“L'Equipe” jurnalı azərbaycanlı milyarderin bu ölkənin maliyyə polisinin qorxusundan vəd etdiyi 6 milyon dolları klubun hesabına köçürə bilmədiyini yazdı

Azərbaycanlı oliqarx, “Baghlan Group” holdinqinin və “Bakı” futbol klubunun sahibi Hafiz Məmmədovla bağlı Fransada yenidən ciddi problem yaranıb. Bu üzdən bir neçə gündür ki, onun adı bu ölkənin idman mediasının gündəmindən düşmür.



Virtualaz.org saytı Fransa KİV-lərinə istinadən xəbər verir ki, bu ölkənin Peşəkar Klublara Nəzarət Komissiyası (DNCG) H.Məmmədovun aldığı “Lans” klubuna mövsümün sonunadək futbolçu transferini qadağan edib. Qərarda deyilir ki, “Lans” klubunun hazırkı

maliyyə vəziyyəti transferləri həyata keçirməyə imkan vermir.

“Lans” klubu isə yaydığı rəsmi açıqlamada qərarın öz maliyyə vəziyyəti və layihələri baxımından reallığa söykənmədiyini bəyan edib. Klub DNCG-nı dərhal qadağanı ləğv

etməyə və məsələyə yenidən baxmağa çağırıb.



Bu qərar təkcə “Lans” düşərgəsində deyil, Fransanın futbol ictimaiyyəti arasında da anlaşılmazlıqla qarşılanıb. Azərbaycanlı iş adamı Hafiz Məmmədova məxsus klubda maliyyə vəziyyətinin qaydasında olduğu bir vaxtda belə bir qadağanın qoyulmasının səbəbi rəsmən açıqlanmır. Amma “L'Equipe” nəşri yazır ki, problem azərbaycanlı milyarderin vəd etdiyi vəsaiti Fransa klubunun hesabına köçürəcəyinə dair etibarlı sübutun olmamasından qaynaqlanır.

H.Məmmədov ötən ilin iyulunda “Lans”a sahib olarkən kluba ilkin mərhələdə 5 milyon avro, bu il iyunun 30-dək isə 6 milyon avro köçürməli idi. Amma klub 6 milyon avronu fevraldan etibarən köçürülməyə başlanmasını, DNCG isə bu ödəmələrə zəmanət verilməsini xahiş edib.

Hazırda “Lans” Fransanın II liqasında 3-cü pillədə qərarlaşıb və gələn mövsüm I liqaya vəsiqəyə iddialıdır.

“Nəyə görə “Lans”a transfer etmək qadağan olundu? Bu sual yanvarın 10-dan başlayaraq beyinləri düşündürür. Xüsusən də “Lans”ın sahibi Hafiz Məmmədovun milyarder olduğu nəzərə alınarsa!” - deyə “L'Equipe” sual edir.

Jurnal yazır ki, bunun iki səbəbi var. Birincisi, azərbaycanlı milyarderin vəd etdiyi kapitalı klubun hesabına yatırmasının müddəti ilə bağlı problemlər var.



“İkinci səbəb isə maliyyə polisi və klubun majoritar səhmdarının maliyyə mənbələri ilə bağlı şübhələrin olmasıdır” - deyə jurnal qeyd edir.

Məsələ ilə bağlı yanvarın 11-də “Lans” prezidenti Jerve Martel də mətbuat konfransı keçirib. O bildirib ki, DNCG-nin qərarı onları qorxutmur: “Biz bundan təəccüblənmədik. Müəyyən şübhələrimiz var idi ki, komissiya belə qərar verə bilər. Baxmayaraq ki, belə qərar üçün əsas yoxdur”.

Jerve Martel bildirib ki, DNCG “Lans” klubunun şikayəti əsasında məsələyə yanvarın 15-də yenidən baxmalıdır.

Fransanın idman nəşrləri yazırlar ki, DNCG-nin qərarı “Lans” klubunun I liqaya qalxması yolunda ciddi əngəl ola bilər. Belə ki, klub H.Məmmədovun pulları hesabına bir neçə oyunçu almağa hazırlaşır və onlarla danışıqlar aparırdı. Bunlar o qədər də bahalı olmayan futbolçulardır. Hansı ki, “Hafka” ötən ilin noyabrında “Canal+Sport”a (Fransa) müsahibə verəndə “Lans”a Zlatan İbrahimoviç kimi məşhur oyunçunu da transfer etməyə hazır olduğunu bildirmişdi.

Virtualaz.org saytının bundan əvvəl xəbər verdiyi kimi, “L'Equipe” jurnalı Fransanın Maliyyə Nazirliyinin çirkli pulların yuyulmasına qarşı mübarizə üzrə xüsusi idarəsinin, yəni TRACFİN (Gizli maliyyə sxemlərinə qarşı mübarizə və kəşfiyyat idarəsi. Fransızca belədir: “Traitement du Renseignement et Action contre les Circuits FINanciers clandestins”-red.) H.Məmmədovun pullarının mənşəyini araşdırdığı haqda yazmışdı.

Jurnal yazırdı: “Fransa Maliyyə Nazirliyinin gizli maliyyə sxemlərinə qarşı mübarizə və kəşfiyyat xidməti - TRACFİN Hafiz Məmmədovun pullarının mənşəyi və Fransa klubuna yatırılmasının məqsədi ilə bağlı şübhələrinin olduğunu gizlətmir. Bununla belə təşkilat hələ rəsmən bu yatırımlara qarşı hərəkətə keçmək üçün obyektiv əsas görmür.

“Hələ bizim əlimizdə onun vəsaitlərinin Fransaya daxil olmasına və reallaşdırılması hüququna qarşı hərəkət etmək üçün obyektiv əsas yoxdur” - deyə təşkilatdan bildirilib”.

Jurnalın dekabrın 20-də dərc etdiyi həmin məqaləsindən əvvəl də Fransa saytlarının birində bu ölkənin Maliyyə Nazirliyinin çirkli pulların yuyulmasına qarşı mübarizə xidmətinin H.Məmmədovla maraqlandığı barədə epizodik xəbər yer almışdı.