkdaşı, “Hafka” ləqəbli milyarder Hafiz Məmmədov barədə qalmaqallı film çəkən Frederik Roulliyer bəzi məqamları açıb.

Virtualaz.org saytı Fransa mətbuatına istinadən xəbər verir ki, nəqliyyat naziri Ziya Məmmədovun biznes ortağı kimi tanınan H.Məmmədovun Azərbaycanda korrupsiya yolu ilə qazanılmış pulları Avropada futbol biznesinə yatırmasından bəhs edən film geniş rezonansa səbəb olub.

Fransanın idman ictimaiyyəti çirkli pulların bu ölkədə idman biznesinə yatırılmasının nə dərəcədə doğru olduğunu sual etməkdədir.

Xatırladaq ki, H.Məmmədov Fransanın “Lans” futbol klubunun və Azərbaycanın “Bakı” klubunun sahibidir. O, həmçinin “Atletiko” (Madrid) klubu ilə on milyonlarla dollarlıq reklam əməkdaşlığına malikdir.



H.Məmmədov “Baghlan Group” şirkətlər qrupunun - neft daşımalarından tutmuş nəqliyyata qədər biznesin ən müxtəlif sahələrində fəaliyyət göstərən 40-dan çox şirkətin sahibidir.

F.Roulliyer deyib ki, o, ilk dəfə H.Məmmədovla ötən ilin sentyabrında azərbaycanlı milyarderin “Lans” klubu ilə müqaviləni bağlamaq üçün Parisə səfəri zamanı görüşüb.

“Biz görüşdük və onun “sağ əli” olan adamla razılaşdıq ki, bir müddət sonra Azərbaycana gedək. Nəhayət, oktyabrın sonlarında beş gün ərzində Bakıda olduq və bu filmi çəkdik” - deyə fransız jurnalist bildirib.

F.Roulliyer deyib ki, Bakıda onları Məmmədovun klanından olan adamlar qaşılayıb və müşayiət edib: “Lakin biz onun nəzarətində olmayan qəhrəmanlarla da görüşə bildik”.

Jurnalist deyir ki, Bakıda apardıqları araşdırmada H.Məmmədovun güclü əlaqələri və heç də şəffaf olmayan biznesi barədə faktları toplayıblar. Nəhayət, Bakıya səfərin sonuncu günü onlar H.Məmmədovun nəhəng malikanəsində onunla görüşüblər.



“Biz Bakıya səfərimizin sonuncu günü onun evinə getdik. Gecə idi, sürücünün bizi hansı yolla apardığını bilmirdik. Nəhayət, biz nəhəng malikanəyə çatdıq. O, koloritli personajdır və çox xeyirxahdır, eyni zamanda ölkəsinə dəstək verə bilmək üçün aydın təsəvvürlərə malikdir” - deyə fransalı jurnalist bildirib.

Portuqaliya mətbuatı da bu aralarda H.Məmmədovdan bəhs edir. Çünki o, “Canal+Sport” kanalına müsahibəsində Portuqaliyanın “Portu” klubunun azarkeşi olduğunu və bu kluba investisiya yatırmağa hazır olduğunu bildirib. Portuqaliya KİV-ləri qeyd edir ki, H.Məmmədov “Lans” klubunu gücləndirmək üçün lazım gəlsə Falkao və Zlatan İbrahimoviçi də transfer etməyə hazır olduğunu bildirib.

“Məmmədov Fransa futbolunda “Monako”nun sahibi olan rusiyalı milyarder Dmitri Rıbolovlev və PSJ klubunun sahibi olan ərəb şeyxi Nasir əl-Xilafi ilə rəqabətə girmək istəyir” - deyə Portuqaliya KİV-ləri yazır.

“Forbes”in açıqladığı reytinqə görə, Nasir əl-Xilafi və D.Rıbolovlev dünyada 10 ən varlı futbol klubu sahibidir. Bu reytinqə “Çelsi”nin sahibi Roman Abramoviç başçılıq edir. Siyahıda meksikalı milyarder Karlos Slim, hindistanlı metal maqnatı Mittal Lakşmi, özbək əsilli rusiyalı milyarder Əlişir Usmanov və digərləri yer alır.