“İlham Mirzəyev kimi bir adamı tanımıram. İndi danışırıq deyə
adını çəkirəm. Heç adını belə çəkmək istəmirəm”.

Bunu mətbuata “Tale yolları” restoranının sahibi Məmmədağa Axundov deyib. “Space” telekanalının aparıcısı İlham Mirzəyevin aprelin 11-də həbs edilməsi haqda məlumat vermişdik. Daxili İşlər Nazirliyi Mütəşəkkil Cinayətkarlıqla Mübarizə İdarəsinin əməkdaşları tərəfindən saxlanılan və haqqında Cinayət Məcəlləsinin 178-ci maddəsi ilə (dələduzluq) cinayət işi açılan İ.Mirzəyev aprelin 12-də məhkəmənin qərarı ilə 2 ay müddətinə azadlıqdan məhrum edildi.
İ.Mirzəyevin saxlanılmasından sonra onun mülkləri haqda müxtəlif məlumatlar yayıldı. “İlhaMed” klinikası ilə yanaşı “Tale yolları” restoranının da aparıcıya məxsus olduğu deyildi. Bu barədə hətta rəsmi dövlət nəşri olan “Xalq qəzeti” də yazmışdı.
Klinikanın İ.Mirzəyevə məxsus olması xəbəri rəsmən təsdiqləndi. Səhiyyə Nazirliyindən verilən açıqlamada bildirildi ki, klinika lisenziyasız fəaliyyət göstərib.
İ.Mirzəyevə məxsus olduğu deyilən başqa bir obyekt - “Tale yolları” restoranı haqda isə müxtəlif məlumatlar yayıldı. Məlumatlarda həmçinin bildirilirdi ki, polis əməkdaşları restorana baxış keçirib və baş inzibatçının ifadəsini almaq üçün onu bölməyə aparıblar.
Səsləndirilən iddiaları dəqiqləşdirmək üçün Xırdalan şəhəri, Heydər Əliyev prospektində yerləşən “Tale yolları” şadlıq sarayına yollandıq. Bu iddialarla bağlı restoranın rəhbəri Məmmədağa Axundovun fikirlərini öyrəndik.
İlham Mirzəyevi şəxsən tanımadığını deyən M.Axundov ilk əvvəl obyektin ona məxsus olmasını təsdiq edən bütün rəsmi sənədləri göstərdi.
M.Axundov restoranı özünün tikdirdiyini və heç bir şərikinin olmadığını söylədi: “2006-cı ildə bu obyekti tikdirmişəm. Heç bir şərikim yoxdur. Heç İlham Mirzəyevin adının mənim adımla birgə hallandırılmasını qəbul edə bilmirəm. Mən o adamı tanımıram. Hərdənbir televizorda reklamlarda təsadüfən ağlayan yerdə görürəm. O kim, mən kim?! Xırdalan şəhərində hamı bilir ki, bura mənimdir”.
M.Axundov “Xalq qəzeti”ndə və bəzi mətbuat orqanlarında restoranın İlham Mirzəyevə aid olması haqda yazılanlara görə təəssüfləndiyini dedi: “Mənə maraqlıdır ki, bunu dəqiqləşdirmədən necə yazıblar. Onlara narazılığımı bildirə bilərəm, ancaq düşünürəm ki, ehtiyac yoxdur. Yəqin indi bilərlər ki, bura mənimdir, bir daha yazmazlar. Ola bilər ki, restoranın adını İlham Mirzəyevin verilişi ilə eyni olduğunu düşünüb belə yazırlar. Bu yazılardan sonra eşitmişəm ki, onun verilişinin adı “Etiraf”dır. Adlar da fərqlidir. Artıq səhv salmaq lazım deyil. Bəzi dostlarımız da zəng edir, maraqlanırlar. Adam utanır, bilmir nə cavab versin”.
M.Axundov obyektin İ.Mirzəyevə məxsus olması və işlətmək üçün ona verilməsi iddialarına da cavab verdi: “İlham Mirzəyev kimdir ki, mən onun obyektini işlədim? Məni tanıyanlar yaxşı tanıyır. Bunu özümə sığışdıra bilmərəm. Mən bizneslə məşğul olanda onun harada olduğu bilinmirdi. Bütün sənədlərimi göstərdim. Burada hər kəs məni tanıyır. Kimdən də istəsəniz maraqlana bilərsiniz”.
Polis tərəfindən restorana baxış keçirilməsi xəbərinə də aydınlıq gətirən M.Axundov bu xəbərin də yalan olduğunu vurğuladı: “Polislər məni tanıyır. Bilirlər ki, buranın İlham Mirzəyevlə əlaqəsi yoxdur. Polisə aparıldığı deyilən baş inzibatçı Zaur dünən də, bu gün də işinin başında olub. Yazırlar ki, bu xəbəri ətrafda yaşayan sakinlər yayıb. Necə olub ki, sakinlər bilir, ancaq biz yox?! İşimizdə heç bir axsama yoxdur. Restoranımızda bu gün də toy var, sabah da. Yəni biz işimizlə məşğul oluruq”.
Biz mətbuat olaraq hər halda öz işimizi gördük. Yayılan xəbərlərə aydınlıq gətirmək üçün faktı necə deyərlər, yerində, ilkin mənbədən dəqiqləşdirməyə çalışdıq. Amma fakt odur ki, “Tale yolları”nın İ.Mirzəyevə məxsus olması fikri kifayət qədər ciddi mənbələr tərəfindən irəli sürülüb. Məmur biznesinin çiçəkləndiyi Azərbaycanda geniş yayılmış başqa bir praktika da var - obyektlər əksər vaxtlarda başqa adamların adına sənədləşdirilir...
İLQAR